ଯୁଦ୍ଧ ବିମାନ ଖସି ପଡ଼ିଥିବା ସ୍ୱୀକାର କଲେ ସିଡିଏସ୍…..

ରିପୋର୍ଟ କାର୍ଡ / ନୂଆଦିଲ୍ଲୀ

ପାକିସ୍ତାନ ସହିତ ଯୁଦ୍ଧ ସମୟରେ ହୋଇଥିବା କ୍ଷତିକୁ ନେଇ ଦେଶରେ ରାଜନୀତି ଜାରିରହିଛି। ବିରୋଧୀ ଦଳ ପଚାରୁଛନ୍ତି ଯେ, ଆମର ଯୁଦ୍ଧ ବିମାନ ଖସି ପଡ଼ିଛି କି? ଯଦି ହଁ, ତେବେ କେତେ ଯୁଦ୍ଧ ବିମାନ ଖସିଛି? ଯଦିଓ ସରକାର ଏହି ପ୍ରଶ୍ନର ଉତ୍ତର ଦେଇ ନାହାନ୍ତି। ମାତ୍ର ଜଣେ ବରିଷ୍ଠ ଭାରତୀୟ ସେନା ଅଧିକାରୀ ପ୍ରଥମ ଥର ପାଇଁ ସାର୍ବଜନୀନ ଭାବରେ ସ୍ୱୀକାର କରିଛନ୍ତି ଯେ, ଅପରେସନ ସିନ୍ଦୂର ସମୟରେ ଭାରତୀୟ ଜେଟ୍ ଖସାଇ ଦିଆଯାଇଛି। ତଥାପି, ସେ କେତେ ବିମାନ ଦୁର୍ଘଟଣାଗ୍ରସ୍ତ ହୋଇଛି ତାହା କହି ନାହାନ୍ତି। ଭାରତୀୟ ସେନା ମୁଖ୍ୟ ସିଡିଏସ୍ ଜେନେରାଲ ଅନିଲ ଚୌହାନ ସିଙ୍ଗାପୁରରେ ବ୍ଲୁମବର୍ଗକୁ ଏକ ସାକ୍ଷାତକାର ଦେଇଛନ୍ତି। ଏହି ସାକ୍ଷାତକାରରେ ଏକ ପ୍ରଶ୍ନର ଉତ୍ତରରେ ସେ କହିଛନ୍ତି, ପ୍ରକୃତ ପ୍ରସଙ୍ଗ ଏହା ନୁହେଁ ଯେ, ବିମାନଗୁଡ଼ିକ ଦୁର୍ଘଟଣାଗ୍ରସ୍ତ ହୋଇଥିଲା, ବରଂ ପ୍ରଶ୍ନ ହେଉଛି, ସେଗୁଡିକ କାହିଁକି ଦୁର୍ଘଟଣାଗ୍ରସ୍ତ ହୋଇଥିଲେ। ଆମେ ଏଥିରୁ କ’ଣ ଶିଖିଲୁ। ସିଡିଏସ୍ ଅନିଲ ଚୌହାନ କହିଛନ୍ତି ଯେ, ଭାରତ-ପାକିସ୍ତାନ ଯୁଦ୍ଧ ସମୟରେ ଆମେ ଆମର ଭୁଲ୍‌କୁ ସ୍ୱୀକାର କରିଥିଲୁ ଏବଂ ବହୁତ କିଛି ଶିଖିଥିଲୁ। ତାଙ୍କ ଉତ୍ତର ଶୁଣି ଏପରି ଲାଗିଥିଲା ଯେପରି ଭାରତୀୟ ଜେଟ୍ ବିମାନଗୁଡ଼ିକ ଏୟାରଷ୍ଟ୍ରାଇକ୍ ସମୟରେ ହିଁ ଖସି ପଡ଼ିଛି। କାରଣ ସେ କହିଥିଲେ ଯେ, ଆମେ ଆମର ଭୁଲ୍ ସଂଶୋଧନ କରିଥିଲୁ ଏବଂ ଦୁଇ ଦିନ ମଧ୍ୟରେ ଉପଯୁକ୍ତ ଉତ୍ତର ଦେଇଥିଲୁ। ଦୂର ଦୂରାନ୍ତ ଶତ୍ରୁ ସ୍ଥାନଗୁଡ଼ିକୁ ଟାର୍ଗେଟ କରି ଏକ ପ୍ରଭାବଶାଳୀ ଜବାବ ଦିଆଯାଇଥିଲା। ଉଲ୍ଲେଖନୀୟ ଯେ, ଭାରତ ପାକିସ୍ତାନର ଅନେକ ବଡ଼ ସହରରେ ଅବସ୍ଥିତ ସାମରିକ ଘାଟିକୁ ଟାର୍ଗେଟ କରି ବିପୁଳ କ୍ଷତି କରିଥିଲା। ଯେତେବେଳେ ତାଙ୍କୁ ପଚରାଗଲା ଯେ, ପାକିସ୍ତାନ ଦ୍ବାରା ୬ଟି ଭାରତୀୟ ବିମାନ ଖସାଇ ଦେବାର ଦାବି ସତ୍ୟ କି? ସେ ଏହାକୁ ସମ୍ପୂର୍ଣ୍ଣ ଭୁଲ୍ ବୋଲି କହି ଖଣ୍ଡନ କରିଥିଲେ। ଜେନେରାଲ ଚୌହାନ ଏହା ମଧ୍ୟ ସ୍ପଷ୍ଟ କରିଥିଲେ ଯେ, ଏହି ଯୁଦ୍ଧରେ କେବେ ବି ପରମାଣୁ ଅସ୍ତ୍ର ବ୍ୟବହାରର ଆବଶ୍ୟକତା ନଥିଲା, ଯାହା ଆଶ୍ୱସ୍ତିର ବିଷୟ। ଭାରତ ପକ୍ଷରୁ ଦାବି କରାଯାଇଥିଲା ଯେ, ପାକିସ୍ତାନର ମେଡ୍ ଇନ୍ ଆମେରିକା ଏବଂ ମେଡ୍ ଇନ୍ ଚାଇନା ଲଢୁଆ ବିମାନକୁ ଖସାଇ ଦିଆଯାଇଛି। ଯଦିଓ କେହି ଏହାକୁ ଆନୁଷ୍ଠାନିକ ଭାବରେ ନିଶ୍ଚିତ କରିନାହାନ୍ତି। ଏହି ସମୟରେ, ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫ ଦାବି କରିଥିଲେ ଯେ, ପାକିସ୍ତାନ ଭାରତର ୬ଟି ଲଢ଼ୁଆ ବିମାନକୁ ଖସାଇ ଦେଇଛି, ଯାହାକୁ ସିଡିଏସ୍ ଅସ୍ୱୀକାର କରିଥିଲେ, କିନ୍ତୁ ଏହି ପ୍ରସଙ୍ଗରେ ସରକାର ଏବଂ ବିରୋଧୀ ମୁହାଁମୁହିଁ ଅଛନ୍ତି। ପ୍ରଥମ ଥର ପାଇଁ, ଜଣେ ଉଚ୍ଚ ସେନା ଅଧିକାରୀଙ୍କ ଠାରୁ ଏକ ବିବୃତି ଆସିଛି ଏବଂ ସେ ଜେଟ୍ ଖସି ପଡ଼ିଥିବା ସ୍ୱୀକାର କରିଛନ୍ତି।