ତୁରନ୍ତ ରୋକନ୍ତୁ ଏସଆଇଆର୍…..

ରିପୋର୍ଟ କାର୍ଡ / ନୂଆଦିଲ୍ଲୀ

ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଗୁରୁବାର ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କୁ ପତ୍ର ଲେଖି ଅଭିଯୋଗ କରିଛନ୍ତି ଯେ ରାଜ୍ୟରେ ଏସଆଇଆରକୁ ଠିକ୍ ଭାବେ ଚଲାଯାଉନି ଯାହା ନାଗରିକ ଓ ଅଧିକାରୀଙ୍କ ପାଇଁ ବିପଜ୍ଜନକ ହୋଇପାରେ। ସେ ଏହା ମଧ୍ୟ କହିଛନ୍ତି ଯେ ଏସଆଇଆର୍ ପ୍ରକ୍ରିୟା ଚିନ୍ତାଜନକ ଓ ଏହା ବିପଜ୍ଜନକ ସ୍ତରରେ ପହଞ୍ଚିସାରିଛି। ଏସଆଇଆର ପ୍ରକ୍ରିୟାକୁ ରୋକିବା ଉଚିତ୍ ବୋଲି ସେ ଚିଠିରେ ଉଲ୍ଲେଖ କରିଛନ୍ତି।ମମତା କହିଛନ୍ତି ଯେ ସେ ଏସଆଇଆର୍ ପ୍ରକ୍ରିୟାକୁ ନେଇ ବାରମ୍ବାର ନିଜ ଚିନ୍ତା ବ୍ୟକ୍ତ କରିଛନ୍ତି। ସ୍ଥିତି ଜଟିଳ ହେବାରେ ସେ ବାଧ୍ୟ ହୋଇ ମୁଖ୍ୟ ନିର୍ବାଚନ ଆୟୁକ୍ତଙ୍କୁ ଏହି ପତ୍ର ଲେଖିଥିବା କହିଛନ୍ତି। ଏହି ପ୍ରକ୍ରିୟା ଅବ୍ୟବସ୍ଥିତ, ଅସଂଗଠିତ ଏବଂ ଅତି ବିପଜ୍ଜନକ ମଧ୍ୟ। ଏହାର ଢାଞ୍ଚା ଠିକ୍ ନଥିବାରୁ ପ୍ରଥମ ଦିନରୁ ହିଁ ଅଭିଯାନକୁ ପଙ୍ଗୁ କରିଥିବା ମମତା ଲେଖିଛନ୍ତି। ପ୍ରଶିକ୍ଷଣରେ ଅଭାବ ସହିତ ବାଧ୍ୟତାମୂଳକ ଦସ୍ତାବିଜରେ ଅସ୍ପଷ୍ଟତା ଦର୍ଶାଇ ମମତା ଏହାକୁ ଦୁର୍ବଳ ପ୍ରକ୍ରିୟା ବୋଲି କହିଛନ୍ତି। ସେ ଜଳପାଇଗୁଡିରେ ବୁଥ୍-ସ୍ତରୀୟ ଅଧିକାରୀଙ୍କ ରୂପେ ନିୟୋଜିତ ଜଣେ ଅଙ୍ଗନବାଡି କର୍ମୀଙ୍କ ମୃତ୍ୟୁର ଉଦାହରଣ ଦେଇଛନ୍ତି। ତାଙ୍କ ମୃତ୍ୟୁ ପରେ କୁହାଯାଉଛି କି ସେ ଏସଆଇଆର ଯୋଗୁଁ ଚାପଗ୍ରସ୍ତ ହୋଇ ଆତ୍ମହତ୍ୟା କରିଛନ୍ତି। ଏହି ପ୍ରକ୍ରିୟା ଆରମ୍ଭ ପରଠୁ ଅନେକ ନିଜ ଜୀବନ ହରାଇଥିବା ମମତା ଚିଠିରେ ଉଲ୍ଲେଖ କରିଛନ୍ତି। ତେଣୁ ତୁରନ୍ତ ଏହାକୁ ସୁଧାରିବା ପାଇଁ ସେ ଆବେଦନ କରିଛନ୍ତି।