ଇରାନ ଉପରେ ଆମେରିକାର ଆକ୍ରମଣ:ଜାତିସଂଘର ଚିନ୍ତାବଢ଼ିଲା….

ରିପୋର୍ଟ କାର୍ଡ / ନୂଆଦିଲ୍ଲୀ

ଆମେରିକା ଏବେ ଇସ୍ରାଏଲ-ଇରାନ ଯୁଦ୍ଧରେ ମଧ୍ୟ ଡେଇଁ ପଡ଼ିଛି। ଆମେରିକା ଇସ୍ରାଏଲକୁ ସମର୍ଥନ ଘୋଷଣା କରିବା ସହିତ, ବିମାନ ଆକ୍ରମଣ ଦ୍ୱାରା ଇରାନର ତିନୋଟି ପରମାଣୁ କେନ୍ଦ୍ର ଫୋର୍ଡୋ, ନାଟାଞ୍ଜ ଏବଂ ଇସଫାହାନକୁ ଧ୍ୱଂସ କରିଦେଇଛି। ଏବେ ଜାତିସଂଘର ମହାସଚିବ ଆଣ୍ଟୋନିଓ ଗୁଟେରେସ ଏହାକୁ ନେଇ ଚିନ୍ତା ପ୍ରକାଶ କରିଛନ୍ତି। ଆଣ୍ଟୋନିଓ ଗୁଟେରେସ୍ କହିଛନ୍ତି ଯେ, ଆମେରିକାର ଏହି କାର୍ଯ୍ୟ ଯୋଗୁ ସଂଘର୍ଷ ଶୀଘ୍ର ନିୟନ୍ତ୍ରଣ ବାହାରକୁ ଯିବାର ବିପଦ ସୃଷ୍ଟି ହୋଇଛି, ଯାହା ସାଧାରଣ ନାଗରିକ, ସମଗ୍ର ଅଞ୍ଚଳ ଏବଂ ବିଶ୍ୱ ଉପରେ ବିନାଶକାରୀ ପ୍ରଭାବ ପକାଇପାରେ। ସେ ଏହାକୁ ଏକ ବିପଦପୂର୍ଣ୍ଣ ତଥା ଉତ୍ତେଜନାପୂର୍ଣ୍ଣ ପଦକ୍ଷେପ ବୋଲି କହିଛନ୍ତି। ଯାହା ପୂର୍ବରୁ ଅତ୍ୟନ୍ତ ଉତ୍ତେଜନାପୂର୍ଣ୍ଣ ସ୍ଥିତିରେ ଅଛି। ଗୁଟେରେସ୍‌ଙ୍କ ଅନୁଯାୟୀ, ଏହା ଅନ୍ତର୍ଜାତୀୟ ଶାନ୍ତି ଏବଂ ସୁରକ୍ଷା ପାଇଁ ଏକ ଗମ୍ଭୀର ଏବଂ ସିଧାସଳଖ ବିପଦ।ଗୁଟେରେସ୍ କହିଛନ୍ତି ଯେ, ଏହି ସଂଘର୍ଷ ଦ୍ରୁତ ଗତିରେ ନିୟନ୍ତ୍ରଣ ବାହାରକୁ ଯାଉଛି, ଯାହା କେବଳ ସାଧାରଣ ନାଗରିକଙ୍କ ଉପରେ ନୁହେଁ ବରଂ ସମଗ୍ର ଅଞ୍ଚଳ ଏବଂ ବିଶ୍ୱ ଉପରେ ଏକ ବିନାଶକାରୀ ପ୍ରଭାବ ପକାଇପାରେ। ସେ ଅପିଲ୍ କରିଛନ୍ତି, ମୁଁ ସମସ୍ତ ସଦସ୍ୟ ଦେଶଙ୍କୁ ପରିସ୍ଥିତିକୁ ଶାନ୍ତ କରିବା ପାଇଁ ପଦକ୍ଷେପ ନେବାକୁ ଏବଂ ଜାତିସଂଘ ଚାର୍ଟର ଏବଂ ଅନ୍ତର୍ଜାତୀୟ ଆଇନ ଅନୁଯାୟୀ ସେମାନଙ୍କର ଦାୟିତ୍ୱ ନିର୍ବାହ କରିବାକୁ ଅନୁରୋଧ କରୁଛି।କହିଛନ୍ତି, ଏଭଳି ଅତ୍ୟନ୍ତ ସମ୍ବେଦନଶୀଳ ସମୟରେ ବିଶୃଙ୍ଖଳାକୁ ଏଡାଇବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏହି ସଙ୍କଟକୁ ସାମରିକ କାର୍ଯ୍ୟାନୁଷ୍ଠାନ ଦ୍ୱାରା ସମାଧାନ କରାଯାଇପାରିବ ନାହିଁ। ଆଗକୁ ବଢ଼ିବାର ଏକମାତ୍ର ଉପାୟ ହେଉଛି କୂଟନୀତି, ଏବଂ ଶାନ୍ତି ହେଉଛି ଏକମାତ୍ର ବିକଳ୍ପ।ସେହିପରି, ଇରାନର ପରମାଣୁ ସ୍ଥାନ ଉପରେ ଆକ୍ରମଣ କରିବା ପରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ କହିଛନ୍ତି ଯେ, ଏବେ ଇରାନରେ ଶାନ୍ତି ହେବ ନଚେତ୍ ବିନାଶ ହେବ। ଟ୍ରମ୍ପ୍ କହିଛନ୍ତି ଯେ, ଇରାନ ଏବେ ଶାନ୍ତି ପଥରେ ଫେରିବା ଉଚିତ୍। ଯଦି ଇରାନ ଏପରି ନ କରେ, ତେବେ ମୁଁ ଆହୁରି ବଡ଼ ଆକ୍ରମଣ କରିବି। ଇରାନ ଉପରେ ଆକ୍ରମଣ ପରେ, ଡୋନାଲ୍ଡ ଟ୍ରମ୍ପ୍ ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ସହ ଫୋନ୍ ଯୋଗେ କଥା ହୋଇଥିଲେ ଏବଂ ତାଙ୍କୁ ଆଶ୍ୱାସନା ଦେଇଥିଲେ ଯେ, ଇସ୍ରାଏଲ ଏବେ ପୂର୍ବ ଅପେକ୍ଷା ଅଧିକ ସୁରକ୍ଷିତ। ଜବାବରେ ନେତାନ୍ୟାହୁ ଟ୍ରମ୍ପଙ୍କୁ ଧନ୍ୟବାଦ ଜଣାଇଥିଲେ।