ଜୀଅନ୍ତା ଜଳିଗଲେ ଆଇନଜୀବୀ….

ରିପୋର୍ଟ କାର୍ଡ / ଭୁବନେଶ୍ୱର

ମଞ୍ଚେଶ୍ବର ଥାନା ଅଧୀନ ପାଣ୍ଡରା ଅଞ୍ଚଳରେ ପାରିବାରିକ କଳହକୁ ନେଇ ଜଣେ ଆଇନଜୀବୀ ନିଜ ଦେହରେ ପେଟ୍ରୋଲ ଢାଳି ଆତ୍ମହତ୍ୟା କରିଛନ୍ତି। ସେ ହେଲେ ଦୀପକ କୁମାର ସାହୁ। ଘଟଣାସ୍ଥଳରେ ସାଇଣ୍ଟିଫିକ ଦଳ ଓ ସ୍ଥାନୀୟ ପୋଲିସ ପହଞ୍ଚି ତନାଘନା କରୁଛନ୍ତି। ମଞ୍ଚେଶ୍ବର ଥାନା ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ କରୁଛି। ପାରିବାରିକ କଳହରୁ ଦୀପକ ନିଜ ଦେହରେ ନିଆଁ ଲଗାଇ ଆତ୍ମହତ୍ୟା କରିଥିବା ପୋଲିସର ପ୍ରାଥମିକ ଅନୁସନ୍ଧାନରୁ ଜଣାପଡ଼ିଛି।ପୋଲିସ ସୂଚନା ଅନୁଯାୟୀ, ଦୀପକ ପେସାରେ ଜଣେ ଆଇନଜୀବୀ। ସନ୍ଧ୍ୟା ପୂର୍ବରୁ ସେ ଘରେ ପହଞ୍ଚିଥିଲେ। କୌଣସି କଥାକୁ ନେଇ ଘରେ କଳହ ଆରମ୍ଭ ହୋଇଥିଲା। ପରେ ସେ ଛାତ ଉପରକୁ ଯାଇ ଏକ କୋଠରି ଭିତରେ ନିଜ ଦେହରେ ପେଟ୍ରୋଲି ଢ଼ାଳି ନିଆଁ ଲଗାଇ ଦେଇଥିଲେ। ତାଙ୍କ ଶରୀର ପୋଡ଼ିଯାଇଛି। ପରିବାର ଲୋକେ ମଞ୍ଚେଶ୍ବର ଥାନାକୁ ଜଣାଇବା ପରେ ପୋଲିସ ପହଞ୍ଚି ମୃତଦେହ ଜବତ କରି ଶବ ବ୍ୟବଚ୍ଛେଦ ଲାଗି କ୍ୟାପିଟାଲ ହସ୍ପିଟାଲକୁ ପଠାଇଛି। ତାଙ୍କର ଦୁଇ ସନ୍ତାନ ଅଛନ୍ତି। ସେ ପେଟ୍ରୋଲ କେଉଁଠୁ ଆଣିଲେ, ପାରିବାରିକ କଳହ ନା ଆଉ ଅନ୍ୟ କିଛି କାରଣ ରହିଛି, ସେଦିଗରେ ପୋଲିସ ଅନୁସନ୍ଧାନ କରୁଛି।