ପଶ୍ଚିମବଙ୍ଗରେ ଆଇନ ଛାତ୍ରୀଙ୍କୁ ଗଣବଳାତ୍କାର,ମାମଲା ରୁଜ୍ଜୁ କଲେ ଜାତୀୟ ମହିଳା କମିଶନ….

ରିପୋର୍ଟ କାର୍ଡ / ନୂଆଦିଲ୍ଲୀ

କୋଲକାତାର ଆରଜି କର ମେଡିକାଲ କଲେଜରେ ଜଣେ ଡାକ୍ତର ଛାତ୍ରୀଙ୍କ ସହ ହୋଇଥିବା ବର୍ବରତା ମନରୁ ନ ଲିଭୁଣୁ ପୁଣି ଥରେ ସେଠାରେ ଏକ ଶିକ୍ଷାନୁଷ୍ଠାନରେ ଜଣେ ଛାତ୍ରୀଙ୍କ ସହ ଗଣଦୁଷ୍କର୍ମ ଘଟଣା ସାମ୍ନାକୁ ଆସିଛି। ସହରର ଏକ ଆଇନ କଲେଜରେ ଜଣେ ଛାତ୍ରୀଙ୍କୁ ଗଣବଳାତ୍କାର କରାଯାଇଛି। ଏହି ମାମଲାରେ ଟାଉନ ପୋଲିସ ତିନି ଜଣ ଅଭିଯୁକ୍ତଙ୍କୁ ଗିରଫ କରିଛି। ପୋଲିସ ସୂତ୍ର ଅନୁଯାୟୀ, ଅଭିଯୁକ୍ତଙ୍କ ମଧ୍ୟରେ ଜଣେ ପୂର୍ବତନ ଛାତ୍ରୀ ଏବଂ ସେହି ପ୍ରତିଷ୍ଠାନର ଦୁଇ ଜଣ କର୍ମଚାରୀ ଅଛନ୍ତି। ପୋଲିସ ଅଭିଯୁକ୍ତଙ୍କୁ ପଚରାଉଚରା କରୁଛି।ପୀଡିତା ପୋଲିସକୁ କହିଛନ୍ତି, ଅଭିଯୁକ୍ତମାନେ ତାଙ୍କୁ ଜୁନ ୨୫ ରାତି ୭.୩୦ରୁ ରାତି ୧୦:୫୦ ପର୍ଯ୍ୟନ୍ତ ବଳାତ୍କାର କରିଥିଲେ। ସେ ସହାୟତା ମାଗି ଚାଲିଥିଲେ, କିନ୍ତୁ ରାକ୍ଷସମାନେ ତାଙ୍କୁ ଛାଡ଼ି ନ ଥିଲେ। ପୀଡିତାଙ୍କ ଅଭିଯୋଗ ପରେ ପୋଲିସ ଅଭିଯୁକ୍ତଙ୍କ ଖୋଜାଖୋଜିକୁ ଜୋରଦାର କରିଥିଲା। ଅଭିଯୁକ୍ତମାନଙ୍କୁ ଜୁନ ୨୬ ତାରିଖରେ ଗିରଫ କରାଯାଇଛି। ଅପରାଧ କରିଥିବା ତୃତୀୟ ଅଭିଯୁକ୍ତଙ୍କୁ ଜୁନ ୨୬ ରୁ ୨୭ ତାରିଖ ମଧ୍ୟରେ ରାତି ୧୨:୩୦ ସମୟରେ ପୋଲିସ ଗିରଫ କରିଥିଲା।ପୋଲିସ ସମସ୍ତ ତିନି ଅଭିଯୁକ୍ତଙ୍କୁ ଗିରଫ କରିଛି ଏବଂ ସେମାନଙ୍କ ମୋବାଇଲ ଜବତ କରିଛି। ଅଭିଯୁକ୍ତଙ୍କୁ ପୋଲିସ ହେପାଜତ ଦାବି କରାଯିବ। ଜଣେ ଅଧିକାରୀ କହିଛନ୍ତି, ପୋଲିସ ଅଭିଯୁକ୍ତଙ୍କ ପରିବାରକୁ ମଧ୍ୟ ଥାନାକୁ ଡାକି ଘଟଣା ବିଷୟରେ ପଚାରିଛି। ପୋଲିସ ସୂତ୍ରରୁ ଜଣାପଡିଛି ଯେ ପୀଡିତା ଟାଉନ ଥାନାରେ ପହଞ୍ଚିଥିଲେ। ସେ କଲେଜର ଦୁଇ କର୍ମଚାରୀ ଏବଂ ଜଣେ ପୂର୍ବତନ ଛାତ୍ରୀଙ୍କ ବିରୋଧରେ ଗଣବଳାତ୍କାର ଅଭିଯୋଗ କରିଥିଲେ। ପୀଡିତାଙ୍କ ଅଭିଯୋଗ ଆଧାରରେ, ତାଙ୍କୁ ନ୍ୟାଶନାଲ ମେଡିକାଲ କଲେଜରେ ପରୀକ୍ଷା କରାଯାଇଛି।କଲେଜ ସୂତ୍ରରୁ ଜଣାପଡିଛି ଯେ, ଅଭିଯୁକ୍ତଙ୍କ ମଧ୍ୟରୁ ଜଣେ ପୂର୍ବତନ ଛାତ୍ର। ସେ ୨୦୨୨ ମସିହାରେ ତାଙ୍କର ଡିଗ୍ରୀ ପାଠ୍ୟକ୍ରମ ସମାପ୍ତ କରିଥିଲେ। ସୂତ୍ର ଅନୁଯାୟୀ, ପୀଡିତା ପୋଲିସକୁ କହିଥିଲେ, ତାଙ୍କୁ କଲେଜର ଏକ କୋଠରୀକୁ ଡକାଇ ବଳାତ୍କାର କରାଯାଇଥିଲା। ଅଭିଯୁକ୍ତମାନଙ୍କ ମଧ୍ୟରୁ ଜଣେ ତାଙ୍କୁ ବଳାତ୍କାର କରିଥିଲେ ଏବଂ ଅନ୍ୟମାନେ ମୁଖ୍ୟ ଅଭିଯୁକ୍ତଙ୍କୁ ସାହାଯ୍ୟ କରିଥିଲେ। ଏପଟେ ଗଣଦୁଷ୍କର୍ମ ଘଟଣା ଜଣାପଡିବା ପରେ ଜାତୀୟ ମହିଳା କମିଶନ ନିଜ ଆଡୁ ମାମଲା ରୁଜ୍ଜୁ କରି ସ୍ୱତଃ ତଦନ୍ତ ଆରମ୍ଭ କରିଛନ୍ତି। ମହିଳା କମିଶନ କୋଲକାତାର ପୋଲିସ କମିଶନରଙ୍କୁ ଚିଠି ଲେଖି ଘଟଣା ଉପରେ ଗଭୀର ଚିନ୍ତା ପ୍ରକାଶ କରିଛନ୍ତି। ଆସନ୍ତା ତିନି ଦିନ ମଧ୍ୟରେ ଏକ ବିସ୍ତୃତ କାର୍ଯ୍ୟାନୁଷ୍ଠାନ ରିପୋର୍ଟ ଦାଖଲ କରିବା ଲାଗି ମହିଳା କମିଶନ କୋଲକାତା ପୋଲିସ କମିସନରଙ୍କୁ ନିର୍ଦ୍ଦେଶ ଦେଇଛନ୍ତି।