ପଦ୍ମଶ୍ରୀ ରଜତ କୁମାର କରଙ୍କ ୯୦ ତମ ଜନ୍ମ ଜୟନ୍ତୀ…..

ରିପୋର୍ଟ କାର୍ଡ / ଭୁବନେଶ୍ୱର

ମହାନ୍ ସାରସ୍ଵତ ସାଧକ, ଶିକ୍ଷାବିତ୍, ନାଟ୍ୟକାର, ଅଭିନେତା, ବାଗ୍ମୀ ପ୍ରବଚକ, ଜନାଦୃତ ବକ୍ତା , ପାଲା ସାହିତ୍ୟ ଉପାସକ,ବିଚାରକ, ଅତୁଳନୀୟ ଓଡ଼ିଆ ଭାଷା ସାହିତ୍ୟପ୍ରାଣ, ଭାଷା ଆନ୍ଦୋଳନର ସମର୍ପିତ ସଦସ୍ୟ, ସର୍ବାନ୍ତକରଣରେ ଓଡ଼ିଆ, ବିଶେଷ କରି ଜଗନ୍ନାଥ ସଂସ୍କୃତିର ଅନନ୍ୟ ଉଦଘୋଷକ ବରେଣ୍ୟ ପଦ୍ମଶ୍ରୀ ରଜତ କୁମାର କରଙ୍କ ୯୦ ତମ ଜୟନ୍ତୀ ଅବସରରେ ତାଙ୍କର ଅମୃତ ଅମ୍ଲାନ ସ୍ମୃତି ପ୍ରତି କୋଟି କୋଟି ପ୍ରଣାମ ଜଣାଉଛି । ବରେଣ୍ୟ ରଜତ କର ୧୯୩୩ ମସିହା, ସେପ୍ଟେମ୍ବର ୨ ତାରିଖରେ କଟକ ଜିଲ୍ଲାର ମାହାଙ୍ଗା ଠାରେ ପିତା ବହୁମୁଖି ପ୍ରତିଭାଧର କୁଳମଣି କର ଓ ମାତା ବରେଣ୍ୟା ଇନ୍ଦୁମତୀ ଦେବୀ ଙ୍କ ଔରଷରୁ ପ୍ରଥମ ସନ୍ତାନ ଭାବେ ଜନ୍ମଗ୍ରହଣ କରିଥିଲେ । ସେ ଗ୍ରାମ ଚାଟଶାଳୀ ଠାରୁ ଆରମ୍ଭ କରି ରେଭେନ୍ସା କଲିଜେଟ ସ୍କୁଲ, ରେଭେନ୍ସା ମହାବିଦ୍ୟାଳୟରୁ ଅର୍ଥଶାସ୍ତ୍ର ରେ ସ୍ନାତକୋତର ଶିକ୍ଷା ସମାପ୍ତ କରିଥିଲେ । ଦୀର୍ଘ ୬୦ ବର୍ଷ ଧରି ସେ ଦୂରଦର୍ଶନ (ଟିଭି) ଓ ବେତାର ( ରେଡ଼ିଓ) ରେ ରଥଯାତ୍ରାର ଧାରା ବିବରଣୀ ପ୍ରଦାନ କରି ଓଡ଼ିଶାର ଜନମାନସରେ ଏକ ସ୍ୱତନ୍ତ୍ର ସ୍ଥାନ ଅଧିକାର କରିଥିଲେ । ଉଭୟ ଓଡ଼ିଆ ଓ ଇଂରାଜୀ ଭାଷାରେ ଜଣେ ସୁବକ୍ତା ଭାବେ ତାଙ୍କର ସୁଖ୍ୟାତି ରହିଥିଲା ।

