ଅଫିସ ଭିତରେ ମଦ ପିଇ ନିଲମ୍ବିତ ଅବକାରୀ ବିଭାଗର ଏସଆଇ…..

ରିପୋର୍ଟ କାର୍ଡ / କେନ୍ଦ୍ରାପଡ଼ା

ଅବକାରୀ ବିଭାଗର ଏସଆଇଙ୍କୁ ଅଫିସ ଭିତରେ ମଦ ପିଇବା ମହଙ୍ଗା ପଡିଛି | କେନ୍ଦ୍ରାପଡା ଅବକାରୀ ବିଭାଗର ସବ୍ ଇନ୍ସପେକ୍ଟର ସରୋଜ ବାଗ ଅଫିସ ଭିତରେ ମଦ ପିଉଥିବାର ଭିଡିଓ ଭାଇରାଲ୍ ହେବାପରେ ନିଲମ୍ବିତ ହୋଇଛନ୍ତି |  ଅବକାରୀ ବିଭାଗର କମିଶନର ସରୋଜ ବାଗଙ୍କୁ ନିଲମ୍ବିତ କରିଛନ୍ତି ବୋଲି ମଙ୍ଗଳବାର ଅବକାରୀ ବିଭାଗ ସୁପରିଟେଣ୍ଡେଣ୍ଟ ରଜତ ପ୍ରହରାଜ ସୂଚନା ଦେଇଛନ୍ତି | ଉଲ୍ଲେଖଯୋଗ୍ୟ ଯେ, ଅଫିସ ଭିତରେ ବସି ମଦ୍ୟପାନ କରୁଥିଲେ ଅବକାରୀ ଅଧିକାରୀ । ଟେବୁଲ ଉପରେ ଥୁଆ ହୋଇଥିଲା ମଦ ଆଉ ଗ୍ଲାସ୍ । ଆଉ ଚେୟାରରେ ରାଜକୀୟ ଢଙ୍ଗରେ ମଦ୍ୟପାନ କରୁଥିଲେ । ଏଭଳି ଏକ ଭିଡିଓ କେନ୍ଦ୍ରାପଡାରେ ଭାଇରାଲ ହେବାରେ ଲାଗିଥିଲା । ଭିଡିଓରେ ଥିଲେ କେନ୍ଦ୍ରାପଡା ଜିଲ୍ଲା ଅବକାରୀ ବିଭାଗର ସବ୍ ଇନ୍ସପେକ୍ଟର ସରୋଜ ବାଗ । ବାବୁ ଜଣଙ୍କ ଦୀର୍ଘ ଦିନ ହେବ ଜିଲ୍ଲା ଅଫିସରେ ନିଜର ପତିଆରା ଜାହିର କରିଆସୁଥିଲେ । ସରୋଜ ବାଗ ଖସିରେ ଅଫିସ ଭିତରେ ମଦ ପିଉଥିଲେ | ଏ ଖୁସି ହେବାର କାରଣ ବି ଜାଣିଲେ ଆପଣ ବି ଆଶ୍ଚର୍ଯ୍ୟ ହେବେ ଗତ ସୋମବାର ବାବୁ ଜଣଙ୍କ ଜଣେ ଚୋରା ମଦ ବେପାରୀକୁ କାବୁ କରିଥିଲେ ଆଉ ଜବତ ମଦର ପରିମାଣ ୩୬ ଲିଟରରୁ ଉର୍ଦ୍ଧ୍ବ ଥିଲା । ତେବେ ଖାତା କଲମରେ ୩୦ ଲିଟର ଦେଖାଇବେ ବୋଲି ବାବୁ ଜଣଙ୍କ କହୁଥିବାର ଶୁଣିବାକୁ ମିଳିଥିଲା । ତେବେ ଏଭଳି ଅଫିସରଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ତାଙ୍କୁ ଚାକିରୀରୁ ସସପେଣ୍ଡ କରାଯାଇଥିବା ସୂଚନା ମିଳିଛି ।