ଆଜି ‘ନିଟ୍’ ପରୀକ୍ଷା…..

ରିପୋର୍ଟ କାର୍ଡ / ଭୁବନେଶ୍ୱର

ଏମବିବିଏସ୍‌ ଏବଂ ବିଡିଏସ୍‌ ପାଠ୍ୟକ୍ରମରେ ନାମ ଲେଖାଇବା ପାଇଁ ଜାତୀୟ ପରୀକ୍ଷଣ ସଂସ୍ଥା (ଏନଟିଏ) ଦ୍ବାରା ପରିଚାଳିତ ଜାତୀୟ ଯୋଗ୍ୟତା ଓ ପ୍ରବେଶିକା ପରୀକ୍ଷା (ନିଟ୍‌)-୨୦୨୪ ଆଜି ଦେଶର ୫୫୭ଟି ଓ ବିଦେଶର ୧୪ଟି ସହରରେ ଅନୁଷ୍ଠିତ ହେବ। ନିଟ୍‌ ପାଇଁ ଓଡ଼ିଶାରେ ପରୀକ୍ଷା କେନ୍ଦ୍ର କରାଯାଇଛି। ପରୀକ୍ଷା ଅପରାହ୍ଣ ୨ଟାରୁ ଆରମ୍ଭ ହୋଇ ସନ୍ଧ୍ୟା ୫ଟା ୨୦ ମିନିଟ ପର୍ଯ୍ୟନ୍ତ ଚାଲିବ। ଏନେଇ ଏନଟିଏ ପକ୍ଷରୁ ସୂଚନା ଦିଆଯାଇ ଥିବାବେଳେ ପରୀକ୍ଷାର୍ଥୀ କେନ୍ଦ୍ରକୁ କ’ଣ ନେଇପାରିବେ ଏବଂ କ’ଣ ନେଇପାରିବେ ନାହିଁ ତାକୁ ନେଇ ଏକ ନିର୍ଦେଶାବଳୀ ପ୍ରକାଶ ପାଇଛି। ନିଟ୍‌ ପରୀକ୍ଷା ପାଇଁ ପଞ୍ଜୀକରଣ କରିଥିବା ଛାତ୍ରଛାତ୍ରୀ ୱେବସାଇଟ୍‌ www.exams.nta.ac.inକୁ ଲଗ୍‌ଇନ୍‌ କରି ପରୀକ୍ଷା କେନ୍ଦ୍ର ପାଇଁ ପ୍ରବେଶିକା ପତ୍ର ବାହାର କରିପାରିବେ। ଚଳିତ ବର୍ଷ ନିଟ୍‌ ପରୀକ୍ଷା ଦେବା ପାଇଁ ୨୪ ଲକ୍ଷ ଛାତ୍ରଛାତ୍ରୀ ପଞ୍ଜୀକରଣ କରିଛନ୍ତି। ଏଥିପାଇଁ ନିଟ୍‌ ପକ୍ଷରୁ ଦେଶରେ ୫୫୭ଟି ସହର ଏବଂ ବିଦେଶର ୧୪ଟି ସହରରେ ପରୀକ୍ଷା କେନ୍ଦ୍ର କରାଯାଇଛି। ଅନ୍ୟପଟେ ଓଡ଼ିଶାରେ ୧ ଲକ୍ଷରୁ ଊର୍ଦ୍ଧ୍ବ ଛାତ୍ରଛାତ୍ରୀ ନିଟ୍‌ ପରୀକ୍ଷା ଦେବାକୁ ଥିବାରୁ ବରଗଡ, ବାରିପଦା, ଭଦ୍ରକ, ଢେଙ୍କାନାଳ, ଜଗତସିଂହପୁର, ଯାଜପୁର, ଝାରସୁଗୁଡା, କେନ୍ଦ୍ରାପଡା, କେନ୍ଦୁଝର, ନୂଆପଡା, ବାଲେଶ୍ବର, ଅନୁଗୋଳ, ବଲାଙ୍ଗିର, କଳାହାଣ୍ଡି, ଜୟପୁର, ପାରଳାଖେମୁଣ୍ଡି, ଫୁଲବାଣୀ, ରାୟଗଡା, ପୁରୀ, କଟକ, ଭୁବନେଶ୍ବର ଏବଂ ରାଉରକେଲାରେ କେନ୍ଦ୍ର କରାଯାଇଛି। ପରୀକ୍ଷା କେନ୍ଦ୍ରରେ ନିର୍ଦ୍ଧାରିତ ସମୟରେ ପହଞ୍ଚିବାକୁ ବିଦ୍ୟାର୍ଥୀଙ୍କୁ କୁହାଯାଇଛି। ସାଥୀରେ ପାଣି ବୋତଲ, ଅତିରିକ୍ତ ପାସ୍‌ପୋର୍ଟ ଫଟୋ, ପରିଚୟପତ୍ର ଏବଂ ପ୍ରବେଶିକାପତ୍ର ନେଇ ଯିବେ। ମୋବାଇଲ ସହିତ କୌଣସି ବୈଦ୍ୟୁତିକ ଯନ୍ତ୍ରପାତି ନେଇପାରିବେ ନାହିଁ।