ମହିଳାଙ୍କ ମଧ୍ୟରେ ଅସୁରକ୍ଷିତ ପରିବେଶ ସୃଷ୍ଟି ହୋଇଛି: ରାହୁଲ….

ରିପୋର୍ଟ କାର୍ଡ / ନୂଆଦିଲ୍ଲୀ

କୋଲକାତାର ଗୋଟିଏ ସରକାରୀ ହସ୍ପିଟାଲରେ ଜଣେ ଟ୍ରେନି ଡାକ୍ତରଙ୍କୁ ଦୁଷ୍କର୍ମ ପରେ ହତ୍ୟା କରାଯିବା ଘଟଣା ସାରା ଦେଶରେ ଆନ୍ଦୋଳନର ରୂପ ନେଇଛି । ଏହାକୁ ନେଇ ଦେଶର ମେଡିକାଲ କର୍ମଚାରୀ ଓ ଛାତ୍ରଛାତ୍ରୀ ବିକ୍ଷୋଭ କରୁଛନ୍ତି। କଲିକତା ହାଇକୋର୍ଟ କୋଲକାତା ପୋଲିସର ତଦନ୍ତ ଉପରେ ପ୍ରଶ୍ନ ଉଠାଇବା ସହ ଘଟଣାର ସିବିଆଇ ତଦନ୍ତ ନିର୍ଦ୍ଦେଶ ଦେଇଛନ୍ତି। ଏହି ଘଟଣାକୁ ନେଇ ରାହୁଲ ଗାନ୍ଧି ଘଟଣାକୁ ସ୍ଥାନୀୟ ପ୍ରଶାସନର କାର୍ଯ୍ୟ ଦକ୍ଷତା ଉପରେ ପ୍ରଶ୍ନ ଉଠାଇଛନ୍ତି। ସେ ନିଜ ଏକ୍ସ ଆକାଉଣ୍ଟରେ କହିଛନ୍ତି, “କୋଲକାତାରେ ଜୁନିୟର ଡାକ୍ତରଙ୍କ ସହ ହୋଇଥିବା ରେପ ଓ ମର୍ଡରର ବୀଭତ୍ସ ଘଟଣାରେ ପୂରା ଦେଶ ସ୍ତବ୍ଧ। ତାଙ୍କ ସହ ଘଟିଥିବା କ୍ରୁର ଓ ଅମାନବୀୟ କାଣ୍ତର ଗୋଟିଏ ପରେ ଗୋଟିଏ ପୃଷ୍ଠା ସାମ୍ନାକୁ ଆସିବାରେ ଲାଗିଛି। ଏଥିଯୋଗୁ ଡାକ୍ତର ଗୋଷ୍ଠୀ ଓ ମହିଳାଙ୍କ ମଧ୍ୟରେ ଅସୁରକ୍ଷିତ ପରିବେଶ ସୃଷ୍ଟି ହୋଇଛି। ପୀଡ଼ିତାଙ୍କୁ ନ୍ୟାୟ ଦେବା ବଦଳରେ ଅପରାଧୀମାନଙ୍କୁ ସୁରକ୍ଷା ଦେବା ପାଇଁ ଚାଲିଥିବା ଉଦ୍ୟମ ହସ୍ପିଟାଲ ଓ ସ୍ଥାନୀୟ ପ୍ରଶାସନ ଉପରେ ଗମ୍ଭୀର ପ୍ରଶ୍ନବାଚୀ ସୃଷ୍ଟି କରିଛି। ମେଡିକାଲ କଲେଜ ଭଳି ସ୍ଥାନରେ ଯଦି ଡାକ୍ତରମାନେ ସୁରକ୍ଷିତ ନୁହନ୍ତି, ତା’ହେଲେ ଅଭିଭାବକମାନେ କେମିତି ନିଜ ଝିଅମାନଙ୍କୁ ବାହାରକୁ ପାଠପଢ଼ିବା ପାଇଁ ଛାଡ଼ିବେ | ନିର୍ଭୟା କେସ ପରେ ପ୍ରଣୟନ କରାଯାଇଥିବା କଠୋର ଆଇନ ବି ଏପରି ଅପରାଧକୁ ରୋକିବାରେ କେମିତି ଅସଫଳ ହେଲା | ହାଥରସରୁ ଉନ୍ନାଓ, କଠୁଆରୁ କୋଲକାତା ଯାଏ ମହିଳାଙ୍କ ଉପରେ ଉପରେ ବଢ଼ୁଥିବା ଅତ୍ୟାଚାରକୁ ନେଇ ସବୁ ଦଳ ଓ ସବୁ ବର୍ଗ ମିଳିତ ଭାବେ ବିଚାର ବିମର୍ଶ କରି ଠୋସ ଉପାୟ କରିବାକୁ ପଡ଼ିବ। ମୁଁ ଏହି ଅସହନଶୀଳ କଷ୍ଟ ସମୟ ପୀଡ଼ିତାଙ୍କ ପରିବାର ଲୋକଙ୍କ ସହ ଛିଡ଼ା ହୋଇଛି। ସେମାନଙ୍କୁ ଯେକୌଣସି ପରିସ୍ଥିତିରେ ମଧ୍ୟ ନ୍ୟାୟ ମିଳୁ। ଦୋଷୀଙ୍କୁ ଏମିତି ଦଣ୍ଡ ମିଳୁ, ଯାହା ପୂରା ସମାଜ ଆଗରେ ଗୋଟିଏ ଉଦାହରଣ ସୃଷ୍ଟି କରିବ।”