ଅନିଲ ଅମ୍ବାନିଙ୍କୁ ୫ବର୍ଷ ବାସନ୍ଦ କଲା ସେବି…..

ରିପୋର୍ଟ କାର୍ଡ / ନୂଆଦିଲ୍ଲୀ

ଉଦ୍ୟୋଗପତି ଅନିଲ ଅମ୍ବାନିଙ୍କ ସମେତ ଅନ୍ୟ ୨୪ଟି ସଂସ୍ଥା ବିରୋଧରେ ପୁଞ୍ଜିବଜାର ନିୟାମକ ସେବି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଅନିଲ ଅମ୍ବାନିଙ୍କ ଉପରେ ୨୫ କୋଟି ଟଙ୍କାର ଜରିମାନା ଲଗାଇଛି। ଏଥିସହିତ ୫ ବର୍ଷ ପାଇଁ ତାଙ୍କୁ ସେୟାର ବଜାର (ଇକ୍ବିଟି ମାର୍କେଟ)ରୁ ନିଷିଦ୍ଧ କରିଛି। କେବଳ ସେତିକି ନୁହେଁ କାର୍ଯ୍ୟାନୁଷ୍ଠାନର ସମ୍ମୁଖୀନ ହୋଇଥିବା ଅଧିକାରୀଙ୍କ ମଧ୍ୟରେ ଅନିଲଙ୍କ ରିଲାଏନ୍ସ ହୋମ ଫାଇନାନ୍ସ ଲିମିଟେଡର କେତେଜଣ ପୂର୍ବତନ ଘନିଷ୍ଠ ‌ସହଯୋଗୀ ରହିଛନ୍ତି। କମ୍ପାନିର ପାଣ୍ଠି ବେଆଇନ ଭାବେ ଅନ୍ୟତ୍ର ସ୍ଥାନାନ୍ତର କରିଥିବାରୁ ସେବି ଏହି ବଡ଼ କାର୍ଯ୍ୟାନୁଷ୍ଠାନ ନେଇଛି। ଅନିଲ ଅମ୍ବାନି କୌଣସି ତାଲିକାଭୁକ୍ତ କମ୍ପାନି କିମ୍ବା ପଞ୍ଜୀକୃତ କୌଣସି ମଧ୍ୟସ୍ଥ ସଂସ୍ଥାର ପ୍ରମୁଖ ପରିଚାଳନା ପଦବି କିମ୍ବା ନିର୍ଦ୍ଦେଶକ ପଦବିରେ କାମ କରିପାରିବେ ନାହିଁ। ରିଲାଏନ୍ସ ହୋମ୍‌ ଫାଇନାନ୍ସକୁ ମଧ୍ୟ ସେବି ସିକ୍ୟୁରିଟି ମାର୍କେଟରେ ୬ ମାସ ପାଇଁ ନିଷେଧ କରିଛି। ଏଥିସହ ଏହି ସଂସ୍ଥା ଉପରେ ୬ ଲକ୍ଷ ଟଙ୍କାର ଜରିମାନା ଲଗାଇଛି। ୨୨୨ ପୃଷ୍ଠା ବିଶିଷ୍ଟ ଚୂଡ଼ାନ୍ତ ଆଦେଶନାମାରେ ସେବି କହିଛି ଯେ ଅନିଲ ଅମ୍ବାନି ରିଲାଏନ୍ସ ହୋମ୍‌ ଫାଇନାନ୍ସ ଲିମିଟେଡର ପ୍ରମୁଖ ପରିଚାଳନା ପଦ‌ବିରେ ଥିବା ଅଧିକାରୀମାନଙ୍କ ଜରିଆରେ ଏକ ଜାଲ୍‌ ସ୍କିମ କରିଥିଲେ। ତେବେ ଏସବୁ ଚାଲ୍‌ବାଜି ପଛର ନାୟକ ଥିଲେ ଅନିଲ ଅମ୍ବାନି। ଏହି ଯୋଜନା ଜରିଆରେ ଋଣ ପାଇବାକୁ ଅଯୋଗ୍ୟ ବ୍ୟକ୍ତିଙ୍କୁ ଋଣ ଦିଆଯାଇଥିଲା। ତେବେ ଯେଉଁମାନଙ୍କୁ ବା ଯେଉଁସବୁ ସଂସ୍ଥାକୁ ଋଣ ଦିଆଯାଇଥିଲା ସେମାନଙ୍କର ସଂପର୍କ ଅନିଲ ଅମ୍ବାନିଙ୍କ ସହ ଜଡ଼ିତ ସଂସ୍ଥା ସହ ରହିଥିଲା। ରିଲାଏନ୍ସ ହୋମ୍‌ ଫାଇନାନ୍ସର ନିର୍ଦ୍ଦେଶକ ମଣ୍ଡଳୀ ଏଭଳି ଋଣ ପ୍ରଦାନକୁ ବନ୍ଦ କରିବା ପାଇଁ କଡ଼ା ନିର୍ଦ୍ଦେଶନାମା ଦେଇଥିଲେ। ଏଥିସହିତ କର୍ପୋରେଟ୍‌ ଋଣକୁ ନିୟମିତ ଅନୁଧ୍ୟାନ କରିଥିଲେ। କିନ୍ତୁ କମ୍ପାନିର ପରିଚାଳନା ଅଧିକାରୀମାନେ ଏହି ନିର୍ଦ୍ଦେଶନାମାକୁ ବେଖାତିର କରିଥିଲେ। ଅର୍ଥାତ୍ ଅନିଲ ଅମ୍ବାନିଙ୍କ ପ୍ରଭାବରେ କେତେକ ବରିଷ୍ଠ ଅଧିକାରୀ ନିୟମ ପାଳନ କରିବାରେ ବିଫଳ ହୋଇଥିଲେ ବୋଲି ସେବି ଦର୍ଶାଇଛି। ଏଡିଏ ଗ୍ରୁପ୍‌ର ଅଧ୍ୟକ୍ଷ ପଦ ଏବଂ ରିଲାଏନ୍ସ ହୋମ୍‌ ଫାଇନାନ୍ସ ଲିମିଟେଡରେ ଥିବା ଅଧିକ ଅଂଶଧନର ପ୍ରଭାବକୁ ଅନିଲ ଅମ୍ବାନି ଉକ୍ତ ଜାଲିଆତି ପାଇଁ ଅପବ୍ୟବହାର କରିଥିଲେ। ସେବି ଅନ୍ୟ ଯେଉଁ ୨୪ଟି ସଂସ୍ଥା ବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇଛି ସେମାନଙ୍କ ମଧ୍ୟରେ ରିଲାଏନ୍ସ ହୋମ ଫାଇନାନ୍ସ ଲିମିଟେଡର ପୂର୍ବତନ ପ୍ରମୁଖ ଅଧିକାରୀମାନେ ରହିଛନ୍ତି। ସେମାନେ ହେଲେ ଅମିତ ବାପ୍‌ନା, ରବୀନ୍ଦ୍ର ସୁଧାଲକର ଓ ପିଙ୍କେଶ ଆର୍‌ ଶାହ। ବାପ୍‌ନାଙ୍କ ଉପରେ ୨୭ କୋଟି, ସୁଧାଲକରଙ୍କ ଉପରେ ୨୬ କୋଟି ଏବଂ ଶାହଙ୍କ ଉପରେ ୨୧ କୋଟିର ଜରିମାନା ଲାଗିଛି। ଏହାବ୍ୟତୀତ ରିଲାଏନ୍ସ ୟୁନିକର୍ଣ୍ଣ ଏଣ୍ଟରପ୍ରାଇଜେସ, ରିଲାଏନ୍ସ ଏକ୍ସଚେଞ୍ଜ ନେକ୍ସଟ ଲିମିଟେଡ, ରିଲାଏନ୍ସ କମର୍ସିଆଲ ଫାଇନାନ୍ସ ଲିମିଟେଡ, ରିଲାଏନ୍ସ କ୍ଲିନଜେନ ଲିମିଟେଡ, ରିଲାଏନ୍ସ ବିଜନେସ୍‌ ବ୍ରଡକାଷ୍ଟ ନ୍ୟୁଜ୍‌ ହୋଲଡିଂ ଲିମିଟେଡ ଓ ରିଲାଏନ୍ସ ବିଗ୍‌ ଏଣ୍ଟରଟେନମେଣ୍ଟ୍‌ ପ୍ରାଇଭେଟ୍‌ ଲିମିଟେଡ ଉପରେ ୨୫ କୋଟି ଲେଖାଏଁ ଜରିମାନା ଲଗାଯାଇଛି।