ଯୁବତୀ ଚାଲାଣ କରୁଥିଲେ ଅନିଲ-ହଂସିତା….

ରିପୋର୍ଟ କାର୍ଡ / ଭୁବନେଶ୍ଵର

ଅନିଲ-ହଂସିତାଙ୍କୁ ନେଇ ଗୋଟିଏ ପରେ ଗୋଟିଏ ରହସ୍ୟ ସାମ୍ନାକୁ ଆସୁଛି । ଏହି ଯୋଡ଼ି ବଡ଼ବଡ଼ିଆଙ୍କୁ ଖୁସି କରିବା ଲାଗି ଯୁବତୀ ଚାଲାଣ କରୁଥିବା ପୋଲିସ ହାତରେ ସୁରାକ ଲାଗିଛି। ପୋଲିସ ସେମାନଙ୍କଠାରୁ ଜବତ କରିଥିବା ଫୋନ୍‌ ଯାଞ୍ଚ ପରେ ଏହି ତଥ୍ୟ ସାମ୍‌ନାକୁ ଆସିଛି। ଏନେଇ ଠକ ଯୋଡ଼ିଙ୍କ ନାଁରେ ଇନ୍‌ଫୋସିଟି ଥାନାରେ ଆଉ ଏକ ମାମଲା ରୁଜୁ ହୋଇଛି। କ୍ରାଇମ ୟୁନିଟ୍‌ ଏହି ଘଟଣାର ଖୋଳତାଡ଼ ଜାରି ରଖିଛି। ହଂସିତା କେଉଁ କେଉଁ ବଡ଼ବଡ଼ିଆଙ୍କ ପାଖକୁ ଯୁବତୀ ପଠାଇ ଖୁସି କରୁଥିଲା | ସେମାନଙ୍କଠାରୁ ଖୁସି କରିବା ପରିବର୍ତ୍ତେ କ’ଣ ସବୁ ହାସଲ କରୁଥିଲା ତାକୁ ନେଇ ପୋଲିସ ଖୋଳତାଡ଼ ଜୋରଦାର କରିଛି। ଆଗକୁ ବଡ଼ବଡ଼ିଆଙ୍କୁ ପୋଲିସ ତଦନ୍ତ ପରିସରଭୁକ୍ତ କରିପାରେ। ପୁଣି କୋଟି କୋଟି ଟଙ୍କାର କାରବାର ସହ ଦାମୀ କାର୍‌ ମଧ୍ୟ ବ୍ୟବହାର କରୁଥିବା ହଂସିତା ଅଭିଲିପ୍ସା ନିଜର ମିଥ୍ୟା ପରିଚୟପତ୍ର ସହ ମିଥ୍ୟା ପୋଲିସ ଯାଞ୍ଚରେ ପାସପୋର୍ଟ ହାତେଇ ଥିଲା। ହଂସିତାର ପ୍ରକୃତ ନାମ ବିଷ୍ଣୁପ୍ରିୟା ଚାନ୍ଦ ହୋଇଥିବାବେଳେ ୨୦୧୭ରେ ତା’ ନାଁରେ ବଡ଼ଗଡ଼ ଥାନାରେ ମାମଲା ରୁଜୁ ହୋଇଥିଲା। ଏହାପରଠାରୁ ବିଷ୍ଣୁପ୍ରିୟା ନିଜର ପରିଚୟ ବଦଳାଇ ଦେଇଥିଲା। ଅନ୍ୟପଟେ ହଂସିତା ଓରଫ ବିଷ୍ଣୁପ୍ରିୟାର ପ୍ରକୃତ ସ୍ବାମୀ କିଏ ତାକୁ ନେଇ ଦ୍ବନ୍ଦ୍ବ ଉପୁଜିଛି। ଗୋଟିଏ ପଟେ ସରୋଜ ସାହୁକୁ ନିଜର ସ୍ବାମୀ ଦର୍ଶାଇ ସେ ଅନ୍ତରୀଣ ଜାମିନ ଆବେଦନ କରିଥିଲା। ଅନ୍ୟପଟେ ନିୟମିତ ଜାମିନ ପାଇଁ ଦାଖଲ କରିଥିବା ପିଟିସନରେ ନିଜର ସ୍ବାମୀ ଭାବେ ଅନିଲ ମହାନ୍ତିକୁ ଦର୍ଶାଇଥିଲା। ଯାହାକୁ ନେଇ କୋର୍ଟ ହଂସିତାର ଅନ୍ତରୀଣ ଜାମିନ ଆବେଦନ ଖାରଜ କରି ଦେଇଥିଲେ। ନିଜକୁ ଜଣେ ବରିଷ୍ଠ ଅଧିକାରୀଙ୍କ ଝିଅ-ଜ୍ବାଇଁ କହି ଉଭୟ ଗତ ୨୦୨୩ ଜାନୁଆରୀ ୧୨ରେ ଇଏସଏଲ ବୋକାରୋ କମ୍ପାନୀ ସହ ୨୮୩ କୋଟି ଟଙ୍କାର ଏକ ଚୁକ୍ତି ସ୍ବାକ୍ଷର କରିଛନ୍ତି। ଯାହାର ପ୍ରାମାଣ ପୋଲିସ ପାଇବା ସହ କୋର୍ଟରେ ଦାଖଲ କରିଛି। ଏବେ ଇନ୍‌ଫୋସିଟି ପୋଲିସ ଠକ ଯୋଡ଼ିଙ୍କ ନାଁରେ ମାମଲା ରୁଜୁ କରି ଯୁବତୀ ଚାଲାଣର ତଦନ୍ତ ଆରମ୍ଭ କରିଛି।