ଆଜି ମହାପ୍ରଭୁ ଶ୍ରୀଲିଙ୍ଗରାଜଙ୍କ ରୁକୁଣା ରଥଯାତ୍ରା,୧୪୪ ଧାରା ଜାରି…..

ରିପୋର୍ଟ କାର୍ଡ / ଭୁବନେଶ୍ୱର

ଆଜି ମଙ୍ଗଳବାର ଚୈତ୍ରମାସ ଶୁକ୍ଳପକ୍ଷ ଅଶୋକାଷ୍ଟମୀରେ ରୁକୁଣା ରଥଯାତ୍ରା ଅନୁଷ୍ଠିତ ହେବ। ଗତକାଲି ସପ୍ତମୀ ତିଥିରେ ମହାପ୍ରଭୁ ଶ୍ରୀଲିଙ୍ଗରାଜଙ୍କ ନେତ୍ରୋତ୍ସବ ପାଳିତ ହୋଇଯାଇଛି। ଚଳିତ ବର୍ଷ କୋଭିଡ କଟକଣାରେ ଶ୍ରୀଜୀଉଙ୍କ ରଥ ପ୍ରତିଷ୍ଠା କରାଯାଇଥିଲା। ମହାରଣା ସେବାୟତ ରଥ ନିର୍ମାଣ ପରେ ଦର୍ଜି ସେବାୟତ ରଥରେ କନା ଲଗାଇଥିଲେ। ଶ୍ରୀଜୀଉଙ୍କ ସନ୍ଧ୍ୟାଧୂପ ଶେଷ ପରେ ବଡୁ ସେବାୟତମାନେ ମରିଚି କୁଣ୍ଡରୁ ପାଣି ଆଣି ରଥଖଳାରେ ପହଞ୍ଚାଇଥିଲେ। ପରେ ମନ୍ଦିରର କୁଳ ପୁରୋହିତ, ପୁରୀ ରାଜଗୁରୁ ଓ ୬ଜଣ କ୍ଷେତ୍ରବାସୀ ସେବାୟତଙ୍କୁ ନେଇ ପ୍ରତିଷ୍ଠା କାର୍ଯ୍ୟ ସମ୍ପନ୍ନ ହୋଇଥିଲା। ମନ୍ଦିର ପ୍ରଶାସନ ତରଫରୁ ସମସ୍ତ ପୂଜାସାମଗ୍ରୀ ଯୋଗାଇ ଦିଆଯାଇଥିଲା। ରଥ ପ୍ରତିଷ୍ଠା ପୂର୍ବରୁ ବ୍ରହ୍ମାମୂର୍ତ୍ତିକୁ ମନ୍ଦିର ଭିତରୁ ରଥଖଳାକୁ ଅଣାଯାଇଥିଲା। ବ୍ରାହ୍ମଣ ଓ ବଡୁ ନିଯୋଗ ସେବାୟତ ବ୍ରହ୍ମାମୂର୍ତ୍ତିକୁ ଆଣିଥିଲେ। ରଥ ପ୍ରତିଷ୍ଠା ଶେଷ ପରେ ସମର୍ଥା ସେବାୟତ ରଥରେ ନେତ ବାନ୍ଧିଥିଲେ। ନେତ୍ରୋତ୍ସବ କାର୍ଯ୍ୟ ବିଳମ୍ବିତ ରାତିରେ ଶେଷ ହୋଇଥିଲା। ରଥପ୍ରତିଷ୍ଠା କାର୍ଯ୍ୟ ଶେଷ ପରେ ମନ୍ଦିର ଦକ୍ଷିଣ ଘରେ ପୂଜା ପାଉଥିବା ପଞ୍ଚବକ୍ର ମହାଦେବ ପାରମ୍ପରୀକ ରୀତି ମତେ ପୂଜାପଣ୍ଡା ଓ ପତ୍ରି ସେବକଙ୍କ ଉପସ୍ଥିତିରେ ରଥ ନିର୍ମାଣ କାର୍ଯ୍ୟ ତଦାରଖ କରିଥିଲେ।