ବନ୍ୟାରେ ଭାସିଯାଇ ୧୨ ନିଖୋଜ……

ରିପୋର୍ଟ କାର୍ଡ / ନୂଆଦିଲ୍ଲୀ

ହିମାଚଳ ପ୍ରଦେଶର ମଣ୍ଡି ଜିଲ୍ଲା ଅନ୍ତର୍ଗତ କରସୋଗ ସମେତ ୪ଟି ଅଞ୍ଚଳରେ ସୋମବାର ବିଳମ୍ବିତ ରାତିରେ ବାଦଲଫଟା ବର୍ଷା ଯୋଗୁ ହଠାତ ପ୍ରଳୟଙ୍କରୀ ବନ୍ୟା ଆସିଛି। ବନ୍ୟାରେ ବହୁ ଘରଦ୍ଵାର, ଗାଡ଼ିମୋଟର ଏବଂ ଦୋକାନ ଘର ଭାସିଯାଇଛି। ଜଣେ ବ୍ୟକ୍ତିଙ୍କ ପ୍ରାଣହାନୀ ଘଟିଥିବାବେଳେ ୧୨ରୁ ଅଧିକ ଲୋକ ବନ୍ୟାଜଳରେ ଭାସିଯାଇ ନିଖୋଜ ରହିଛନ୍ତି। କିଛି ସ୍ଥାନରେ ନଦୀ ପୋଲ ଧୋଇଯାଇଛି। ଜଣେ ଅଧିକାରୀଙ୍କ ସୂଚନା ଅନୁସାରେ, ବାଦଲଫଟା ବର୍ଷା ଏବଂ ଏହା ପରବର୍ତ୍ତୀ ବନ୍ୟା ଯୋଗୁ ପଟିକାରୀ ଜଳବିଦ୍ୟୁତ ପ୍ରକଳ୍ପ କ୍ଷତିଗ୍ରସ୍ତ ହୋଇଛି। ବିୟାସ ନଦୀରେ ଭୟଙ୍କର ଭାବେ ହଠାତ ଜଳସ୍ତର ବୃଦ୍ଧି ପାଇଛି। ଫଳରେ ପାଣ୍ଡୋ ଡ୍ୟାମର ଫାଟକ ସବୁ ଖୋଲି ଦିଆଯାଇଛି। ବନ୍ୟାଜଳ ପ୍ରବାହ ଯୋଗୁ କିରାଟପୁର-ମନାଲି ଜାତୀୟ ରାଜପଥ ବନ୍ଦ ରହିଛି। ମଣ୍ଡି ସହରର ଜେଲ ରୋଡରେ ଭୂସ୍ଖଳନ ଯୋଗୁ ୧୨ରୁ ଅଧିକ ଗାଡ଼ି ମାଟିତଳେ ପୋତି ହୋଇ ରହିଛି। ସେହିପରି ସାୟାଥି ଗ୍ରାମରେ ଭୂସ୍ଖଳନ ଯୋଗୁ ବହୁ ଘରଦ୍ଵାର ମାଟିତଳେ ପୋତି ହୋଇପଡ଼ିଛି।