ଅତିଶୀଙ୍କ ବିରୋଧରେ ଆପତ୍ତିଜନକ ମନ୍ତବ୍ୟ ଦେଇ ଅଡୁଆରେ ସ୍ବାତୀ ମାଲିୱାଲ୍‌….

ରିପୋର୍ଟ କାର୍ଡ / ନୂଆଦିଲ୍ଲୀ

ଦିଲ୍ଲୀର ପରବର୍ତ୍ତୀ ମୁଖ୍ୟମନ୍ତ୍ରୀ ଭାବେ ବଛା ଯାଇଥିବା ମନ୍ତ୍ରୀ ଅତିଶୀଙ୍କ ବିରୋଧରେ ଆପତ୍ତିଜନକ ମନ୍ତବ୍ୟ ଦେଇ ଅଡୁଆରେ ଫଶି ଯାଇଛନ୍ତି ଆମ୍‌ ଆଦ୍‌ମୀ ପାର୍ଟିର ରାଜ୍ୟସଭା ସାଂସଦ ସ୍ବାତୀ ମାଲିୱାଲ୍‌। ଆପ୍‌ର ବରିଷ୍ଠ ନେତ୍ରୀ ଅତିଶୀଙ୍କ ବିରୋଧରେ ଦେଇଥିବା ଅସମ୍ମାନଜନକ ମନ୍ତବ୍ୟ ପାଇଁ ଦଳ ଏବେ ତାଙ୍କର ଇସ୍ତଫା ଦାବି କରିଛି। ଆମ୍‌ ଆଦ୍‌ମୀ ପାର୍ଟିର ବରିଷ୍ଠ ନେତା ଦିଲୀପ ପାଣ୍ଡେ କହିଛନ୍ତି ଯେ ମାଲିୱାଲ ରାଜ୍ୟସଭାକୁ ଆପ୍‌ ତରଫରୁ ଯାଇଥିଲେ ମଧ୍ୟ ବିଜେପିର କଥା କହୁଛନ୍ତି। ତାଙ୍କୁ ଟିକେ ଲାଜ ଲାଗିବା କଥା। ସେ ଆପ୍‌ରୁ ଇସ୍ତଫା ଦେଇ ବିଜେପି ତରଫରୁ ରାଜ୍ୟ ସଭା ଯାଆନ୍ତୁ।’’ ଆଜି ସନ୍ଧ୍ୟାରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ୍‌ ଇସ୍ତଫା ଦେବାକୁ ଯାଉଥିବା ବେଳେ ଆପ୍‌ର ଉତ୍ତରାଧିକାରୀ ଭାବରେ ଅତିଶୀଙ୍କ ନାମ ଘୋଷଣା ହୋଇଛି। ଗତ ଶୁକ୍ରବାର ଦିନ ଦିଲ୍ଲୀର ମଦ ନୀତି ମାମଲାରେ ଜାମିନ ପାଇବା ପରେ କେଜ୍ରିୱାଲ ଘୋଷଣା କରିଥିଲେ ଯେ ଯେପର୍ଯ୍ୟନ୍ତ ଲୋକମାନେ ତାଙ୍କ ଉପରେ ବିଶ୍ୱାସ ନକରନ୍ତି ଏବଂ ଆସନ୍ତା ନିର୍ବାଚନରେ ​​ତାଙ୍କ ଦଳକୁ ପୁଣି ଥରେ ନିର୍ବାଚିତ ନକରନ୍ତି ସେ ପର୍ଯ୍ୟନ୍ତ ସେ ଶୀର୍ଷ ପଦବୀରେ ରହିବେ ନାହିଁ। ସେ ତାଙ୍କର କଥା ରଖି ଅତିଶୀଙ୍କ ନାମ ପରବର୍ତ୍ତୀ ମୁଖ୍ୟମନ୍ତ୍ରୀ ଭାବେ ଘୋଷଣା କରିଛନ୍ତି। ତେବେ ଅତିଶୀଙ୍କ ନାମ ଘୋଷଣା ହେବା ପରେ ସ୍ବାତୀ ମାଲିୱାଲ୍‌ ଏକ କଠୋର ମନ୍ତବ୍ୟ ଦେଇଛନ୍ତି। ସେ କହିଛନ୍ତି କି ଆପ୍‌ ପାଇଁ ଦୁଃଖର ଦିନ ଆସିଲା। ଅତିଶୀଙ୍କ ବାପାମାଆ ଆତଙ୍କବାଦୀ ଆଫଜାଲ ଗୁରୁଙ୍କୁ ସାହାଯ୍ୟ କରିଛନ୍ତି।