ବେବି ପାଉଡର ଲାଇସେନ୍ସ ବାତିଲ…..

ରିପୋର୍ଟ କାର୍ଡ / ନୂଆଦିଲ୍ଲୀ  

ମହାରାଷ୍ଟ୍ର ସରକାର ଶିଶୁ ପାଉଡର ଉତ୍ପାଦନ ନିମନ୍ତେ ଉଦ୍ଦିଷ୍ଟ ଜନସନ ଆଣ୍ଡ ଜନସନ କମ୍ପାନିର ଲାଇସେନ୍ସକୁ ରଦ୍ଦ କରିଛନ୍ତି । ରାଜ୍ୟର ଖାଦ୍ୟ ଏବଂ ଔଷଧ ପ୍ରଶାସନ ପକ୍ଷରୁ ଜନସନ ପାଉଡରର ନିୟମିତ ଗୁଣାତ୍ମକ ଯାଞ୍ଚ ସମୟରେ ତାହା ଖରାପ ଗୁଣମାନର ବୋଲି ଜଣାପଡ଼ିଥିଲା । ଏହା ପରେ ମହାରାଷ୍ଟ୍ର ଏଫଡିଏ ଏକ ସାମ୍ବାଦିକ ସମ୍ମିଳନୀରେ କହିଥିଲା ଯେ ଏହା ରାଜ୍ୟରେ ଶିଶୁ ପାଉଡର ଉତ୍ପାଦନ ପାଇଁ ଜନସନ ଏବଂ ଜନସନର ଲାଇସେନ୍ସକୁ ବାତିଲ କରିଦେଇଛି। ଏହା ସହିତ ବଜାରରେ ଥିବା ଖରାପ ମାନର ପାଉଡରଗୁଡ଼ିକୁ ପ୍ରତ୍ୟାହାର କରିନେବାକୁ କମ୍ପାନିକୁ କୁହାଯାଇଛି । ନାସିକ୍ ଏବଂ ପୁଣେରେ ନମୁନାଗୁଡିକ ଗୁଣାତ୍ମକ ଯାଞ୍ଚରେ ବିଫଳ ହେବା ପରେ, ଏଫଡିଏ ପକ୍ଷରୁ କମ୍ପାନିକୁ ଏକ କାରଣ ଦର୍ଶାଅ ନୋଟିସ ଜାରି କରାଯାଇଥିଲା, ଯେ ଏହାର ଲାଇସେନ୍ସ କାହିଁକି ବାତିଲ ନ ହେବ ? ତେବେ କମ୍ପାନି ଏଫଡିଏର ପରୀକ୍ଷା ରିପୋର୍ଟକୁ ଗ୍ରହଣ କରିନଥିଲା ଏବଂ କୋଲକାତାସ୍ଥିତ ସେଣ୍ଟ୍ରାଲ ଡ୍ରଗ୍ସ ଲାବୋରେଟୋରୀକୁ ନମୁନା ପଠାଯିବାକୁ ଆବେଦନ କରି କୋର୍ଟରେ ଆବେଦନ କରିଥିଲା । ମାତ୍ର ନିର୍ଦ୍ଦେଶକ ସିଡିଏଲ୍, କୋଲକାତା ମଧ୍ୟ ମହାରାଷ୍ଟ୍ର ଏଫଡିଏର ରିପୋର୍ଟ ଠିକ୍ ବୋଲି କହି ରିପୋର୍ଟ ଦେଇଥିଲେ ଯେ ଉକ୍ତ ପାଉଡର ଶିଶୁମାନଙ୍କ ଚର୍ମ ପାଇଁ ଉପଯୋଗୀ ନୁହେଁ।