ଓଡ଼ିଶାରେ ପ୍ରବଳ ବର୍ଷିବ,୭ ଜିଲ୍ଲାକୁ ରେଡ ଆଲର୍ଟ…..

ରିପୋର୍ଟ କାର୍ଡ / ଭୁବନେଶ୍ୱର

ବଙ୍ଗୋପସାଗରରେ ସୃଷ୍ଟ ଗଭୀର ଅବପାତ ଓଡ଼ିଶାରେ ପ୍ରବଳ ବର୍ଷା ଆଣିଛି, ଯାହା ଏବର୍ଷର ଦୁର୍ଗାପୂଜା ଉତ୍ସବରେ ବାଧା ସୃଷ୍ଟି କରିଛି। ଗୋପାଳପୁର ନିକଟରେ ଏହି ଗଭୀର ଅବପାତ ଓଡ଼ିଶା ଉପକୂଳ ଅତିକ୍ରମ କରିଛି ଏବଂ ଏହା ଉତ୍ତର-ଉତ୍ତରପଶ୍ଚିମ ଦିଗରେ ଦକ୍ଷିଣ ଓଡ଼ିଶା ଦେଇ ଆଗକୁ ବଢ଼ିବ। ଆଜି ଏହା ଧୀରେ ଧୀରେ ଦୁର୍ବଳ ହୋଇ ଏକ ଅବପାତରେ ପରିଣତ ହେବ ବୋଲି ପାଣିପାଗ ବିଭାଗ (IMD) ପୂର୍ବାନୁମାନ କରିଛି। ଏହି ଅବପାତ ଯୋଗୁଁ ରାଜ୍ୟର ବିଭିନ୍ନ ଅଞ୍ଚଳରେ ପ୍ରବଳ ବର୍ଷା ଜାରି ରହିଛି। କେତେକ ସ୍ଥାନରେ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି। ଭାରତୀୟ ପାଣିପାଗ ବିଭାଗ ଶୁକ୍ରବାର ପର୍ଯ୍ୟନ୍ତ ୭ଟି ଜିଲା କୋରାପୁଟ, କଳାହାଣ୍ଡି, କନ୍ଧମାଳ, ରାୟଗଡ଼ା, ଗଜପତି, ଗଞ୍ଜାମ ଏବଂ ପୁରୀକୁ ପ୍ରବଳ ରୁ ଅତି ପ୍ରବଳ ବର୍ଷା ପାଇଁ ରେଡ ଆଲର୍ଟ ଜାରି କରିଛି।ଏହା ସହିତ, ୧୬ଟି ଜିଲାକୁ ଅରେଞ୍ଜ ଆଲର୍ଟ ଏବଂ ୭ଟି ଜିଲାକୁ ହଳଦିଆ ଆଲର୍ଟ ଜାରି କରାଯାଇଛି। ସୁନ୍ଦରଗଡ଼ ଜିଲ୍ଲାକୁ ଆଜି ଅତି ପ୍ରବଳ ବର୍ଷା ପାଇଁ ଅରେଞ୍ଜ ଆଲର୍ଟ ଜାରି ହୋଇଥିବା ବେଳେ ଆସନ୍ତାକାଲି ପ୍ରବଳ ବର୍ଷାର ସମ୍ଭାବନା ରହିଛି। ଏହି ପ୍ରବଳ ବର୍ଷା ଯୋଗୁଁ ରାଜ୍ୟରେ ଦୁର୍ଗାପୂଜା ଉତ୍ସବର ଉତ୍ସାହ ମନ୍ଥର ହୋଇଛି। ପୂଜା ମଣ୍ଡପ ଓ ଉତ୍ସବ ଆୟୋଜନ ଉପରେ ବର୍ଷାର ପ୍ଫଳରେ ପ୍ରଭାବ ପଡ଼ିଛି। ସ୍ଥାନୀୟ ପ୍ରଶାସନ ଓ ପୋଲିସ ଜନସାଧାରଣଙ୍କୁ ସତର୍କ ରହିବାକୁ ଏବଂ ଆବଶ୍ୟକ ସୁରକ୍ଷା ପଦକ୍ଷେପ ଗ୍ରହଣ କରିବାକୁ ପରାମର୍ଶ ଦେଇଛି। ବର୍ଷା ଜନିତ ଜଳମଗ୍ନ ଓ ଅନ୍ୟାନ୍ୟ ଅସୁବିଧାକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନମାନେ ମଧ୍ୟ ସଜାଗ ରହିଛନ୍ତି। ପାଣିପାଗ ବିଭାଗ ଲୋକଙ୍କୁ ନିମ୍ନାଞ୍ଚଳରୁ ଦୂରେଇ ରହିବାକୁ ଏବଂ ବର୍ଷା ସମୟରେ ଯାତାୟାତରେ ସତର୍କତା ଅବଲମ୍ବନ କରିବାକୁ କହିଛି। ଏହି ପରିସ୍ଥିତି ଆସନ୍ତା କିଛି ଦିନ ପର୍ଯ୍ୟନ୍ତ ରାଜ୍ୟରେ ବର୍ଷା ଜାରି ରଖିବ ବୋଲି ପୂର୍ବାନୁମାନ କରାଯାଇଛି।