ଏକ ବ୍ୟକ୍ତି,ଏକ ପରିବାର’ସଂସ୍କୃତିକୁ ନେଇ ଚିନ୍ତିତ ସୁପ୍ରିମ୍‌କୋର୍ଟ…..

ରିପୋର୍ଟ କାର୍ଡ / ନୂଆଦିଲ୍ଲୀ

ସୁପ୍ରିମ୍‌କୋର୍ଟ ପରିବାର ଅନୁଷ୍ଠାନର ‘ଅବକ୍ଷୟ’କୁ ନେଇ ଚିନ୍ତା ପ୍ରକଟ କରିଛନ୍ତି | ଯାହା ଏକ ବ୍ୟାପକ ସାମାଜିକ ଚିନ୍ତାକୁ ପ୍ରତିଫଳିତ କରୁଛି। ଜଷ୍ଟିସ୍ ପଙ୍କଜ ମିଥାଲ ଓ ଜଷ୍ଟିସ୍ ଏସ୍‌ଭିଏନ୍ ଭଟ୍ଟି କହିଛନ୍ତି ଯେ ଭାରତ ଦୀର୍ଘ ଦିନ ଧରି ବସୁଧୈବ କୁଟୁମ୍ବକମ୍ ଅର୍ଥାତ୍ ‘ବିଶ୍ୱ ଏକ ପରିବାର’ ଧାରଣାକୁ ବଜାୟ ରଖିଥିବା ବେଳେ ଦେଶ ଏବେ ଅଣୁ ପରିବାର ମଧ୍ୟରେ ବି ଏକତା ବଜାୟ ରଖିବାରେ ଚ୍ୟାଲେଞ୍ଜର ସମ୍ମୁଖୀନ ହେଉଛି। ଭାରତରେ ଆମେ ବସୁଧୈବ କୁଟୁମ୍ବକମ୍‌ରେ ବିଶ୍ୱାସ କରୁ, ଅର୍ଥାତ୍ ସମଗ୍ର ପୃଥିବୀ ଗୋଟିଏ ପରିବାର। ତଥାପି ଆଜି ଆମେ ନିଜ ପରିବାରରେ ଏକତା ବଜାୟ ରଖିବାରେ ସକ୍ଷମ ହୋଇନାହୁଁ, ବିଶ୍ବକୁ ଗୋଟିଏ ପରିବାର ଭାବେ ଗଢ଼ିତୋଳିବା ପାଇଁ କ’ଣ କହିବୁ ବୋଲି ଖଣ୍ଡପୀଠ କହିଛନ୍ତି। ‘ପରିବାର’ର ଧାରଣା ଦୁର୍ବଳ ହେବାରେ ଲାଗିଛି। ‘ଏକ ବ୍ୟକ୍ତି, ଏକ ପରିବାର’ ମଡେଲର ଆବିର୍ଭାବ ଘଟୁଛି, ଯାହା ଏକାଠି ରହିବା ଓ ପରସ୍ପରକୁ ସମର୍ଥନ କରିବାର ପାରମ୍ପରିକ ମୂଲ୍ୟବୋଧଠାରୁ ଚିନ୍ତାଜନକ ପରିବର୍ତ୍ତନକୁ ସୂଚାଇଥାଏ। ୨୦୨୩ରେ ଭାରତର ଜି-୨୦ ଅଧ୍ୟକ୍ଷତା ସମୟରେ ଦେଶ ବିଶ୍ୱ ମଞ୍ଚରେ ବସୁଧୈବ କୁଟୁମ୍ବକମ୍ ବିଷୟବସ୍ତୁକୁ ପ୍ରୋତ୍ସାହିତ କରିଥିଲା। ପୃଥିବୀର ସର୍ବବୃହତ୍ ଗଣତନ୍ତ୍ର ଓ ସାଂସ୍କୃତିକ ବିବିଧତାରେ ସମୃଦ୍ଧ ଦେଶ ଭାବରେ, ପୃଥିବୀ ଏକ ବଡ଼ ପରିବାର ବୋଲି ବିଶ୍ୱାସ କରୁଥିବା ଦର୍ଶନ ଭାରତୀୟ ସମାଜର ଏକ କେନ୍ଦ୍ରୀୟ ସ୍ତମ୍ଭ ହୋଇଛି। ତେବେ ସର୍ବୋଚ୍ଚ ନ୍ୟାୟାଳୟଙ୍କ ଏହି ମନ୍ତବ୍ୟ ଏକ ଚିନ୍ତାର କାରଣ ପାଲଟିଛି। ବର୍ଷ ବର୍ଷ ଧରି ଅତ୍ୟାଚାର ଓ ସମ୍ପତ୍ତି ବିବାଦକୁ ନେଇ ଜଣେ ମହିଳା ନିଜ ବଡ଼ ପୁଅକୁ ଘରୁ ବାହାର କରିବାକୁ ଆବେଦନ କରିଥିଲେ। ଏଭଳି ଘଟଣା ବୃଦ୍ଧି ପାଉଥିବାରୁ କୋର୍ଟ ଉଦ୍‌ବେଗ ପ୍ରକାଶ କରିଥିଲେ।