ପାକିସ୍ତାନର ପ୍ରଧାନମନ୍ତ୍ରୀ ପ୍ରାର୍ଥୀ ଶେହ୍‌ବାଜ୍‌…..

ରିପୋର୍ଟ କାର୍ଡ / ନୂଆଦିଲ୍ଲୀ

‘ପାକିସ୍ତାନ ମୁସଲିମ୍‌ ଲିଗ୍‌-ନୱାଜ୍‌’ ଦଳର ଅଧ୍ୟକ୍ଷ ଶେହ୍‌ବାଜ୍‌ ଶରିଫ୍‌ଙ୍କୁ ପାକିସ୍ତାନର ପ୍ରଧାନମନ୍ତ୍ରୀ ପ୍ରାର୍ଥୀ ମନୋନୀତ କରାଯାଇଛି | ଏ ସଂକ୍ରାନ୍ତରେ ‘ଏକ୍ସ୍‌’ କରି ‘ପାକିସ୍ତାନ ମୁସଲିମ୍‌ ଲିଗ୍-ନୱାଜ୍‌’ର ମୁଖପାତ୍ରୀ ମରିୟମ୍‌ ଔରଙ୍ଗ୍‌ଜେବ୍‌ କହିଛନ୍ତି | ୭୪ ବର୍ଷିୟ ‘ପିଏମ୍‌ଏଲ୍‌-ଏନ୍‌’ ମୁଖ୍ୟ ନୱାଜ୍‌ ଶରିଫ୍‌ ତାଙ୍କ ୭୨ ବର୍ଷିୟ ସାନଭାଇ ଶେହ୍‌ବାଜ୍‌ ଶରିଫ୍‌ଙ୍କୁ ପ୍ରଧାନମନ୍ତ୍ରୀ ପ୍ରାର୍ଥୀ ଓ ନିଜ ୫୦ ବର୍ଷୀୟା ଝିଅ ମାରିୟମ୍‌ଙ୍କୁ ପଞ୍ଜାବ ପ୍ରଦେଶର ପ୍ରଧାନମନ୍ତ୍ରୀ ପ୍ରାର୍ଥିନୀ ଭାବେ ମନୋନୀତ କରିଛନ୍ତି। ସେ ଆହୁରି ମଧ୍ୟ କହିଛନ୍ତି, ପରବର୍ତ୍ତୀ ସରକାର ଗଢ଼ିବାକୁ ଯାଉଥିବା ‘ପିଏମ୍‌ଏଲ୍‌-ଏନ୍‌’କୁ ସମର୍ଥନ ଦେଇଥିବା ରାଜନୈତିକ ଦଳଗୁଡ଼ିକୁ ନୱାଜ୍‌ ଶରିଫ୍‌ କୃତଜ୍ଞତା ଜ୍ଞାପନ କରିବା ସହିତ ଏଭଳି ନିଷ୍ପତ୍ତିଦ୍ବାରା ପାକିସ୍ତାନ ସଙ୍କଟମୁକ୍ତ ହେବ ବୋଲି ଆଶା ବ୍ୟକ୍ତ କରିଛନ୍ତି। ସୂଚନାଯୋଗ୍ୟ, ପ୍ରଧାନମନ୍ତ୍ରୀ ପ୍ରତିଦ୍ବନ୍ଦ୍ବିତାରୁ ‘ପାକିସ୍ତାନ ପିପୁଲ୍‌ସ୍‌ ପାର୍ଟି’ର ଅଧ୍ୟକ୍ଷ ବିଲାୱଲ ଭୁଟ୍ଟୋ-ଜର୍‌ଦାରି ଓହରି ଯିବାର କିଛି ସମୟ ପରେ ଉପରୋକ୍ତ ନିଷ୍ପତ୍ତି ଗ୍ରହଣ କରାଯାଇଛି।
ଫେବ୍ରୁଆରି ୮ ତାରିଖରେ ହୋଇଥିବା ସାଧାରଣ ନିର୍ବାଚନରେ ୩ ପ୍ରମୁଖ ଦଳ ଯଥା:- ‘ପିଏମ୍‌ଏଲ୍‌-ଏନ୍‌’, ‘ପିପିପି’ ଓ ‘ପିଟିଆଇ’ ମଧ୍ୟରୁ କେହି ଜାତୀୟ ବିଧାନସଭା ନିମନ୍ତେ ଆବଶ୍ୟକ ଏକକ ସଂଖ୍ୟା ଗରିଷ୍ଠତା ହାସଲ କରି ନାହାନ୍ତି। ତେଣୁ, ସେମାନଙ୍କ ମଧ୍ୟରୁ କୌଣସି ଦଳ ସରକାର ଗଠନ କରିବାରେ ଅସମର୍ଥ ଥିବାରୁ ପାକିସ୍ତାନରେ ଝୁଲା ସଂସଦ ପରିସ୍ଥିତି ସୃଷ୍ଟି ହୋଇଛି।