ଆଜି ମେଲାଣି ନେବେ ମା’ ଦୁର୍ଗା, ନିରାଡମ୍ବର ଭାବେ ଭସାଣ ଉତ୍ସବ ଲାଗି ସବୁଠି ପ୍ରସ୍ତୁତି…..

ରିପୋର୍ଟ କାର୍ଡ / ଭୁବନେଶ୍ୱର

ସରିଲା ଦଶହରା। ପାଞ୍ଚଦିନର କୋଣିଆ ହୋଇ ଆସିଥିଲେ ମା ଦଶଭୁଜା | ଆଜି ବିଦାୟ ନେବେ ମା ଦଶଭୁଜା | ମେଲାଣି ନେବେ ମା’ ଦୁର୍ଗା । କରୋନା କଟକଣା ପାଇଁ ଏଥର ବାଜାବାଣକୁ ମନ କରାଯାଇଛି । ତେଣୁ ନିରାଡମ୍ବର ଭାବେ ଭସାଣ ଉତ୍ସବ ଲାଗି ସବୁଠି ପ୍ରସ୍ତୁତି ହୋଇଛି। ଭୁବନେଶ୍ୱରରେ ଭସାଣ ପାଇଁ ୫ଟି ଅସ୍ଥାୟୀ ପୋଖରୀ ହୋଇ ଥିବାବେଳେ ୧୯ ପ୍ଲାଟୁନ ଫୋର୍ସ ମୁତୟନ କରାଯାଇଛି। କଟକରେ ମେଢ ବିସର୍ଜନ ପାଇଁ ୬ ଟି ସ୍ଥାନ ଚିହ୍ନଟ କରାଯାଇଛି। ଦେବୀଗଡ଼ା ସହ ଚହଟା, ଯୋବ୍ରା ମ୍ୟୁଜିୟମ ନିକଟ, କାର୍ତ୍ତିକେଶ୍ୱର ଗଡ଼ା, ଘାଟକୁଳ ଆଦି ସ୍ଥାନରେ ଭସାଣ ପାଇଁ ଅସ୍ଥାୟୀ ପୋଖରୀ କରାଯାଇଛି। ପର୍ଯ୍ୟାୟ କ୍ରମେ ସନ୍ଧ୍ୟା ୬ଟା ସୁଦ୍ଧା ବିସର୍ଜନ କାର୍ଯ୍ୟ ଶେଷ କରିବାକୁ ନିର୍ଦ୍ଦେଶ ଦିଆଯାଇଥିବାଳେ କିଛି ମେଢ଼ ୧୭ ତାରିଖରେ ବିସର୍ଜନ କରାଯିବାକୁ ରୁଟ୍ ଚାର୍ଟ ସ୍ଥିର ହୋଇଛି। ଚଳିତ ବର୍ଷ କୋଭିଡ୍ କଟକଣା ଭିତରେ ବିଭିନ୍ନ ମଣ୍ଡପରେ ବିଧି ପାଳନ ପୂର୍ବକ ମା’ଙ୍କ ପୂଜାର୍ଚ୍ଚନା କରାଯାଇଥିଲା। ସୋସିଆଲ ମିଡିଆରେ ମା’ଙ୍କ ପୂଜାର୍ଚ୍ଚନା ଦେଖିଥିଲେ ସାଧାରଣ ଲୋକେ। ହେଲେ ପ୍ରତ୍ୟକ୍ଷ ଭାବେ ଦର୍ଶନ କରିପାରିନଥିଲେ ଭକ୍ତ। କାରଣ କୋଭିଡ କଟକଣା ପାଇଁ ମଣ୍ଡପରେ ସାଧାରଣ ଦର୍ଶନ ମନା ଥିଲା । ମଣ୍ଡପରେ ଭକ୍ତଙ୍କ ଦର୍ଶନ ଉପରେ କଟକଣା ଲଗାଯାଇଥିବାରୁ ଫେସବୁକ୍, ୟୁଟ୍ୟୁବ୍ ମାଧ୍ୟମରେ ପୂଜାର ଲାଇଭ୍ ବ୍ୟବସ୍ଥା କରିଥିଲେ ବିଭିନ୍ନ ପୂଜା କମିଟି ।