୨୧ରେ ଡବ୍ଲ୍ୟୁଏଫଆଇ ନିର୍ବାଚନ…..

ରିପୋର୍ଟ କାର୍ଡ / ନୂଆଦିଲ୍ଲୀ

ଚଳିତ ମାସ ୨୧ ତାରିଖରେ ଭାରତୀୟ କୁସ୍ତି ମହାସଂଘ (ଡବ୍ଲ୍ୟୁଏଫଆଇ)ର ବହୁ ପ୍ରତୀକ୍ଷିତ ନିର୍ବାଚନ ଅନୁଷ୍ଠିତ ହେବ। ସେହିଦିନ ଭୋଟ୍‌ ଗ୍ରହଣ, ଗଣତି ଓ ଫଳାଫଳ ପ୍ରକାଶ କରାଯିବ ବୋଲି ନିର୍ବାଚନ ଅଧିକାରୀ ଜଷ୍ଟିସ୍‌ ଏମ୍‌ଏମ୍‌ କୁମାର ଘୋଷଣା କରିଛନ୍ତି। ଅଗଷ୍ଟ ୭ରେ ଜାରି ଭୋଟର ତାଲିକା ଅନୁଯାୟୀ ଡବ୍ଲ୍ୟୁଏଫଆଇ ନିର୍ବାଚନ ହେବ। ଡିସେମ୍ବର ୨୧ରେ ହେବାକୁ ଥିବା ନିର୍ବାଚନ ପାଇଁ ଚୂଡ଼ାନ୍ତ ପ୍ରସ୍ତୁତି ଆରମ୍ଭ ହୋଇଯାଇଥିବା ନିର୍ବାଚନ ଅଧିକାରୀ ସୂଚନା ଦେଇଛନ୍ତି। ନିର୍ବାଚନ ଅଧିକାରୀଙ୍କ ତରଫରୁ ଜାରି ସୂଚନାନୁଯାୟୀ ଡବ୍ଲ୍ୟୁଏଫଆଇ ନିର୍ବାଚନ ଉପରେ ଗତ ଜୁଲାଇ ୧୧ରେ ପଞ୍ଜାବ ଓ ହରିୟାଣା ଉଚ୍ଚ ନ୍ୟାୟାଳୟ ରହିତାଦେଶ ଜାରି କରିଥିଲେ। ତେବେ ରହିତାଦେଶକୁ ସର୍ବୋଚ୍ଚ ନ୍ୟାୟାଳୟ ହଟାଇ ଦେଇଥିବାରୁ ଏହି ନିର୍ବାଚନ ଆସନ୍ତା ୨୧ରେ ହେବ। ସୂଚନାଥାଉ କି ଡବ୍ଲ୍ୟୁଏଫଆଇର ପୂର୍ବତନ ସଭାପତି ବ୍ରିଜ୍‌ଭୂଷଣ ମହିଳା କୁସ୍ତିଯୋଦ୍ଧାଙ୍କୁ ଯୌନ ନିର୍ଯାତନା ଦେଉଥିବା ଅଭିଯୋଗ କରି ବଜରଙ୍ଗ ପୁନିଆ, ସାକ୍ଷୀ ମଲିକଙ୍କ ପରି ଏକାଧିକ କୁସ୍ତିଯୋଦ୍ଧା ଧାରଣା ଦେଇଥିଲେ। ଏହାକୁ ନେଇ ବିବାଦୀୟ ପରିସ୍ଥିତି ସୃଷ୍ଟି ହୋଇଥିଲା। ଗତ ଜୁଲାଇରେ ଡବ୍ଲ୍ୟୁଏଫ୍‌ଆଇ ନିର୍ବାଚନ ଅନୁଷ୍ଠିତ ହେବାକୁ ଥିବା ବେଳେ ବିଭିନ୍ନ ଅଦାଲତରେ ନିର୍ବାଚନକୁ ନେଇ ଏକାଧିକ ମାମଲା ରୁଜୁ ହୋଇଥିବାରୁ ନିର୍ବାଚନ କରିବା ସମ୍ଭବପର ହୋଇପାରିନଥିଲା। ନିର୍ଦ୍ଧାରିତ ସମୟରେ ନିର୍ବାଚନ ନ ହୋଇପାରିବାରୁ ଡବ୍ଲ୍ୟୁଏଫଆଇକୁ ଅନ୍ତର୍ଜାତୀୟ କୁସ୍ତି ମହାସଂଘ ନିଲମ୍ବନ କରିଥିଲା। ଡବ୍ଲୁଏଫ୍‌ଆଇର ପଦାଧିକାରୀଙ୍କୁ କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ ହଟାଇ ଦେଇ ଏହାର ପରିଚାଳନା ପାଇଁ ଭାରତୀୟ ଉସୁ ଆସୋସିଏସନ୍‌ ସଭାପତି ଭୂପେନ୍ଦ୍ର ସିଂହ ବାଜୱାଙ୍କ ନେତୃତ୍ବାଧୀନ ଏକ ଅସ୍ଥାୟୀ କମିଟି ଗଠନ କରିଛି।