୨୦୨୧ ମସିହାରେ ତାଙ୍କୁ ପଦ୍ମଶ୍ରୀ ପୁରସ୍କାରରେ ପୁରସ୍କୃତ କରାଯାଇଥିଲା । ଏହି କାଳଜୟୀ ସ୍ରଷ୍ଟା ପ୍ରଭୁ ଜଗନ୍ନାଥଙ୍କ ଧର୍ମ ଓ ନୀତିକାନ୍ତି କୁ ନେଇ ଅନେକ ସାହିତ୍ୟ ରଚନା କରି ଯଶୋବନ୍ତ । ତନ୍ମଧ୍ୟରୁ “ଜନ ଜୀବନରେ ଜଗନ୍ନାଥ” ,”ଅନନ୍ୟ ଜଗନ୍ନାଥ ଅନୁଭୁତିରେ”, “ଅନ୍ଧପୁଟୁଳି” , “ଚନ୍ଦନ ହଜୁରୀ “,”ଜଣାଣ ଜଣାଉଛି ଜଗନ୍ନାଥଙ୍କୁ” ,”ବାଇଶି ପାବଚ୍ଛ”, “ବୀର ଚାଖି ଖୁଣ୍ଟିଆ” ,” ଜନମାନସରେ ଭଞ୍ଜ ” ପ୍ରଭୃତି ଅନେକ ସାରସ୍ବତ ସୃଷ୍ଟି ଓଡ଼ିଆ ବାଣୀ ଭଣ୍ଡାରର ଅମୂଲ୍ୟ ସମ୍ପଦ । ଏଠାରେ ପ୍ରସଙ୍ଗକ୍ରମେ ଉଲ୍ଲେଖଯୋଗ୍ୟ ଯେ ବରେଣ୍ୟ ରଜତ କର ଜଣେ ଶିକ୍ଷାବିତ୍ ଭାବରେ ଓଡ଼ିଶା ସରକାରଙ୍କ ଶିକ୍ଷା ବିଭାଗରେ ଦୀର୍ଘଦିନ ଧରି କାମ କରିଥିଲେ ଏବଂ ଏସସିଇଆଇଟିର ନିର୍ଦ୍ଦେଶକ ଭାବେ ଚାକିରିରୁ ଅବସର ଗ୍ରହଣ କରିଥିଲେ । ସେ ଆକାଶ ବାଣୀର ବିଭିନ୍ନ କାର୍ଯ୍ୟକ୍ରମରେ ଅଭିନୟ କରିବା ସହିତ ଅନେକ ନାଟକ ମଧ୍ୟ ରଚନା କରିଥିଲେ ।

ବାଦୀପାଲାରେ ସେ ବିଚାରକ ଭାବରେ କାର୍ଯ୍ୟ କରିବା ସହିତ ଏବଂ ଅନ୍ୟ ଏକ କାର୍ଯ୍ୟକ୍ରମ ବୈଦେହୀଶ ବିଳାସରେ ଉପେନ୍ଦ୍ର ଭଞ୍ଜଙ୍କ କାବ୍ୟ ବୈଦେହୀଶ ବିଳାସର ଉପସ୍ଥାପନା କରୁଥିଲେ ।୧୯୮୧ ମସିହାରେ ସେ ଓଡ଼ିଆ ଚଳଚ୍ଚିତ୍ର ଉଲ୍‌କାରେ ଅଭିନୟ କରିଥିଲେ । ଯାହା ଥିଲା ତାଙ୍କ ଜୀବନର ପ୍ରଥମ ଓ ଶେଷ ଅଭିନୀତ ଚଳଚ୍ଚିତ୍ର । ତାଙ୍କ ଅଜାଣତରେ ତାଙ୍କର କିଛି ଦୃଶ୍ୟ ଏହି କଥାଚିତ୍ରଟିରେ ଯୋଡ଼ାଯାଇଥିବାରୁ ସେ ଅସନ୍ତୋଷ ପ୍ରକାଶ କରିବା ସହିତ ଅଭିନୟ ଜଗତରୁ ନିଜକୁ ଦୂରେଇ ରଖିଥିଲେ ।