ବିଲେଇ ନଅ ଶହ ମୂଷା ଖାଇବା ପରେ ହଜ୍:ଖଡଗେ……

ରିପୋର୍ଟ କାର୍ଡ / ନୂଆଦିଲ୍ଲୀ

କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଶନିବାର ଦିନ ସଂସଦରେ ୨୦୨୫-୨୬ ଆର୍ଥିକ ବର୍ଷ ପାଇଁ ବଜେଟ୍ ଉପସ୍ଥାପନ କରିଛନ୍ତି। ତାଙ୍କ ବଜେଟ୍ ଭାଷଣ ପରେ ବିରୋଧୀ ଦଳ ନିର୍ମଳା ସୀତାରମଣଙ୍କୁ ଟାର୍ଗେଟ କରିଛନ୍ତି। ଏହି ପରିପ୍ରେକ୍ଷୀରେ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେଙ୍କ ପ୍ରତିକ୍ରିୟା ମଧ୍ୟ ସାମ୍ନାକୁ ଆସିଛି। ଯେଉଁଥିରେ ସେ କଟାକ୍ଷ ମାଧ୍ୟମରେ କେନ୍ଦ୍ରର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସରକାରଙ୍କୁ ଟାର୍ଗେଟ କରିଛନ୍ତି ଏବଂ ବଜେଟର ତ୍ରୁଟି ମଧ୍ୟ ଦର୍ଶାଇଛନ୍ତି। ମଲ୍ଲିକାର୍ଜୁନ୍ ଏକ୍ସରେ ଏକ ପୋଷ୍ଟ କରି କେନ୍ଦ୍ର ବଜେଟର ୧୨ ତ୍ରୁଟି ଉଲ୍ଲେଖ କରିଛନ୍ତି। ଏହି ପୋଷ୍ଟରେ ସେ ମେକ୍ ଇନ୍ ଇଣ୍ଡିଆର ନାମ ପରିବର୍ତ୍ତନ ପାଇଁ କେନ୍ଦ୍ର ସରକାର ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଟାର୍ଗେଟ କରିଛନ୍ତି। ମଲ୍ଲିକାର୍ଜୁନ ବିଲେଇ ନଅ ଶହ ମୂଷା ଖାଇବା ପରେ ହଜ୍ ପାଇଁ ବାହାରିଛି। ସେ କହିଛନ୍ତି ଯେ ଗତ ୧୦ବର୍ଷ ମଧ୍ୟରେ ମୋଦୀ ସରକାର ମଧ୍ୟବିତ୍ତଙ୍କଠାରୁ ୫୪.୧୮ ଲକ୍ଷ କୋଟି ଟଙ୍କା ଆୟକର ସଂଗ୍ରହ କରିଛନ୍ତି ଏବଂ ବର୍ତ୍ତମାନ ୧୨ ଲକ୍ଷ ଟଙ୍କା ଛାଡ୍ କରୁଥିବା ଘୋଷଣା କରିଛନ୍ତି। ଏହା ଅନୁଯାୟୀ ଅର୍ଥମନ୍ତ୍ରୀ ନିଜେ କହୁଛନ୍ତି ଯେ, ୮୦,୦୦୦ ଟଙ୍କା ବର୍ଷ ସଞ୍ଚୟ ହେବ। ଏହାର ଅର୍ଥ ପ୍ରତ୍ୟେକ ମାସରେ ୬,୬୬୬ ଟଙ୍କା ସଞ୍ଚୟ ହେ। ବଜେଟ ଦ୍ବାରା ଲୋକଙ୍କ ଆଖିରେ ଧୂଳି ପକାଇବାକୁ ଏକ ପ୍ରୟାସ କରାଯାଇଛି। ଦରଦାମ ବୃଦ୍ଧି ଏବଂ ବେକାରୀ ସମସ୍ୟା ସହ ସମଗ୍ର ଦେଶ ସଂଘର୍ଷ କରୁଛି। କିନ୍ତୁ ମିଥ୍ୟା ପ୍ରଶଂସା ସଂଗ୍ରହ କରିବାକୁ ମୋଦୀ ସରକାର ଆଗ୍ରହୀ। ବଜେଟରେ ଥିବା ତ୍ରୁଟିକୁ ଲୁଚାଇବା ପାଇଁ ‘ମେକ୍ ଇନ୍ ଇଣ୍ଡିଆ’ ବଦଳରେ ଏହାକୁ ‘ନ୍ୟାସନାଲ ମାନ୍ୟୁଫାକଚରିଂ ମିଶନ’ କରାଯାଇଛି। ବଜେଟରେ ଯୁବବର୍ଗମାନଙ୍କ ପାଇଁ କିଛି ନାହିଁ। ଏହି ବଜେଟରେ ମହିଳାଙ୍କ ସଶକ୍ତିକରଣ ପାଇଁ ସେ ବଡ଼ ପଦକ୍ଷେପ ନେବେ ବୋଲି ଗତକାଲି ମୋଦୀ କହିଥିଲେ, କିନ୍ତୁ ବଜେଟରେ ଏହିପରି କିଛି ନାହିଁ। କୃଷକଙ୍କ ଆୟକୁ ଦ୍ୱିଗୁଣିତ କରିବାକୁ କୌଣସି ରୋଡମ୍ୟାପ ନାହିଁ। କୃଷିଜାତ ଦ୍ରବ୍ୟ ଉପରେ ଜିଏସ୍‌ଟି ହାରରେ କୌଣସି ରିହାତି ଦିଆଯାଇ ନାହିଁ। ସ୍ୱାସ୍ଥ୍ୟ, ଶିକ୍ଷା, ଦଳିତଙ୍କ ଛାତ୍ରବୃତ୍ତି, ଆଦିବାସୀ, ପଛୁଆ ବର୍ଗ, ଗରିବ ଏବଂ ସଂଖ୍ୟାଲଘୁ ପିଲାମାନଙ୍କ ପାଇଁ କୌଣସି ଯୋଜନା ନାହିଁ। ବେସରକାରୀ ନିବେଶକୁ କିପରି ବୃଦ୍ଧି କରାଯିବ ସେଥିପାଇଁ କୌଣସି ସଂସ୍କାରମୂଳକ ପଦକ୍ଷେପ ନାହିଁ। ରପ୍ତାନି ଏବଂ ଶୁଳ୍କ ଉପରେ କିଛି ଅତିରିକ୍ତ କଥା କହି ବଜେଟର ବିଫଳତାକୁ ଲୁଚା ଯାଇଛି। ଗରିବଙ୍କ ଆୟ ବୃଦ୍ଧି ପାଇଁ କିଛି କରାଯାଇ ନାହିଁ। କ୍ରମାଗତ ଭାବରେ ହ୍ରାସ ହେଉଥିବା ଖର୍ଚ୍ଚ ଉପରେ ଗୋଟିଏ ବି ପଦକ୍ଷେପ ନିଆଯାଇ ନାହିଁ। ଦରଦାମ ବୃଦ୍ଧି ସତ୍ତ୍ବେ ମନରେଗାର ବଜେଟ୍ ସମାନ ରହିଛି। ଶ୍ରମିକମାନଙ୍କ ଆୟ ବୃଦ୍ଧି ପାଇଁ କିଛି କରାଯାଇ ନାହିଁ। ଏକାଧିକ ହାରରେ କୌଣସି ସଂସ୍କାର ବିଷୟରେ ଆଲୋଚନା ହୋଇନାହିଁ। ବେରୋଜଗାରୀ ହ୍ରାସ ପାଇଁ ଚାକିରି ବୃଦ୍ଧି ବିଷୟରେ କୌଣସି ଆଲୋଚନା ହୋଇନାହିଁ। ଷ୍ଟାର୍ଟଅପ୍ ଇଣ୍ଡିଆ, ଷ୍ଟାଣ୍ଡଅପ୍ ଇଣ୍ଡିଆ, ସ୍କିଲ୍ ଇଣ୍ଡିଆ ସମସ୍ତ ଯୋଜନା କେବଳ ଘୋଷଣା ବୋଲି ପ୍ରମାଣିତ ହୋଇଛି ବୋଲି କଂଗ୍ରେସ ସଭାପତି କହିଛନ୍ତି।