ଡିଏମ୍‌ଡିକେ ମୁଖ୍ୟ ବିଜୟକାନ୍ତଙ୍କ ପରଲୋକ…..

ରିପୋର୍ଟ କାର୍ଡ / ନୂଆଦିଲ୍ଲୀ

ଅଭିନେତା ତଥା ଡିଏମଡିକେ ମୁଖ୍ୟ ବିଜୟକାନ୍ତଙ୍କର ଦେହାନ୍ତ ହୋଇଛି | ଚେନ୍ନାଇର ଏକ ଘରୋଇ ହସ୍ପିଟାଲରେ ଗୁରୁବାର ଶେଷନିଶ୍ୱାସ ତ୍ୟାଗକରିଛନ୍ତି । କୋଭିଡ୍-୧୯ ପଜିଟିଭ୍ ଚିହ୍ନଟ ହେବା ପରେ ତାଙ୍କୁ ଭେଣ୍ଟିଲେଟରରେ ରଖାଯାଇଥିଲା। ତେବେ ତାଙ୍କୁ ନିମୋନିଆ ହୋଇଥିବା ହସ୍ପିଟାଲ ପକ୍ଷରୁ କୁହାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏକ୍ସରେ ଏକ ପୋଷ୍ଟରେ ଶୋକ ପ୍ରକାଶ କରି କହିଛନ୍ତି ଯେ ତାଙ୍କର ‘ଘନିଷ୍ଠ ବନ୍ଧୁ’ ବିଜୟକାନ୍ତଙ୍କ ବିୟୋଗରେ ଏକ ଶୂନ୍ୟସ୍ଥାନ ସୃଷ୍ଟି ହୋଇଛି ଯାହା ପୂରଣ କରିବା କଷ୍ଟକର ହେବ। ମୋଦି ଏକ୍ସରେ ଲେଖିଛନ୍ତି, ତିରୁ ବିଜୟକାନ୍ତଙ୍କ ବିୟୋଗରେ ସେ ଅତ୍ୟନ୍ତ ଦୁଃଖିତ। ସେ ତାମିଲ ଚଳଚ୍ଚିତ୍ର ଜଗତର ଜଣେ କିମ୍ବଦନ୍ତୀ ପୁରୁଷ ଥିଲେ। ତାଙ୍କର ଚମତ୍କାର ଅଭିନୟ ଲକ୍ଷ ଲକ୍ଷ ଲୋକଙ୍କ ହୃଦୟକୁ ଆକର୍ଷିତ କରିଥିଲା। ଜଣେ ରାଜନେତା ଭାବରେ ସେ ଜନସେବା ପ୍ରତି ଗଭୀର ପ୍ରତିଶ୍ରୁତିବଦ୍ଧ ଥିଲେ, ଯାହା ତାମିଲନାଡୁର ରାଜନୈତିକ ଦୃଶ୍ୟପଟରେ ସ୍ଥାୟୀ ପ୍ରଭାବ ପକାଇଥିଲା। ଏହି ଦୁଃଖଦ ସମୟରେ ତାଙ୍କ ପରିବାର, ପ୍ରଶଂସକ ଏବଂ ଅନୁଗାମୀଙ୍କ ପ୍ରତି ମୋର ସମବେଦନା ରହିଛି ବୋଲି ମୋଦୀ ଲେଖିଛନ୍ତି। ଡିଏମଡିକେ ମୁଖ୍ୟଙ୍କୁ ପୂର୍ବରୁ ନଭେମ୍ବର ୨୦ରେ ଏକ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଶ୍ୱାସରୋଗରେ ପୀଡ଼ିତ ହୋଇ ସେ ହସ୍ପିଟାଲରେ ଚିକିତ୍ସିତ ହେଉଥିଲେ। ୧୫୪ଟି ଚଳଚ୍ଚିତ୍ରରେ ଅଭିନୟ କରିଥିବା ବିଜୟକାନ୍ତ ପରେ ରାଜନୀତିରେ ପାଦ ଥାପି ଡିଏମ୍‌ଡିକେ ପ୍ରତିଷ୍ଠା କରିଥିଲେ ଏବଂ ଦୁଇଥର ବିଧାନସଭା ସଦସ୍ୟ ହୋଇଥିଲେ। ୨୦୧୧ରୁ ୨୦୧୬ ପର୍ଯ୍ୟନ୍ତ ସେ ତାମିଲନାଡୁ ବିଧାନସଭାରେ ବିରୋଧୀ ଦଳ ନେତା ହେବା ପରେ ତାଙ୍କର ରାଜନୈତିକ କ୍ୟାରିୟର ଶୀର୍ଷରେ ପହଞ୍ଚିଥିଲା।