ହିନ୍ଦୁଙ୍କ ଉପରେ ମୁସଲମାନଙ୍କ ଆକ୍ରମଣ…..

ରିପୋର୍ଟ କାର୍ଡ / ନୂଆଦିଲ୍ଲୀ

ବ୍ରିଟେନରେ ହିନ୍ଦୁ ଏବଂ ମୁସଲମାନଙ୍କ ମଧ୍ୟରେ ଉତ୍ତେଜନା ଦେଖାଦେଇଛି। ଅଗଷ୍ଟ ୨୮ ରେ ଭାରତ-ପାକିସ୍ତାନ ଏସିଆ କପ୍‌ ମ୍ୟାଚ୍‌ ପରେ ଇଂଲଣ୍ଡର ଲିସେଷ୍ଟର ସହରର ଦୁଇ ସମ୍ପ୍ରଦାୟ ମଧ୍ୟରେ ଉତ୍ତେଜନା ବଢ଼ିବାରେ ଲାଗିଛି। ଫଳରେ ହିଂସା ଘଟଣା କ୍ରମାଗତ ଭାବେ ସାମ୍ନାକୁ ଆସୁଛି । ହିଂସା ଘଟଣାରେ ଲିସେଷ୍ଟର ପୋଲିସ ଏପର୍ଯ୍ୟନ୍ତ ୨୭ ଜଣଙ୍କୁ ଗିରଫ କରି ଶାନ୍ତି ପାଇଁ ଅନୁରୋଧ କରିଛି। ବ୍ରିଟେନର ଏହି ସହରରେ ଅନେକ ଅଶାନ୍ତି ଏବଂ ବିଶୃଙ୍ଖଳା ଘଟିଛି। ଶନିବାର ପୂର୍ବ ଇଂଲଣ୍ଡର ଲିସେଷ୍ଟରରେ ପୁଣି ଏକ ବିଶୃଙ୍ଖଳା ସୃଷ୍ଟି ହୋଇଛି। ସୋସିଆଲ ମିଡିଆରେ ପ୍ରସାରିତ ରିପୋର୍ଟରେ ଦର୍ଶାଯାଇଛି ଯେ ଏକ ବିରୋଧ ପ୍ରଦର୍ଶନ ଦ୍ୱାରା ଏହି ନୂତନ ହିଂସା ସୃଷ୍ଟି ହୋଇଥିଲା। ଏହାର ଭିଡିଓ ଫୁଟେଜରେ ପୋଲିସ ଭିଡ଼କୁ ଅଟକାଇବାକୁ ଚେଷ୍ଟା କରୁଥିବା ଦେଖାଯାଇଛି। ଏହି ସମୟରେ କାଚ ବୋତଲ ଫିଙ୍ଗି ଯାଇଥିଲା ଏବଂ ରାସ୍ତାରେ କିଛି ଲୋକ ହାତରେ ବାଡି ଧରି ବୁଲୁଥିବାର ଦେଖିବାକୁ ମିଳିଥିଲା ।