ସୋଫିଆଙ୍କୁ ନେଇ ଭାଜପାକୁ କଟାକ୍ଷ….

ରିପୋର୍ଟ କାର୍ଡ / ନୂଆଦିଲ୍ଲୀ

ମଧ୍ୟପ୍ରଦେଶ କ୍ୟାବିନେଟ ମନ୍ତ୍ରୀ ବିଜୟ ଶାହ କର୍ଣ୍ଣେଲ ସୋଫିଆ କୁରେଶୀଙ୍କ ସମ୍ପର୍କରେ ଏକ ବିବାଦୀୟ ବୟାନ ଦେଇଥିଲେ। ସେ କର୍ଣ୍ଣେଲ ସୋଫିଆଙ୍କୁ ଆତଙ୍କବାଦୀଙ୍କ ଭଉଣୀ ବୋଲି ବର୍ଣ୍ଣନା କରିଥିଲେ। ଏହା ପରେ ସାରା ଦେଶରେ ହଇଚଇ ସୃଷ୍ଟି ହୋଇଛି। ତେବେ ଏନେଇ ଶଙ୍କରାଚାର୍ଯ୍ୟ ସ୍ବାମୀ ଅଭିମୁକ୍ତେଶ୍ୱରାନନ୍ଦ ସରସ୍ବତୀ ଏହି ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି। ଭାରତୀୟ ଜନତା ପାର୍ଟିକୁ କଟାକ୍ଷ କରି ସେ କହିଛନ୍ତି, ମନରେ ଯାହା ଥିଲା ତାହା ବାହାରକୁ ଆସିଛି। ଭାଜପା ଏହା ପୂର୍ବରୁ କରିଆସୁଛି। ଭାଜପାକୁ କଟାକ୍ଷ କରି ଶଙ୍କରାଚାର୍ଯ୍ୟ ଆହୁରି କହିଛନ୍ତି, “ଯେଉଁ ଦଳର ମୁଖପାତ୍ରମାନେ ମୁସଲମାନ, ଯେଉଁମାନେ ମୁସଲମାନ ମୁଖପାତ୍ରମାନଙ୍କୁ ବାଛି ଚାଲିଥାନ୍ତି, ସେମାନଙ୍କର ମୁସଲମାନମାନଙ୍କ ପ୍ରତି ଏପରି ମନୋଭାବ ରହିଛି। ଏହାର ଅର୍ଥ ହେଉଛି ତାଙ୍କ ମନରେ ଅନ୍ୟ କିଛି ଅଛି ଏବଂ ସେ ଅନ୍ୟ କିଛି ଦେଖାଉଛନ୍ତି। ଏହା ଲିକ୍‌ ହୋଇଯାଇଛି। ମାମଲା ରୁଜୁ ହେବା ଠିକ ଅଛି, କିନ୍ତୁ ଦଣ୍ଡ କେଉଁଠି? ଯେତେବେଳେ ଆମର ସେନା କାହାକୁ ପଦବୀ ଏବଂ ଦାୟିତ୍ୱ ଦେଇଛି, ସେତେବେଳେ କିଛି ଭାବିଚିନ୍ତି ତାହା ଦେଇଥିବ। ଆପଣ ତାଙ୍କ ବିରୁଦ୍ଧରେ ଏପରି ମନ୍ତବ୍ୟ ଦେଉଛନ୍ତି। ଏହା ଏହି ଦଳର ନିୟମ ହୋଇଗଲାଣି, ଏହା ପ୍ରଶଂସା କରିବା ସହିତ ସମାଲୋଚନା ମଧ୍ୟ କରିବ। ଏହା ସେମାନଙ୍କର ରାଜନୀତି।” ତେବେ ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧବିରତି ପାଇଁ ଏକ ଚୁକ୍ତିନାମା ହୋଇଛି। ସ୍ବାମୀ ଅଭିମୁକ୍ତେଶ୍ୱରାନନ୍ଦ ଏହା ଉପରେ କହିଥିଲେ, “ପାକିସ୍ତାନର ଅନେକ ପ୍ରଦେଶରେ ଏକ ପୃଥକ ସେନା ଗଠନ କରାଯାଇଥିଲା ଏବଂ ଏହା ପାକିସ୍ତାନର ସେନା ବିରୁଦ୍ଧରେ ଠିଆ ହୋଇଥିଲା। ଏପରି ସୁଯୋଗ ବାରମ୍ବାର ଆସେ ନାହିଁ। ସମଗ୍ର ଦେଶ ଚାହୁଁଥିଲା ଯେ ଆମେ ପାକିସ୍ତାନ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଉଚିତ ଏବଂ ଏପରି କାର୍ଯ୍ୟାନୁଷ୍ଠାନ ଗ୍ରହଣ କରିବା ଉଚିତ ଯାହାକୁ ପାକିସ୍ତାନ ଭୁଲିପାରିବ ନାହିଁ। ଏତେ ଭଲ ସୁଯୋଗ ହାତଛଡ଼ା ହୋଇଗଲା।