ନାବାଳିକାଙ୍କୁ ଗଣବଳାତ୍କାର କରି ମାରିଦେଲେ…..

ରିପୋର୍ଟ କାର୍ଡ / ବଲାଙ୍ଗିର

ଶୌଚ ପାଇଁ ଘରୁ ବାହାରକୁ ଯାଇଥିଲେ ନାବାଳିକା। ୩ ଯୌନ ରାକ୍ଷାସ ନାବାଳିକାଙ୍କ ଇଜ୍ଜତ ଲୁଟିବା ସହ ଜୀବନ ନେବାକୁ ବି ପଛାଇଲେ ନାହିଁ। ଏପରି ଏକ ହୃଦୟ ବିଦାରକ ଘଟଣା ବଲାଙ୍ଗିର ଜିଲ୍ଲା ସଇଁତଳା ବ୍ଲକ ତୁଷ୍ଟାପାଲି ଗାଁରେ ଘଟିଛି। ଏନେଇ ସଇଁତଳା ଥାନାରେ ଅଭିଯୋଗ କରିଛନ୍ତି ନାବାଳିକାଙ୍କ ପରିବାର । ଗାଁର ୩ ଜଣ ଯୁବକଙ୍କ ସଂପୃକ୍ତି ଅଭିଯୋଗ ବି ଆଣିଛି ପରିବାର । ଗତ ବୁଧବାର ରାତିରେ ଝିଅ ଶୌଚ ପାଇଁ ଯାଇଥିବା ବେଳେ, ଆଉ ଘରକୁ ଫେରିନଥଲା । ପରିବାର ଲୋକ ଖୋଜାଖୋଜି କରିବା ପରେ ନଦୀ ପାଖରେ ଥିବା ଏକ ବୁଦା ମୂଳରୁ ସଂଜ୍ଞାହୀନ ଅବସ୍ଥାରେ ଝିଅକୁ ଉଦ୍ଧାର କରିଥିଲେ । ଅବସ୍ଥା ଗୁରୁତର ଥିବାରୁ ତାଙ୍କୁ ପ୍ରଥମେ ବଲାଙ୍ଗୀର ଭୀମଭୋଇ ମେଡିକାଲରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପୀଡ଼ିତା ପରିବାରଙ୍କୁ ନ୍ୟାୟ ପ୍ରଦାନ ଦାବିରେ ସଇଁତଳା ଥାନାର ଦ୍ୱାରସ୍ଥ ହୋଇଛନ୍ତି ଶତାଧିକ ବଜରଙ୍ଗ କର୍ମୀ । ଏନେଇ ସଇଁତଳା ପୋଲିସ ପକ୍ଷରୁ କୌଣସି ପ୍ରତିକ୍ରିୟା ମିଳି ପାରି ନ ଥିବା ବେଳେ କେହି ବି ଗିରଫ ହୋଇ ନ ଥିବା ଜଣାଯାଇଛି।