ସେକ୍ସ ବେଳେ ହେଲା ମୃତ୍ୟୁ…..

ରିପୋର୍ଟ କାର୍ଡ / ନୂଆଦିଲ୍ଲୀ

ଗର୍ଲଫ୍ରେଣ୍ଡ୍‌ ସହ ସେକ୍ସ କରୁଥିବା ବେଳେ ହାର୍ଟ ଆଟାକ୍‌ ରେ ଶିକାର ହେଲେ ଜଣେ ୬୭ ବର୍ଷୀୟ ବୃଦ୍ଧ। ଘଟଣାକୁ ଚପାଇବା ପାଇଁ ଗର୍ଲଫ୍ରେଣ୍ଡ୍‌ ନିଜ ସ୍ୱାମୀ ଓ ଭାଇଙ୍କ ସହ ମିଶି ମୃତଦେହକୁ ପ୍ଲାଷ୍ଟିକ୍‌ ବ୍ୟାଗରେ ଭର୍ତ୍ତି କରି ବାହାରେ ଫିଙ୍ଗି ଦେଇଥିଲେ। ହେଲେ ପୋଲିସ୍‌କୁ ଏହି ବ୍ୟାଗ୍‌ ମିଳିବା ପରେ ପୁରା ଘଟଣା ସାମ୍ନାକୁ ଆସିଛି |ବେଙ୍ଗାଲୁରୁରେ ଏହି ଘଟଣା ଘଟିଛି। ମୃତ୍ୟୁର କିଛି ସପ୍ତାହ ପରେ ପୋଲିସ୍‌କୁ ଏହି ବ୍ୟାଗ୍‌ ମିଳିଥିଲା। ସମ୍ପୃକ୍ତ ବୃଦ୍ଧଙ୍କ ନାଁ ବାଲା ସୁବ୍ରମଣ୍ୟମ। ଜେପି ନଗରରେ ପୁଟ୍ଟେନାହାଲିରେ ତାଙ୍କ ଘର। ସୂଚନା ଅନୁସାରେ, ଘରେ କାମ କରୁଥିବା ୩୫ ବର୍ଷୀୟ ମହିଳାଙ୍କ ସହ ବାଲା ସୁବ୍ରମଣ୍ୟମଙ୍କ ପରକୀୟା ପ୍ରୀତି ଥିଲା। ନଭେମ୍ବର ୧୬ରେ ବାଲା ଗର୍ଲଫ୍ରେଣ୍ଡ୍‌ର ଘରକୁ ଆସିଥିଲେ ଓ ଏହି ସମୟରେ ପରକୀୟାରେ ଲିପ୍ତ ଥିବାବେଳେ ତାଙ୍କର ହାର୍ଟ ଆଟାକ୍‌ ହୋଇଥିଲା। ଏହାପରେ ତାଙ୍କର ମୃତ୍ୟୁ ଘଟିଥିଲା। ନାତିକୁ ବ୍ୟାଡ୍‌ମିଣ୍ଟନ କ୍ଲାସ୍‌ରେ ଛାଡ଼ିବା ପାଇଁ ସେ ଘର ବାହାରକୁ ଆସିଥିଲେ। ଅପରାହ୍ଣ ପ୍ରାୟ ୫ଟାରେ ବୋହୂକୁ ଫୋନ୍‌ କରି କହିଥିଲେ, କିଛି ବ୍ୟକ୍ତିଗତ କାମ ଥିବାରୁ ଘରେ ପହଞ୍ଚିବାରେ ବିଳମ୍ବ ହୋଇପାରେ। ଘରେ ନପହଞ୍ଚିବାରୁ ବାଲାଙ୍କ ସହ ପରିବାର ସଦସ୍ୟ ଯୋଗାଯୋଗ କରିଥିଲେ। ହେଲେ ତାଙ୍କ ସହ କୌଣସି ଯୋଗାଯୋଗ ହୋଇପାରି ନଥିଲା। ଏହାପରେ ବାଲାଙ୍କ ପୁଅ, ବାପା ନିଖୋଜ ହୋଇଥିବା ନେଇ ସୁବ୍ରମଣ୍ୟ ନଗର ପୋଲିସ୍‌ ଷ୍ଟେସନରେ ଅଭିଯୋଗ କରିଥିଲେ। ଅଭିଯୋଗର ଦିନକ ପରେ ପୋଲିସ୍‌ ସନ୍ଦେହଜନକ ଅବସ୍ଥାରେ ରାସ୍ତାକଡ଼ରୁ ପ୍ଲାଷ୍ଟିକ୍‌ କଭର ଓ ବେଡ୍‌ଶିଟ୍‌ରେ ଗୁଡ଼ା ହୋଇଥିବା ଅବସ୍ଥାରେ ମୃତଦେହ ଉଦ୍ଧାର କରିଥିଲା। ଏହା ବାଲାଙ୍କ ମୃତଦେହ ବୋଲି ପରିବାର ଲୋକ ଚିହ୍ନଟ କରିଥିଲେ। ଘଟଣାପରେ ବାଲାଙ୍କ ସହ ସମ୍ପର୍କ ରଖିଥିବା ମହିଳାଙ୍କୁ ପଚରାଉଚରା ପରେ ଘଟଣାର ପର୍ଦ୍ଦାଫାସ ହୋଇଥିଲା। ୬୭ ବର୍ଷୀୟ ବାଲା ସୁବ୍ରମଣ୍ୟମଙ୍କ ମୃତଦେହ ଫିଙ୍ଗି ଦେଇଥିବା କଥା ସେ ସ୍ୱୀକାର କରିଥିଲେ। ବିଜ୍‌ନେସ୍‌ ମ୍ୟାନ୍‌ ବାଲାଙ୍କ ସହ ତାଙ୍କ ପରକୀୟା ପ୍ରୀତି ଖବର ଜଣାପଡ଼ିବା ପରେ, ହୁଏତ ତାଙ୍କର ଛବି ଖରାପ ହୋଇଯିବ ଏହି ଭୟରେ ସେ ସ୍ୱାମୀ ଓ ଭାଇଙ୍କ ସହ ମିଶି ମୃତଦେହକୁ ପ୍ଲାଷ୍ଟିକ୍‌ ବ୍ୟାଗ୍‌ରେ ଭର୍ତ୍ତି କରି ଜେପି ନଗରରେ ଫିଙ୍ଗି ଦେଇଥିଲେ। ମହିଳାଙ୍କ ଆହୁରି ଭୟ ଥିଲା ଯେ, ଘଟଣାକୁ ନେଇ ହୁଏତ ପୋଲିସ୍‌ ତାଙ୍କ ବିରୋଧରେ ହତ୍ୟା ମାମଲା ରୁଜୁ କରିପାରେ। ତେଣୁ ସେ ମୃତଦେହକୁ ରାସ୍ତାରେ ଫିଙ୍ଗି ଦେଇଥିଲେ।