୧୯ ବର୍ଷରୁ କମ ଭାରତୀୟ ଟିମ୍‌ର ପୂର୍ବତନ ଅଧିନାୟକ ଅଭି ବାରୋଟଙ୍କ ପରଲୋକ…..

ରିପୋର୍ଟ କାର୍ଡ / ନୂଆଦିଲ୍ଲୀ

୧୯ ବର୍ଷରୁ କମ ଭାରତୀୟ ଟିମ୍‌ର ପୂର୍ବତନ ଅଧିନାୟକ ଅଭି ବାରୋଟଙ୍କ ଅକାଳ ବିୟୋଗ ଘଟିଛି । ଅଧାରେ ରହିଯାଇଛି ଭାରତ ପାଇଁ ଖେଳିବାକୁ ସ୍ୱପ୍ନ । ମାତ୍ର ୨୯ ବର୍ଷ ବୟସରେ ହୃଦଘାତରେ ଅଭିଙ୍କର ପରଲୋକ ହୋଇଛି । ଅଣ୍ଡର -୧୯ ଦଳର ସେ ଅଧିନାୟକ ଥିଲେ ଓ ସୌରାଷ୍ଟ୍ର ପାଇଁ ଘରୋଇ ମ୍ୟାଚ୍ ଖେଳୁଥିଲେ | ଏହି ବର୍ଷ ସେ ସୟଦ ମୁସ୍ତାକ ଅଲି ଟ୍ରଫିରେ ମଧ୍ୟ ଏକ ଶତକ ହାସଲ କରିଥିଲେ | ଦିନଥିଲା ସେ ୧୯ ବର୍ଷରୁ କମ ଭାରତୀୟ ଟିମ୍‌ର କ୍ୟାପଟେନ ଥିଲେ । ହେଲେ ଭାରତର ସିନିୟର ଟିମ୍‌ରେ ଖେଳିବା ପୂର୍ବରୁ ତାଙ୍କର ଜୀବନ ଦୀପ ଲିଭିଯାଇଛି ।

ଅଭିଙ୍କ ମୃତ୍ୟୁ ସମ୍ପର୍କରେ ସୌରାଷ୍ଟ୍ର କ୍ରିକେଟ ଆସୋସିଏସନ ସୂଚନା ଦେଇଛି । ଅଭିଙ୍କ ଅକାଳ ବିୟୋଗରେ ପୂରା ସୌରାଷ୍ଟ୍ର କ୍ରିକେଟ ଆସୋସିଏସନ ସ୍ତବ୍ଧ ହୋଇ ଯାଇଛି । ହୃଦଘାତ ଯୋଗୁ ଅକ୍ଟୋବର ୧୫ ତାରିଖ ସନ୍ଧ୍ୟାରେ ତାଙ୍କର ମୃତ୍ୟୁ ଘଟିଛି । ହୃଦଘାତ ପରେ ତାଙ୍କୁ ହସ୍ପିଟାଲ ନିଆଯାଇଥିଲା । କିନ୍ତୁ ସେଠାରେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ । ଦୁଃଖର କଥା ହେଲା କି ଅଭି ଙ୍କ ପତ୍ନୀ ନିଧୀ ବର୍ତ୍ତମାନ ୪ ମାସର ଗର୍ଭବତୀ ଓ ବିଧବା ମା’ ଅଛନ୍ତି। ଅଭିଙ୍କ ବାପାଙ୍କର ମଧ୍ୟ କିଛି ବର୍ଷ ପୂର୍ବେ ୪୦ ବର୍ଷ ବୟସରେ ଦୃଦଘାତରେ ପରଲୋକ ହୋଇଥିଲା।