ଆଜି ଉତ୍ତର ପ୍ରଦେଶର ବିଧାନସଭା ନିର୍ବାଚନ ପାଇଁ ଶେଷ ପର୍ଯ୍ୟାୟ ମତଦାନ….

ରିପୋର୍ଟ କାର୍ଡ / ଭୁବନେଶ୍ୱର

ଆଜି ଉତ୍ତର ପ୍ରଦେଶର ବିଧାନସଭା ନିର୍ବାଚନ ପାଇଁ ଶେଷ ପର୍ଯ୍ୟାୟ ଭୋଟ୍‍ ଗ୍ରହଣ। ମତଦାନ ଲାଗି ସମସ୍ତ ବ୍ୟବସ୍ଥା ସହ କଡ଼ା ସୁରକ୍ଷା ବ୍ୟବସ୍ଥା ଗ୍ରହର କରାଯାଇଛି। ଚାନ୍ଦୌଲି ଜିଲ୍ଲାର ଚକିଆ ଏବଂ ସୋନୋଭଦ୍ର ଜିଲ୍ଲାର ରୋବୋଟର୍ସ୍‍ଗଞ୍ଜ ଓ ଦୁଦ୍ଧି ନିର୍ବାଚନ ମଣ୍ଡଳିରେ ଭୋଟ୍‍ଗ୍ରହଣ ସକାଳ ୭ଟାରୁ ଅପରାହ୍ଣ ୪ଟା ପର୍ଯ୍ୟନ୍ତ ଚାଲିବ । ଅନ୍ୟ ନିର୍ବାଚନ ମଣ୍ଡଳିଗୁଡ଼ିକରେ ଭୋଟ୍‍ ଗ୍ରହଣ ସନ୍ଧ୍ୟା ୬ଟାରେ ଶେଷ ହେବ । ସପ୍ତମ ପର୍ଯ୍ୟାୟରେ ୯ଟି ଜିଲ୍ଲାର ୧୧ଟି ଅନୁସୂଚିତ ଜାତିପାଇଁ ସଂରକ୍ଷିତ ଆସନ ଏବଂ ଅନୁସୂଚିତ ଜନଜାତି ପାଇଁ ସଂରକ୍ଷିତ ୨ଟି ଆସନ ସମେତ ୫୪ଟି ବିଧାନସଭା ନିର୍ବାଚନ ମଣ୍ଡଳିରେ ଭୋଟ୍‍ ନିଆଯିବ । ୭୫ ଜଣ ମହିଳା ପ୍ରାର୍ଥୀଙ୍କ ସମେତ ୬୧୩ ଜଣ ପ୍ରାର୍ଥୀଙ୍କ ମଧ୍ୟରେ ଏହି ୫୪ଟି ବିଧାନସଭା ଆସନ ନିର୍ବାଚନ ସକାଶେ ବହୁମୁଖୀ ପ୍ରତିଯୋଗିତା ହେବ । ଜୁଆନ୍‍ପୁର ବିଧାନସଭା ଆସନରେ ସର୍ବାଧିକ ୨୫ ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଥିଲାବେଳେ ପିଣ୍ଡ୍ରା ଓ ବାରାଣାସୀ ଜିଲ୍ଲାର ଶିବପୁରୀ ଆସନ ପାଇଁ ସର୍ବନିମ୍ନ ୬ ଜଣ ଲେଖାଏଁ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି । ଏକ କୋଟି ୯ ଲକ୍ଷ ପୁରୁଷ ଭୋଟ୍‍ଦାତାଙ୍କ ସମେତ ୯୭ ଲକ୍ଷ ମହିଳା ଓ ୧ ହଜାର ୨୭ ଜଣ କିନ୍ନର ଭୋଟ୍‍ଦାତା ୨୩ ହଜାର ୬୧୪ଟି ଭୋଟ୍‍ଗ୍ରହଣ କେନ୍ଦ୍ରରେ ସେମାନଙ୍କର ମତାଧିକାର ସାବ୍ୟସ୍ତ କରିବେ । ଉତ୍ତର ପ୍ରଦେଶରେ ସପ୍ତମ ଓ ଚୂଡ଼ାନ୍ତ ପର୍ଯ୍ୟାୟ ବିଧାନସଭା ନିର୍ବାଚନ ସହ ୫ଟି ରାଜ୍ୟରେ ଚାଲିଥିବା​ ବିଧାନସଭା​‌ ନିର୍ବାଚନ ଶେଷ ହେବ। ଆସନ୍ତା ୧୦ ତାରିଖରେ ଭୋଟ ଗଣନା ସହ ଫଳାଫଳ ଘୋଷଣା କରାଯିବ।