ମୋ ବିରୋଧରେ ସଂସଦରେ କୁହାଯାଇଥିବା ଆପତ୍ତିଜନକ ଶବ୍ଦ ହଟାଯାଉ:ରାହୁଲ….

ରିପୋର୍ଟ କାର୍ଡ / ନୂଆଦିଲ୍ଲୀ

କଂଗ୍ରେସ ସାଂସଦ ରାହୁଲ ଗାନ୍ଧି ବୁଧବାର କହିଛନ୍ତି ଯେ ସେ ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଭେଟି ତାଙ୍କ ବିରୋଧରେ ଅପମାନଜନକ ମନ୍ତବ୍ୟ ହଟାଇବାକୁ ଅନୁରୋଧ କରିଛନ୍ତି। ଏହା ପୂର୍ବରୁ ଡିସେମ୍ବର ୫ ତାରିଖରେ ବିଜେପି ସାଂସଦ ନିଶିକାନ୍ତ ଦୁବେ ଓ ସମ୍ବିତ ପାତ୍ର ରାହୁଲ ଓ ଜନୈକ ହଙ୍ଗେରିବାସୀଙ୍କ ମଧ୍ୟରେ ଲିଙ୍କ୍ ଥିବା ଅଭିଯୋଗ କରିଥିଲେ। ସେବେଠାରୁ କଂଗ୍ରେସ ଦଳ ଅସନ୍ତୋଷ ପ୍ରକାଶ କରିଆସୁଛି। ମୁଁ ବାଚସ୍ପତିଙ୍କୁ ଭେଟି ମୋ ବିରୋଧରେ ଅପମାନଜନକ ମନ୍ତବ୍ୟ ହଟାଇବାକୁ କହିଥିଲି। ବାଚସ୍ପତି ଏହା ଉପରେ ଦୃଷ୍ଟି ଦେବେ ବୋଲି କହିଛନ୍ତି। ଆମର ଉଦ୍ଦେଶ୍ୟ ହେଉଛି ଗୃହ ଚାଲିବା ଉଚିତ ଏବଂ ଗୃହରେ ଆଲୋଚନା ହେବା ଉଚିତ୍ । ସେମାନେ ମୋ ବିଷୟରେ ଯାହା ଚାହିଁବେ କହିପାରିବେ, କିନ୍ତୁ ଆମେ ଗୃହରେ ଆଲୋଚନା ଚାହୁଁଛୁ। ଡିସେମ୍ବର ୧୩ରେ ସମ୍ବିଧାନ ଉପରେ ଆଲୋଚନା କରିବାକୁ ନିଷ୍ପତ୍ତି ନିଆଯାଇଥିଲା, ଏହି ଆଲୋଚନା ହେବା ଉଚିତ୍ । ମୋଦୀ ସରକାର ଚାହୁଁନାହାନ୍ତି ଆଦାନୀଙ୍କୁ ନେଇ ଆଲୋଚନା ହେଉ । ସେମାନେ ଏହି ପ୍ରସଙ୍ଗକୁ ହଟାଇବାକୁ ଚାହୁଁଛନ୍ତି, କିନ୍ତୁ ଆମେ ଏହି ପ୍ରସଙ୍ଗ ଉଠାଇବା ଜାରି ରଖିବୁ। ସେମାନେ ମୋ ଉପରେ ଯେତେ ଅଭିଯୋଗ ଆଣିଲେ ମଧ୍ୟ ଆମେ ଗୃହ ଚଳାଇବାକୁ ଚାହୁଁଛୁ। ସେପଟେ ତୃଣମୂଳ କଂଗ୍ରେସ ସାଂସଦ କଲ୍ୟାଣ ବାନାର୍ଜୀ କହିଛନ୍ତି ଯେ ଗୃହ ବିଜେପି ଏବଂ କଂଗ୍ରେସ ଅନୁଯାୟୀ ଚାଲିଛି। ଏହା କେତେ ଦିନ ଚାଲିବ ତାହା ସେମାନେ ସ୍ଥିର କରନ୍ତି। ଏହା ଠିକ୍‌ ନୁହେଁ। ବିଜେପି ଓ କଂଗ୍ରେସକୁ କହିବାର ଅଧିକ ସୁଯୋଗ ମିଳୁଛି। ଆମକୁ କହିବାର ସୁଯୋଗ ମିଳୁନାହିଁ। ଏହାଦ୍ବାରା ଅନ୍ୟ ରାଜନୈତିକ ଦଳଗୁଡ଼ିକ କ୍ଷତିଗ୍ରସ୍ତ ହେଉଛନ୍ତି।