ଟଙ୍କା ଦେଇ ଗାଁ କିଣିନେଲେ….

ରିପୋର୍ଟ କାର୍ଡ / ପାରଳାଖେମୁଣ୍ଡି

ବ୍ୟବସ୍ଥାର ବିଚିତ୍ର ନୀତି। ଶେଷରେ ଦେଢ଼ କୋଟି ଟଙ୍କାରେ ବିକ୍ରି ହୋଇଗଲା ଗଜପତି ଜିଲ୍ଲା ଗୋଷାଣି ବ୍ଲକର ଡାକ୍ତର ବାଞ୍ଜେରି ଗାଁ। ଗାଁର ପ୍ରାୟ ୪୭ ଏକର ଜମି ବିକ୍ରି ହୋଇଛି। ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ଏହା ସତ୍ୟ। ସରକାରୀ ଖର୍ଚ୍ଚରେ ରାସ୍ତାଘାଟ, ବିଦ୍ୟାଳୟ, ପାନୀୟ ଜଳ ଭଳି ସବୁ ବ୍ୟବସ୍ଥା ରହିଥିବା ଏହି ଗାଁକୁ ଏବେ ବିକ୍ରି କରି ଦିଆଯାଇଛି। ପ୍ରାୟ ଦେଢ଼କୋଟି ଟଙ୍କା ଦେଇ ବ୍ରହ୍ମପୁରର ଜଣେ ମହିଳା ଏହି ଗାଁକୁ କିଣି ନେଇଛନ୍ତି। ଜିଲା ନିବନ୍ଧକଙ୍କ କାର୍ଯ୍ୟାଳୟରେ ବିକ୍ରି ପ୍ରକ୍ରିୟା ସମ୍ପନ୍ନ ହୋଇଛି। ଏହାସହ ଏହି ଗାଁ ବର୍ଷ ବର୍ଷ ଧରି ରହୁଥିବା ଶହେରୁ ଊର୍ଦ୍ଧ୍ବ ଆଦିବାସୀ ପରିବାରଙ୍କ ଭାଗ୍ୟ କ’ଣ ହେବ ତାକୁ ନେଇ ପ୍ରଶ୍ନ ଉଠିଛି। ବିଦ୍ୟାଳୟ କୋଠା, ଅଙ୍ଗନବାଡ଼ି କେନ୍ଦ୍ର ସହ ଆବାସ ଭଳି ବିଭିନ୍ନ ସରକାରୀ ଯୋଜନା ରହିଥିବା ସତ୍ତ୍ବେ ଏହି ସମସ୍ତ ଅଞ୍ଚଳକୁ କେବଳ ଜମି ଦର୍ଶାଯାଇ ଯୋଜନାବଦ୍ଧ ଭାବେ ବିକ୍ରି କରାଯାଇଥିବା ଅଭିଯୋଗ ହୋଇଛି।ସଂପୂର୍ଣ୍ଣ ଗାଁକୁ ସରକାରୀ ଭାବେ ଜମିର ମାଲିକ ଥିବା ଏମ୍ ଚନ୍ଦ୍ର ଶେଖର ରାଓ ବିକ୍ରି କରିଛନ୍ତି। ଗାଁ ସମେତ ଆଖପାଖ ୪୨ ଏକର ଚାଷ ଜମିକୁ ୧ କୋଟି ୪୪ ଲକ୍ଷ ଟଙ୍କାରେ ବିକ୍ରି ହୋଇଛି। ଯାହାର ଷ୍ଟାମ୍ପ ଖର୍ଚ୍ଚ ବାବଦକୁ ୭ ଲକ୍ଷ ଟଙ୍କା ଦିଆଯାଇଛି। ସେହିପରି ଅନ୍ୟ ୫ ଏକର ଜମିକୁ ୮ ଲକ୍ଷ ୫୦ ହଜାର ଟଙ୍କାରେ ବିକ୍ରି କରାଯାଇଛି। ମୋଟ ୪୭ ଏକର ଜମି ବ୍ରହ୍ମପୁରର ଜଣେ ମହିଳାଙ୍କ ନାଁରେ ପଞ୍ଜିକୃତ (ରେଜିଷ୍ଟ୍ରି)ହୋଇଛି। ଏବେ ଗାଁ ବିକ୍ରି ହୋଇଥିବାରୁ ବର୍ଷ ବର୍ଷ ଧରି ବସବାସ କରି ଆସୁଥିବା ଶହେରୁ ଊର୍ଦ୍ଧ୍ବ ଆଦିବାସୀ ପରିବାର ଏବେ କୁଆଡ଼େ ଯିବେ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଆଦିବାସୀ ସମ୍ପ୍ରଦାୟର ୫ ଶହରୁ ଊର୍ଦ୍ଧ୍ବ ଜନସଂଖ୍ୟା ବିଶିଷ୍ଟ ଗ୍ରାମବାସୀ ପିଢ଼ି ପରେ ପିଢି ଗ୍ରାମର ଜମିବାଡିରେ ଚାଷବାସ ସହ ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ଜୀବିକା ନିର୍ବାହ କରିଆସୁଛନ୍ତି। ଅଚିନ୍ତାରେ ବସବାସ କରି ଆସୁଥିବା ଡାକ୍ତର ବାଞ୍ଜେରି ଗ୍ରାମବାସୀଙ୍କୁ ଦିନେ ଏଭଳି ପରିସ୍ଥିତି ସାମ୍ନା କରିବାକୁ ପଡ଼ିବ ତାହା ସେମାନେ କେବେ ସପ୍ନରେ ସୁଦ୍ଧା ଭାବିନଥିଲେ। ଜମି ବେପାରୀଙ୍କୁ ଜମି ହସ୍ତାନ୍ତର ପରେ ସଂପୂର୍ଣ୍ଣ ଗାଁ ଉଚ୍ଛେଦ କରାଯିବା ଆଶଙ୍କା ରହିଛି।ସେଠାରେ ଜମି ମାଲିକ କୌଣସି ପ୍ରକଳ୍ପ ପ୍ରତିଷ୍ଠା କରିବା ସମ୍ଭାବନା ରହିଥିବା କୁହାଯାଉଛି। ତେବେ ଏହା ବର୍ତ୍ତମାନ ଯାଏ ସ୍ପଷ୍ଟ ହୋଇପାରି ନାହିଁ। ତେବେ ଜମି ହସ୍ତାନ୍ତର ପରେ ସରକାରୀ ଅନୁଷ୍ଠାନ ସମେତ ଶତାଧିକ ଘର ଉଚ୍ଛେଦ ବେଳେ ବଡଧରଣର ଆଇନଶୃଙ୍ଖଳା ପରିସ୍ଥିତି ଉପୁଜିବା ଆଶଙ୍କା କରାଯାଉଛି। ଜମି ବିକ୍ରି ବେଳେ ମୁଣ୍ଡ ପୂରାଇବାକୁ ମନା କରିଥିବା ପ୍ରଶାସନ ଗାଁ ଉଚ୍ଛେଦ ବେଳେ ହସ୍ତକ୍ଷେପ କରିବ ବି ନାହିଁ ତାହା ମୁଖ୍ୟ ପ୍ରଶ୍ନ ହୋଇଛି। ଜମି ହସ୍ତାନ୍ତର ହୋଇଥିବାରୁ ଏତେ ସଂଖ୍ୟକ ଗ୍ରାମବାସୀ କରିବେ କଣ ? ତାହାକୁ ନେଇ ନାନା ଆଲୋଚନା ଜାରି ରହିଛି। ଯଦି ଗ୍ରାମବାସୀ ସ୍ଥାନାନ୍ତର ହେବେ ତାହା କିଭଳି ସମ୍ଭବ ହେବ ତାହାକୁ ନେଇ ସେମାନେ ଚିନ୍ତାରେ ରହିଛନ୍ତି।