ହୋଟେଲ ଚେକ୍‌-ଇନ୍‌ରେ ବଦଳିବ ନିୟମ!…..

ରିପୋର୍ଟ କାର୍ଡ / ଭୁବନେଶ୍ୱର

ହୋଟେଲରେ ରହିବା ପାଇଁ ଚେକ୍‌-ଇନ୍‌ ସମୟରେ ଆଧାର ଫଟୋକପି, ପରିଚୟପତ୍ର ଓ ଫଟୋ ଦେବା ପ୍ରକ୍ରିୟାରେ ଖୁବ୍‌ଶୀଘ୍ର ପରିବର୍ତ୍ତନ ଆସିପାରେ। ଯାତ୍ରୀମାନଙ୍କ ପାଇଁ ପରିଚୟ ଯାଞ୍ଚ ପ୍ରକ୍ରିୟାକୁ ଅଧିକ ସହଜ ଓ ଡିଜିଟାଲ୍‌ କରିବା ଦିଗରେ ପଦକ୍ଷେପ ନିଆଯାଉଛି। ଏହା ଫଳରେ ହୋଟେଲ ଚେକ୍‌-ଇନ୍‌ ସମୟରେ ଡକ୍ୟୁମେଣ୍ଟର ଫଟୋକପି ଦେବାର ଆବଶ୍ୟକତା ହ୍ରାସ ପାଇବ ବୋଲି ଆଶା କରାଯାଉଛି। ନୂଆ ବ୍ୟବସ୍ଥାରେ ହୋଟେଲଗୁଡ଼ିକ ଅତିଥିଙ୍କ ପରିଚୟ ଯାଞ୍ଚ ପାଇଁ QR କୋଡ୍‌ ଏବଂ OTP ଭିତ୍ତିକ ଡିଜିଟାଲ୍‌ ପଦ୍ଧତି ବ୍ୟବହାର କରିପାରିବେ। ଏହା ମାଧ୍ୟମରେ ଅତିଥିଙ୍କ ପରିଚୟ ଡିଜିଟାଲ୍‌ ଭାବେ ଯାଞ୍ଚ କରାଯାଇପାରିବ। ଫଳରେ ଚେକ୍‌-ଇନ୍‌ ପ୍ରକ୍ରିୟା ଶୀଘ୍ର ହେବା ସହ କାଗଜପତ୍ର ନିର୍ଭରତା ମଧ୍ୟ କମିବ।ବର୍ତ୍ତମାନ ଅନେକ ହୋଟେଲରେ ଚେକ୍‌-ଇନ୍‌ ସମୟରେ ଆଧାର କିମ୍ବା ଅନ୍ୟ ପରିଚୟପତ୍ରର ଫଟୋକପି ମଗାଯାଉଛି। ହଠାତ୍‌ ଯାତ୍ରା କରୁଥିବା ଲୋକଙ୍କ ପାଖରେ ଫଟୋକପି ନଥିଲେ ଚେକ୍‌-ଇନ୍‌ ସମୟରେ ସମସ୍ୟା ଉପୁଜୁଛି। ଡିଜିଟାଲ୍‌ ଯାଞ୍ଚ ବ୍ୟବସ୍ଥା ଲାଗୁ ହେଲେ ଏଭଳି ଅସୁବିଧା ଅନେକ ମାତ୍ରାରେ କମିପାରିବ।ପରିଚୟ ଯାଞ୍ଚକୁ ସରଳ କରିବା ସହ ଡିଜିଟାଲ୍‌ ପଦ୍ଧତିକୁ ପ୍ରୋତ୍ସାହନ ଦେବା ଦିଗରେ UIDAI କାର୍ଯ୍ୟ କରୁଛି।ଡିଜିଟାଲ୍‌ ମାଧ୍ୟମରେ ପରିଚୟ ଯାଞ୍ଚ ବଢ଼ିଲେ କାଗଜପତ୍ର ବ୍ୟବହାର କମିବା ସହ ହୋଟେଲ ଚେକ୍‌-ଇନ୍‌ ପ୍ରକ୍ରିୟା ମଧ୍ୟ ଅଧିକ ସୁବିଧାଜନକ ହୋଇପାରିବ।