ଗଣେଶ ମୂର୍ତ୍ତି ବିସର୍ଜନ ବେଳେ ୧୧ ମୃତ୍ୟୁ…..

ରିପୋର୍ଟ କାର୍ଡ / ନୂଆଦିଲ୍ଲୀ

ଗଣେଶ ମୂର୍ତ୍ତି ବିସର୍ଜନ ବେଳେ ବଡ ଅଘଟଣ ଘଟିଛି । ଉତ୍ତରପ୍ରଦେଶ ଓ ହରିୟାନାରେ ବିଭନ୍ନ ସ୍ଥାନରେ ଗଣେଶ ମୂର୍ତ୍ତି ବିସର୍ଜନ ବେଳେ ପାଣିରେ ବୁଡ଼ି ୪ ନାବାଳକଙ୍କ ସମେତ ୧୧ ଜଣ ପ୍ରାଣ ହରାଇଥିବା ଜଣାଯାଇଛି। ହରିୟାନାର ମହେନ୍ଦ୍ରଗଡ଼ ଜିଲ୍ଲାରେ ଏକ ୭ ଫୁଟର ମୂର୍ତ୍ତି ବିସର୍ଜନ ବେଳେ ପ୍ରାୟ ୯ ଜଣ ପାଣିର ପ୍ରଖର ସ୍ରୋତରେ ଭାସି ଯାଇଥିଲେ। ଜିଲ୍ଲା ପ୍ରଶାସନ ପକ୍ଷରୁ ଏନଡିଆରଏଫର ସହାୟତା ନିଆଯାଇ ଉଦ୍ଧାର କାର୍ଯ୍ୟ କରାଯାଇଥିଲା । ଏହି ସମୟରେ ୪ ଯୁବକଙ୍କ ମୃତଦେହ ଉଦ୍ଧାର କରାଯାଇଥିବା ବେଳେ ଅନ୍ୟମାନଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି। ସେହିପରି ଉତ୍ତରପ୍ରଦେଶର ବିଭିନ୍ନ ସ୍ଥାନରେ ପାଣିରେ ବୁଡ଼ି ୧୧ ଜଣଙ୍କର ମୃତ୍ୟୁ ହୋଇଛି । ୟୁପିର ସନ୍ଥ କବୀର ନଗର ଜିଲ୍ଲାରେ ମୂର୍ତ୍ତି ବିସର୍ଜନ ଦେଖିବାକୁ ଯାଇ ମଧ୍ୟ ୪ ନାବାଳକ ନଦୀରେ ବୁଡି ଯାଇଥିଲେ। ପୋଲିସ ମାଛଧରାଳିଙ୍କ ସହଯୋଗରେ ସେମାନଙ୍କ ମୃତଦେହ ଉଦ୍ଧାର କରିଛି। ସେମାନଙ୍କ ବୟସ ୬ରୁ ୧୧ ବର୍ଷ ବୋଲି ଜଣାଯାଇଛି। ଉନ୍ନାବ ଜିଲ୍ଲାରେ ଗତକାଲି ଗଣେଶ ବିସର୍ଜନ ଚାଲିଥିବା ବେଳେ ପାଣିର ସୁଅରେ ଭାସିଯାଇ ୨ ନାବାଳକଙ୍କ ସମେତ ୩ ଜଣଙ୍କ ମୃତ୍ୟୁ ହୋଇଛି। ସଫିପୁର ଥାନା ଅଞ୍ଚଳର ଏକ ଗାଁର ୫ ଜଣ ମୂର୍ତ୍ତି ବିସର୍ଜନ କରିବାକୁ ଯାଇଥିବା ବେଳେ ଅସାବଧାନତା ହେତୁ ପାଣିରେ ଭାସିଯାଇଥିଲେ। ସେଠାରେ ଉପସ୍ଥିତ ଲୋକ ୨ ଜଣଙ୍କର ମୃତଦେହ ପାଣିରୁ ଊଦ୍ଧାର କରିଥିଲେ। ଅନ୍ୟ ୩ ଜଣଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରାଯାଇଥିବା ବେଳେ ହସ୍ପିଟାଲରେ ମୃତ୍ୟୁ ହୋଇଥିବା ଜଣାଯାଇଛି।