ଅମିତାଭ ବଚ୍ଚନଙ୍କୁ ଜନ୍ମଦିନର ଶୁଭେଚ୍ଛା ଜଣାଇଲେ ପ୍ରଧାନମନ୍ତ୍ରୀ ମୋଦୀ…..

ରିପୋର୍ଟ କାର୍ଡ / ନୂଆଦିଲ୍ଲୀ

ସିନେଜଗତର ଶେହନଶାହ ଅମିତାଭ ବଚ୍ଚନ ୮୦ ବର୍ଷରେ ପାଦ ଦେଇଛନ୍ତି । ତାଙ୍କ ଜନ୍ମଦିନରେ ଭାରତ ନୁହେଁ, ବିଶ୍ବର କୋଣଅନୁକୋଣରୁ ତାଙ୍କୁ ଅଭିନନ୍ଦନର ସୁଅ ଛୁଟୁଛି। ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁଭେଚ୍ଛା ଜଣାଇଛନ୍ତି | କହିଛନ୍ତି କି ଭାରତର ଶ୍ରେଷ୍ଠ ଚଳଚ୍ଚିତ୍ର ବ୍ୟକ୍ତିତ୍ବମାନଙ୍କ ମଧ୍ୟରୁ ଅମିତାଭ ଜଣେ | ଟୁଇଟ୍‌ କରି ପ୍ରଧାନମନ୍ତ୍ରୀ ମୋଦୀ ଲେଖିଛନ୍ତି: ଅମିତାଭ ବଚ୍ଚନଙ୍କୁ ୮୦ତମ ଜନ୍ମଦିନର ଶୁଭେଚ୍ଛା। ସବୁ ପିଢ଼ିର ଦର୍ଶକଙ୍କୁ ମନ୍ତ୍ରମୁଗ୍ଧ ଓ ଆମୋଦିତ କରିଥିବା ଶ୍ରେଷ୍ଠ ଭାରତୀୟ ଚଳଚ୍ଚିତ୍ର ବ୍ୟକ୍ତିତ୍ବମାନଙ୍କ ମଧ୍ୟରେ ସେ ଅନ୍ୟତମ। ସେ ଦୀର୍ଘ ଓ ନିରାମୟ ଜୀବନଯାପନ କରନ୍ତୁ। ଝିଅ ଶ୍ବେତା ଓ ନାତୁଣୀ ନବ୍ୟା ମଧ୍ୟ ଅମିତାଭଙ୍କୁ ଜନ୍ମଦିନ ଶୁଭେଚ୍ଛା ଜଣାଇଛନ୍ତି। ହରିବଂଶ ରାୟ ବଚ୍ଚନଙ୍କ ପ୍ରସିଦ୍ଧ କବିତା ‘ଅଗ୍ନିପଥ’ରୁ କବିତା ପଙ୍‌କ୍ତି ଉଦ୍ଧାର କରି ନାତୁଣୀ ନବ୍ୟା ସାମାଜିକ ଗଣମାଧ୍ୟମରେ ପୋଷ୍ଟ୍‌ କରିଛନ୍ତି: ଆପଣଙ୍କ ପରି କେହି ନ ଥିଲେ, କେହି ହେବେ ନାହିଁ। ଶୁଭ ଜନ୍ମଦିନ, ଅଜା । ୧୯୬୯ ମସିହାରେ ‘ସାତ୍‌ ହିନ୍ଦୁସ୍ତାନୀ’ ଚଳଚ୍ଚିତ୍ରରୁ କ୍ୟାରିୟର୍‌ ଆରମ୍ଭ କରିଥିବା ଅମିତାଭ ‘ଆନନ୍ଦ’ (୧୯୭୧), ‘ଜଞ୍ଜିର୍‌’ (୧୯୭୩) ଏବଂ ‘ଦିୱାର’ (୧୯୭୫) ଭଳି ଚଳିଚ୍ଚିତ୍ରରେ ଅଭିନୟ କରି ଅଶେଷ ଜନପ୍ରିୟତା ହାସଲ କରିବା ସହ ସୁପର୍‌ଷ୍ଟାର୍‌ ହେବାର ଗୌରବ ଅର୍ଜନ କରିଛନ୍ତି।