୨ ଟ୍ରେଲର ଧକ୍କା, ଜୀବନ୍ତ ଜଳିଗଲେ ୪…..

ରିପୋର୍ଟ କାର୍ଡ / ନୂଆଦିଲ୍ଲୀ

ମଙ୍ଗଳବାର ରାଜସ୍ଥାନ ଅଜମେରରେ ଏକ ବଡ ଧରଣର ଦୁର୍ଘଟଣା ଘଟି ୪ ଜଣ ଜୀବନ୍ତ ଜଳିଯାଇଥିବା ନେଇ ଜଣାପଡିଛି । ୮ ନମ୍ବର ଜାତୀୟ ରାଜପଥରେ ୨ଟି ଟ୍ରେଲର ମୁହାଁମୁହିଁ ଧକ୍କା ହୋଇଛି । ଖୁବ ଜୋରରେ ଦୁର୍ଘଟଣା ଘଟିବାରୁ କିଛି ସମୟ ମଧ୍ୟରେ ୨ଟି ଯାକ ଟ୍ରେଲରେ ନିଆଁ ଲାଗି ଯାଇଥିଲା । ପୋଲିସ ପକ୍ଷରୁ ମିଳିଥିବା ସୂଚନା ଅନୁସାରେ, ଏହି ଦୁର୍ଘଟଣାରେ ଟ୍ରେଲରେ ଥିବା ୪ ଜଣ ଜୀବନ୍ତଦଗ୍ଧ ହୋଇଛନ୍ତି । ଟ୍ରେଲରୁ ତୁରନ୍ତ ଡେଇଁ ପଡି ଜଣେ ନିଜର ଜୀବନ ବଞ୍ଚାଇଛନ୍ତି । ଆଜି ସକାଳ ୬ଟା ସମୟରେ ଏହି ଦୁର୍ଘଟଣା ଘଟିଛି । ଜୟପୁରରୁ ବେୱାର ଆଡକୁ ଯାଉଥିବା ଏହି ଟ୍ରେଲରେ ଟାଇଲ୍ସ ପାଉଡର ଭର୍ତ୍ତି ହୋଇ ରହିଥିଲା । ସେହି ସମୟରେ ଟ୍ରେଲରଟି ଭାରସାମ୍ୟ ହରାଇ ଉକ୍ତ ସମୟରେ ବେୱାରରୁ ଜୟପୁର ଆଡକୁ ଆସୁଥିବା ଟ୍ରେଲର ସହ ଧକ୍କା ହୋଇଥିଲା । ଦୁର୍ଘଟଣା ଖୁବ ଭୟଙ୍କର ଥିଲା । ଖୁବ ଶୀଘ୍ର ନିଆଁ ଭୀଷଣ ରୂପ ଧାରଣ କରିନେଇଥିଲା । ଖବର ପାଇ ପୁଲିସ ଓ ଦମକଳ କର୍ମଚାରୀ ତୁରନ୍ତ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ । ଦୁର୍ଘଟଣା ପରେ କିଛି ଘଣ୍ଟା ଜାତୀୟ ରାଜପଥରେ ଯାନବାହନ ଅଟକି ରହିଥିଲା । ପୁଲିସ ରାସ୍ତା ଜାମ ହଟାଇବା ପରେ ଯାତାୟାତ ସ୍ୱଭାବିକ ହୋଇଥିଲା ।