ଦୁଇଚକିଆ ଯାନ ପାଇଁ ବି ଟୋଲ ଟାକ୍ସ !…..

ରିପୋର୍ଟ କାର୍ଡ / ନୂଆଦିଲ୍ଲୀ

ଜାତୀୟ ରାଜପଥ ବ୍ୟବହାର କରୁଥିବା ଦୁଇ ଚକିଆ ଯାନମାନଙ୍କ ପାଇଁ ଏକ ବଡ଼ ଖବର ଆସୁଛି। ସୂଚନା ଅନୁଯାୟୀ, ଏବେ ଦୁଇ ଚକିଆ ଯାନଗୁଡ଼ିକଠାରୁ ଜାତୀୟ ରାଜପଥର ଟୋଲ୍ ଟିକସ ଆଦାୟ ପାଇଁ ସରକାର ବିଚାର କରୁଛନ୍ତି। ଏହି ନିୟମ ୧୫ ଜୁଲାଇରୁ ଲାଗୁ ହୋଇପାରେ । ତେବେ ଏ ନେଇ କୌଣସି ସରକାରୀ ଗେଜେଟ୍ ବିଜ୍ଞପ୍ତି ପ୍ରକାଶ ପାଇନାହିଁ । ଉଲ୍ଲେଖନୀୟ ଯେ ଯେତେବେଳେ ଆପଣ ଦୁଇ ଚକିଆ ଯାନ କିଣନ୍ତି, ସେହି ସମୟରେ ଟୋଲ୍ ଟିକସ ଆଦାୟ କରାଯାଏ। ଏପରି ପରିସ୍ଥିତିରେ, ଯେତେବେଳେ ଦୁଇ ଚକିଆ ଯାନ ଜାତୀୟ ରାଜପଥର ଟୋଲ୍ ପ୍ଲାଜା ଦେଇ ଯାଆନ୍ତି, ସେମାନଙ୍କଠାରୁ ଟୋଲ୍ ଟିକସ ନିଆଯାଏ ନାହିଁ। କେବଳ ଜାତୀୟ ରାଜପଥରେ ଚାରି ଚକିଆ କିମ୍ବା ତା’ଠାରୁ ଅଧିକ ଯାନରୁ ଟୋଲ୍ ଟିକସ ଆଦାୟ କରାଯାଏ। କିନ୍ତୁ ନୂତନ ନିୟମ ଅନୁଯାୟୀ, ଦୁଇଚକିଆ ଯାନଗୁଡ଼ିକୁ ଫାଷ୍ଟାଗ୍ ମାଧ୍ୟମରେ ଟୋଲ୍ ଦେବାକୁ ପଡିବ। ଯଦି କୌଣସି ବ୍ୟକ୍ତି ଏହି ନିୟମ ଉଲ୍ଲଂଘନ କରନ୍ତି, ତେବେ ତାଙ୍କୁ ୨୦୦୦ ଟଙ୍କା ଜରିମାନା ଦେବାକୁ ପଡିବ। ସରକାର ଏହି ନିୟମ ଯଦି ଲାଗୁ କରନ୍ତି ତେବେ ଦୁଇଚକିଆ ଯାନ ଚାଳକମାନଙ୍କୁ ବି ଫାଷ୍ଟାଗ୍ କିଣିବାକୁ ହେବ ଓ ତାହାକୁ ନିଜର ବ୍ୟାଙ୍କ ଖାତା କିମ୍ବା ଡିଜିଟାଲ ଓ୍ବାଲେଟ୍ ସହ ଲିଙ୍କ କରିବାକୁ ପଡିବ ।