ବାଚସ୍ପତି କେ. ସୁରେଶଙ୍କ ନାମାଙ୍କନ ଉପରେ ହସ୍ତାକ୍ଷର କଲାନି ଟିଏମସି….

ରିପୋର୍ଟ କାର୍ଡ / ନୂଆଦିଲ୍ଳୀ

ଲୋକସଭାରେ ୨୦୧୪ -୨୦୧୯ର ସ୍ଥିତି ବଦଳିଯାଇଛି । ୨୦୨୪ ନିର୍ବାଚନରେ ମଜବୁତ ହୋଇଛନ୍ତି ବିରୋଧୀ। ଏବେ ଲୋକସଭାରେ ବାଚସ୍ପତି ନିର୍ବାଚନ ହେବାକୁ ଯାଉଛି । ଏହି କ୍ରମରେ ଏନଡିଏ ମେଣ୍ଟ ତରଫରୁ ପୂର୍ବତନ ବାଚସ୍ପତି ଓମ୍ ବିର୍ଲାଙ୍କୁ ପୁଣିଥରେ ପ୍ରାର୍ଥୀ କରାଯାଇଥିବା ବେଳେ ବିରୋଧୀ ଇଣ୍ଡିଆ ମେଣ୍ଟ ତରଫରୁ ସାଂସଦ କେ ସୁରେଶ ପ୍ରାର୍ଥୀପତ୍ର ଦାଖଲ କରିଛନ୍ତି । ହେଲେ ଇଣ୍ଡିଆ ମେଣ୍ଟର ଏହି ନିଷ୍ପତ୍ତିକୁ ଗ୍ରହଣ କରିପାରିନାହାଁନ୍ତି ମେଣ୍ଟ ସହଯୋଗୀ ଟିଏମସି ମୁଖ୍ୟ ମମତା ବାନାର୍ଜୀ | ସୂଚନା ମୁତାବକ କଂଗ୍ରେସ ତରଫରୁ ଇଣ୍ଡିଆ ମେଣ୍ଟରୁ କେ. ସୁରେଶଙ୍କୁ ପ୍ରାର୍ଥୀ କରାଯିବା ପରେ ଟିଏମସି ଅସନ୍ତୁଷ୍ଟ ରହିଛି । ଟିଏମସି ମୁଖ୍ୟ ମମତା ବାନାର୍ଜୀଙ୍କ କହିବା କଥା ପ୍ରାର୍ଥୀ ଘୋଷଣା ପୂର୍ବରୁ ମେଣ୍ଟ ତରଫରୁ ଟିଏମସି ସହ କୌଣସି ପରାମର୍ଶ କରାଯାଇ ନାହିଁ । ଏହି କାରଣରୁ କେ. ସୁରେଶଙ୍କ ନାମାଙ୍କନ ଉପରେ ବିରୋଧୀ ମେଣ୍ଟର ସମସ୍ତ ସାଂସଦ ହସ୍ତାକ୍ଷର କରିଥିବା ବେଳେ ଟିଏମସିର କୌଣସି ସାଂସଦ ହସ୍ତାକ୍ଷର କରିନାହାଁନ୍ତି।