ଇଭିଏମ୍‌ ନେଇ କଂଗ୍ରେସର ଅଭିଯୋଗକୁ ନିର୍ବାଚନ କମିସନଙ୍କ ଖଣ୍ଡନ……

ରିପୋର୍ଟ କାର୍ଡ / ନୂଆଦିଲ୍ଲୀ

ହରିୟାଣା ବିଧାନସଭା ନିର୍ବାଚନରେ ବ୍ୟବହୃତ ଇଭିଏମ୍‌ର ବ୍ୟାଟେରି ନେଇ କଂଗ୍ରେସ ଦଳ ଅଭିଯୋଗ ଆଣିଥିବା ବେଳେ ଏହାକୁ ନିର୍ବାଚନ କମିସନ ଖଣ୍ଡନ କରିଛନ୍ତି। ଇଭିଏମ୍‌ ବ୍ୟାଟେରି ଏକ କାଲ୍‌କୁଲେଟର ଭଳି ବୋଲି ନିର୍ବାଚନ କମିସନ ମଙ୍ଗଳବାର କହିଛନ୍ତି ଏବଂ ମେସିନ୍‌ଗୁଡ଼ିକରେ ପେଜର୍ ଭଳି ତ୍ରୁଟି ହୋଇପାରେ ବୋଲି କଂଗ୍ରେସ କରିଥିବା ଅଭିଯୋଗକୁ ଖଣ୍ଡନ କରିଛନ୍ତି। ହରିୟାଣାର ବିଭିନ୍ନ ମତଦାନ କେନ୍ଦ୍ରରେ ଇଭିଏମ୍‌ ବ୍ୟାଟେରି ସ୍ତର ଭିନ୍ନ ଭିନ୍ନ ହେବା ନିର୍ବାଚନ ଫଳାଫଳକୁ ପ୍ରଭାବିତ କରିଛି ବୋଲି କଂଗ୍ରେସ ଅଭିଯୋଗ ଆଣିଥିବାରୁ ନିର୍ବାଚନ ଆୟୋଗ ଏହି ସ୍ପଷ୍ଟୀକରଣ ଦେଇଛନ୍ତି। ମହାରାଷ୍ଟ୍ର ଏବଂ ଝାଡ଼ଖଣ୍ଡ ନିର୍ବାଚନ ପାଇଁ ନିର୍ବାଚନ କାର୍ଯ୍ୟସୂଚୀ ଘୋଷଣା କରି ମୁଖ୍ୟ ନିର୍ବାଚନ କମିସନର ରାଜୀବ କୁମାର ଇଭିଏମ୍ ବ୍ୟବହାରକୁ ସମର୍ଥନ କରି କହିଛନ୍ତି ଯେ ଏହା ସମ୍ପୂର୍ଣ୍ଣ ସୁରକ୍ଷିତ ଏବଂ ସବୁ ଦୃଷ୍ଟିରୁ ଉତ୍ତମ ପ୍ରମାଣିତ ହୋଇଛି। ବିଗତ ୧୫-୨୦ ନିର୍ବାଚନରେ ଭିନ୍ନ ଭିନ୍ନ ଫଳାଫଳକୁ ଦର୍ଶାଇ ସେ କହିଛନ୍ତି ଯେ ଏହା ମେସିନ୍‌ରେ ତ୍ରୁଟିକୁ ସୂଚାଉନାହିଁ ବରଂ ଭୋଟର୍‌ଙ୍କ ପସନ୍ଦକୁ ପ୍ରତିଫଳିତ କରୁଛି। ରାଜୀବ କୁମାର କହିଛନ୍ତି, ଇଭିଏମ୍‌ରେ ମୋବାଇଲ୍ ବ୍ୟାଟେରି ନୁହେଁ, କାଲକୁଲେଟର ବ୍ୟାଟେରି ଭଳି ‘ସିଙ୍ଗଲ୍ ୟୁଜ୍ ବ୍ୟାଟେରି’ ରହିଛି। ଇସ୍ରାଏଲ ଆତଙ୍କବାଦୀ ସଂଗଠନ ହେଜବୁଲ୍ଲାର ପେଜର୍ ହ୍ୟାକ୍ କରିବା ଭଳି ଇଭିଏମ୍‌ରେ ଜାଲିଆତି ହୋଇପାରେ ବୋଲି କଂଗ୍ରେସ ନେତା ରସିଦ୍ ଆଲଭି କରିଥିବା ଦାବିକୁ ମଧ୍ୟ ମୁଖ୍ୟ ନିର୍ବାଚନ କମିସନର ଖଣ୍ଡନ କରିଛନ୍ତି। ସିଇସି କହିଛନ୍ତି ଯେ ଇଭିଏମ୍‌ରେ ବ୍ୟାଟେରି ସମେତ ତିନିସ୍ତରୀୟ ସୁରକ୍ଷା ବ୍ୟବସ୍ଥା ରହିଛି। ମତଦାନ ହେବାର ୫ରୁ ୬ ମାସ ପୂର୍ବରୁ ଇଭିଏମ୍‌ର ପ୍ରଥମ ପର୍ଯ୍ୟାୟ ଯାଞ୍ଚ ଆରମ୍ଭ ହୋଇଥାଏ। ମତଦାନ ହେବାର ୫-୬ ଦିନ ପୂର୍ବରୁ ଇଭିଏମ୍ କାର୍ଯ୍ୟକ୍ଷମ ହୋଇଥାଏ। ସେହିଦିନ ଏକ ନୂଆ ବ୍ୟାଟେରି ଲଗାଯାଏ ବୋଲି ରାଜୀବ କୁମାର କହିଛନ୍ତି। ମେସିନ୍ ସିଲ୍ ହେବା ପରେ ରାଜନୈତିକ ଦଳର ଏଜେଣ୍ଟମାନେ ଇଭିଏମ୍ ଓ ବ୍ୟାଟେରିରେ ଦସ୍ତଖତ କରନ୍ତି। ଏହାପରେ ଇଭିଏମ୍‌ଗୁଡ଼ିକୁ ଷ୍ଟ୍ରଙ୍ଗ୍ ରୁମ୍‌କୁ ନିଆଯାଇ ଏଜେଣ୍ଟଙ୍କ ସମ୍ମୁଖରେ ଡବଲ୍ ଲକ୍ କରାଯାଇଥାଏ। ସମଗ୍ର ପ୍ରକ୍ରିୟାର ଭିଡିଓଗ୍ରାଫି କରାଯାଇଛି ବୋଲି ମୁଖ୍ୟ ନିର୍ବାଚନ କମିସନର କହିଛନ୍ତି।