ପେଟିଏମ୍‌ କାରବାର ବନ୍ଦ କଲା RBI……

ରିପୋର୍ଟ କାର୍ଡ / ନୂଆଦିଲ୍ଲୀ

ଭାରତୀୟ ରିଜର୍ଭ ବ୍ୟାଙ୍କ ପେଟିଏମ୍‌ ପେମେଣ୍ଟ୍‌ସ ବ୍ୟାଙ୍କ ଲିମିଟେଡ୍‌ ଉପରେ ପ୍ରତିବନ୍ଧକ ଲଗାଇଛି। ଫେବ୍ରୁଆରୀ ୨୯ ପରଠୁ Paytmରେ ହୋଇପାରିବନି ଡିପୋଜିଟ୍ ଓ କାମ ଦେବନି ୱାଲେଟ ବ୍ୟବସ୍ଥା। ତେବେ Paytmରେ ଥିବା ଗ୍ରାହକଙ୍କ ଟଙ୍କା ସରିବା ଯାଏ ଏହାକୁ ସେ ବ୍ୟବହାର କରିପାରିବେ। ଆରବିଆଇ ଜାରି କରିଥିବା ଗାଇଡଲାଇନକୁ ପାଳନ କରୁ ନଥିବାରୁ Paytm ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ରିଜର୍ଭ ବ୍ୟାଙ୍କ ପକ୍ଷରୁ ଜାରି ବିବୃତିରେ କୁହାଯାଇଛି ଯେ ଏହି ରିପୋର୍ଟଗୁଡ଼ିକରେ ବ୍ୟାଙ୍କରେ ନିରନ୍ତର ନିୟମ ଅନୁପାଳନ ଏବଂ ନିରନ୍ତର ତଦାରଖ ନେଇ ଚିନ୍ତା ପ୍ରକାଶ ପାଇଛି। ଏହା ଫଳରେ ପରବର୍ତ୍ତୀ ତଦାରଖ କାର୍ଯ୍ୟାନୁଷ୍ଠାନର ଆବଶ୍ୟକତା ରହିଛି। ଫେବ୍ରୁଆରି ୨୯, ୨୦୨୪ ପରେ କୌଣସି ଗ୍ରାହକଙ୍କ ଆକାଉଣ୍ଟ, ପ୍ରିପେଡ୍‌ ଉପକରଣ, ୱାଲେଟ୍‌, ଫାସ୍‌ଟ୍ୟାଗ୍‌, ଏନସିଏମସି କାର୍ଡ ଇତ୍ୟାଦିରେ କୌଣସି ସୁଧ, କ୍ୟାସବ୍ୟାକ୍‌ କିମ୍ବା ରିଫଣ୍ଡ ବ୍ୟତୀତ ଆଉ କୌଣସି ଜମା କିମ୍ବା ଋଣ କାରବାର କିମ୍ବା ଟପ୍‌ ଅପ୍‌କୁ ଅନୁମତି ଦିଆଯିବ ନାହିଁ। କେନ୍ଦ୍ରୀୟ ବ୍ୟାଙ୍କ ଆର୍‌ବିଆଇ ଆହୁରି ମଧ୍ୟ କହିଛି ଯେ ସଞ୍ଚୟ ବ୍ୟାଙ୍କ ଆକାଉଣ୍ଟ, ଚାଲୁ (କରେଣ୍ଟ) ଆକାଉଣ୍ଟ, ପ୍ରିପେଡ୍‌ ଉପକରଣ, ଫାସ୍‌ଟ୍ୟାଗ୍‌, ନ୍ୟାସନାଲ କମନ୍‌ ମୋବିଲିଟି କାର୍ଡ ସମେତ ସେମାନଙ୍କ ଆକାଉଣ୍ଟରୁ ଗ୍ରାହକମାନେ ସେମାନଙ୍କ ଉପଲବ୍ଧ ବାଲାନ୍‌ସ ପର୍ଯ୍ୟନ୍ତ କୌଣସି ପ୍ରତିବନ୍ଧକ ବିନା ଉଠାଣ କିମ୍ବା ବ୍ୟବହାରକୁ ଅନୁମତି ଦିଆଯିବ।