କଂଗ୍ରେସ ଭବନରେ ଭଙ୍ଗାରୁଜା…..

ରିପୋର୍ଟ କାର୍ଡ / ଭୁବନେଶ୍ୱର

ରାଜ୍ୟ କଂଗ୍ରେସରେ ବିବାଦ ଥମିବାର ନାଁ ନେଉନାହିଁ । କଂଗ୍ରେସ ପ୍ରତି ଲୋକଙ୍କ ଆସ୍ଥା କମୁଥିବା ବେଳେ ଅନ୍ୟପଟେ କଂଗ୍ରେସ କର୍ମୀଙ୍କ ଆଚରଣ ଦଳକୁ ଆହୁରି ତଳକୁ ନେଇଯାଉଛି । ଆଜି ସକାଳେ ଯୁବ କଂଗ୍ରେସ ଅଫିସ ତାଲା ଭାଙ୍ଗି କିଛି ଯୁବକ ଭଙ୍ଗାରୁଜା କରିଥିବା ବେଳେ ପୁଣି ସନ୍ଧ୍ୟାରେ କଂଗ୍ରେସ ଭବନରେ ପିସିସି ସଭାପତିଙ୍କ କାର୍ଯ୍ୟାଳୟ ଆଗରେ ଭଙ୍ଗାରୁଜା ହୋଇଥିବା ଦେଖିବାକୁ ମିଳିଛି । ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ନେମ୍ ପ୍ଲେଟ ଭାଙ୍ଗି ଦେଇଥିବା ବେଳେ ତାଙ୍କ ଚ୍ୟାମ୍ବର ସାମ୍ନାରେ ଅନେକ ଚେୟାର ମଧ୍ୟ ଭାଙ୍ଗାରୁଜା ହୋଇଛି । ଖାଲି ସେତିକି ନୁହେଁ ମହିଳା କଂଗ୍ରେସ ସଭାନେତ୍ରୀଙ୍କ ନେମ୍ ପ୍ଲେଟ ବି ଭାଙ୍ଗି ଦେଇଥିବା ଦେଖାଯାଇଛି । ତେବେ ଏହି ଭଙ୍ଗାରୁଜା କରିଥିବା ଯୁବକମାନେ କିଏ, ତାଙ୍କ ପଛରେ କିଏ ରହିଛନ୍ତି ତାହା କାହାରିକୁ ଜଣାନାହିଁ । ସେମାନଙ୍କୁ ଏବେ ସୁଦ୍ଧା ଚିହ୍ନଟ ମଧ୍ୟ ହୋଇନାହିଁ ।
ତେବେ ସକାଳେ ଯୁବ କଂଗ୍ରେସ ଅଫିସ ତାଲା ଭାଙ୍ଗି କିଛି ଯୁବକ ଭଙ୍ଗାରୁଜା କରିଥିଲେ । ଅଫିସ୍ ଭିତରେ ଥିବା ଚେୟାର, ଟେବୁଲ, ଆସବାବପତ୍ର ଭାଙ୍ଗି ଦେଇଥିଲେ। । ଭଙ୍ଗାରୁଜା ପରେ ଘଟଣାସ୍ଥଳରୁ ଯୁବକମାନେ ଚମ୍ପଟ ମାରିଥିଲେ । କାହିଁକି ଏଭଳି ଭଙ୍ଗାରୁଜା ହେଲା ସେ ସମ୍ପର୍କରେ କୌଣସି ସୂଚନା ମିଳିପାରିନି ।