ମହାପ୍ରଭୁ ଶ୍ରୀଲିଙ୍ଗରାଜଙ୍କ ଅଶୋକାଷ୍ଟମୀ ରଥଯାତ୍ରା ଓ ବାହୁଡ଼ା ଯାତ୍ରା ଉପଲକ୍ଷେ କମିସନରେଟ ପୁଲିସ ପକ୍ଷରୁ ଯାନବାହନ ଚଳାଚଳ ଉପରେ ସ୍ବତନ୍ତ୍ର ନିର୍ଦ୍ଦେଶନାମା ଜାରି ହୋଇଛି । ଏହି ୨ଦିନ ରଥଦାଣ୍ଡରେ ଗାଡ଼ି ଚଳାଚଳ ସମ୍ପୂର୍ଣ୍ଣ ନିଷେଧ କରାଯାଇଛି। ମାଉସୀମା ଛକଠାରୁ ରଥଦାଣ୍ଡ ଦେଇ କୌଣସି ଗାଡ଼ି ଯାତାୟାତ କରିପାରିବ ନାହିଁ। ମାଉସୀମା’ ଛକଠାରୁ ସବୁ ଗାଡ଼ି ସଂଗ୍ରହାଳୟ ଛକ କିମ୍ବା ବିବେକାନନ୍ଦମାର୍ଗ ଦେଇ ଯାତାୟାତ କରିପାରିବ। ସେହିପରି ରଥଦାଣ୍ଡକୁ ସଂଯୋଗ ହୋଇଥିବା ବାରିକ ସାହି, ମହାରଣା ସାହି, ଗୋସାଗରେଶ୍ବର ଛକ, ଶୀତଳଷଷ୍ଠୀ ଛକ, ତିନିମୁଣ୍ଡିଆ ଛକ, ହରଚଣ୍ଡି ଛକ, ମୁନା ମେଡ଼ିକାଲ ଛକ, ପୁନାମା ଗେଟ୍‌ ରାସ୍ତାଦେଇ କୌଣସି ଯାନବାହନ ଯାତାୟାତ କରିପାରିବେ ନାହିଁ। ଏତଦ୍‌ବ୍ୟତୀତ ରଥଖଳାଠାରୁ ରଥଦାଣ୍ଡ ଦେଇ କୌଣସି ଯାନବାହନ ଚଳାଚଳ ଉପରେ କଟକଣା କରାଯାଇଛି। ସେଗୁଡ଼ିକ ବାଟ ମହାଦେବ ମନ୍ଦିର ପଟରୁ ବିଏମ୍‌ସି ମାର୍କେଟ୍‌ କଂପ୍ଲେକ୍ସ କିମ୍ବା ବିନ୍ଦୁସାଗର ରାସ୍ତା ଦେଇ ଯାତୟାତ କରିପାରିବେ। ଏହି କଟକଣା ରଥଯାତ୍ରା ଓ ବାହୁଡ଼ା ଯାତ୍ରା ପାଇଁ ଜାରି କରାଯାଇଛି। ଉଲ୍ଲଙ୍ଘନକାରୀଙ୍କଠାରୁ ୫୦୦ରୁ ସର୍ବାଧିକ ଏକ ହଜାର ଟଙ୍କା ପର୍ଯ୍ୟନ୍ତ ଜୋରିମାନା ଆଦାୟ କରାଯିବ ବୋଲି କମିସନରେଟ ପୁଲିସ ପକ୍ଷରୁ ସୂଚାଇ ଦିଆଯାଇଛି। ରୁକୁଣା ରଥଯାତ୍ରା ଓ ବାହୁଡ଼ା ଯାତ୍ରାରେ କମିସନରେଟ ପୁଲିସ ପକ୍ଷରୁ ରଥଦାଣ୍ଡରେ ୧୪୪ ଜାରି କରାଯାଇଥିବାବେଳେ ଦିନ ୧୨ଟାରୁ ସନ୍ଧ୍ୟା ୭ଟା ପର୍ଯ୍ୟନ୍ତ ରଥଦାଣ୍ଡ ଉଭୟ ପାର୍ଶ୍ବରେ ଥିବା ସମସ୍ତ ଦୋକାନ ବଜାର ବନ୍ଦ ରହିବ| ୨୩ଟି ସ୍ଥାନରେ ପୋଲିସ ମୁତୟନ ହେବ ବୋଲି ଡିସିପି ଡ. ଉମାଶଙ୍କର ଦାଶ କହିଛନ୍ତି।