ଖୁବ୍‌ଶୀଘ୍ର ଓଡ଼ିଶାରେ ଇଭି ନୀତି ୨.୦…..

ରିପୋର୍ଟ କାର୍ଡ / ଭୁବନେଶ୍ୱର

ଖୁବ୍‌ଶୀଘ୍ର ରାଜ୍ୟ ସରକାର ଓଡ଼ିଶା ଇଭି ନୀତି ୨.୦ ଆଣିବାକୁ ଯାଉଛନ୍ତି। ଆସନ୍ତା ଡିସେମ୍ବରରେ ଓଡ଼ିଶା ଇଭି ନୀତି,୨୦୨୧ ଶେଷ ହୋଇଥିବାରୁ ଏହା ପୂର୍ବରୁ ନୂଆ ନୀତି ପ୍ରସ୍ତୁତ କରିବାକୁ ଆଜିଠାରୁ ମାନସମନ୍ଥନ ଆରମ୍ଭ ହୋଇଛି। ରାଜ୍ୟ ସରକାରଙ୍କ ପ୍ରଥମ ଓଡ଼ିଶା ଇଭି ନୀତି ଆଶାନୁରୂପ ସଫଳ ହୋଇନଥିବାରୁ ଦ୍ବିତୀୟ ଇଭି ନୀତିକୁ ଅଧିକ ଆକର୍ଷଣୀୟ କରିବା ସହ ଲମ୍ବା ସମୟକୁ ନଜରରେ ରଖି ପ୍ରସ୍ତୁତ କରିବାକୁ ନିଷ୍ପତ୍ତି ହୋଇଛି। ବାଣିଜ୍ୟ ଓ ପରିବହନ ବିଭାଗ ବିଭାଗ ପ୍ରମୁଖ ସଚିବ ଉଷା ପାଢ଼ୀ ଏବଂ ଶକ୍ତି ବିଭାଗ ପ୍ରମୁଖ ସଚିବ ବିଶାଲ ଦେବଙ୍କ ସହ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ନିଷ୍ପତ୍ତି ହୋଇଛି ଯେ ୨୦୩୬ ସୁଦ୍ଧା ରାଜ୍ୟରେ ମୋଟ୍ ଗାଡ଼ି ପଞ୍ଜୀକରଣର ୫୦% ଇଭି ଗାଡ଼ି ହେବ। ଏଥିପାଇଁ କେଉଁ କେଉଁ ବିଭାଗ କ’ଣ କରିବେ, ଗାଡ଼ି କ୍ରେତାଙ୍କୁ ସବ୍‌ସିଡି ଦିଆଯିବ, ଅଧିକ ଚାର୍ଜିଂ ଷ୍ଟେସନ ବସାଇବା ଠାରୁ ଆରମ୍ଭ କରି ଅନ୍ୟାନ୍ୟ ଆନୁଷଙ୍ଗିକ ସୁବିଧା ସୁଯୋଗ ଯୋଗାଇବା ଉପରେ ଆଲୋଚନା ହୋଇଛି। ଏପରିକି ଇଭି ଯାନ ଉପରେ ଅଧିକ ସବ୍‌ସିଡି ପ୍ରଦାନ କରିବା, ଚାର୍ଜିଂ ପଏଣ୍ଟ ପାଇଁ ଅଧିକ ଆର୍ଥିକ ସହାୟତା ଦେବା ଉପରେ ଆଲୋଚନା ହୋଇଛି। ବୈଠକରୁ ଜଣାପଡ଼ିଛି ‌ଯେ ୨୦୨୧ରେ ରାଜ୍ୟରେ ଇଭି ଯାନ ପଞ୍ଜୀକରଣ ସଂଖ୍ୟା ୧.୧୬% ଥିବାବେଳେ ୨୦୨୫ ସୁଦ୍ଧା ୮.୭୧% ହୋଇଛି। ରାଜ୍ୟରେ ଏବେ ଦୁଇ ଚକିଆ ଓଇଏମ୍‌, ଡିସକମ୍‌, ତୈଳ ମା‌ର୍କେଟିଂ କମ୍ପାନିଗୁଡ଼ିକ ଦ୍ବାରା ମୋଟ୍ ୫୫୦ରୁ ଅଧିକ ପବ୍ଲିକ ଚାର୍ଜିଂ ଷ୍ଟେସନ ଅଛି। ଏହାବାଦ୍ ଏସ୍‌ଟିଏ ବିଭିନ୍ନ ସ୍ଥାନରେ ଚାର୍ଜିଂ ଷ୍ଟେସନ ବସାଇବାକୁ ଯୋଜନା କରିଛି। ଯେପରି ସହରାଞ୍ଚଳ ଏବଂ ଅର୍ଦ୍ଧ ସହରାଞ୍ଚଳ (ଉପକଣ୍ଠରେ) ଯେପରି ଅଧିକ ଚାର୍ଜିଂ ଷ୍ଟେସନ ହେବ ସେନେଇ ଅାବଶ୍ୟକ ପଦକ୍ଷେପ ନିଆଯିବ। ରାଜ୍ୟ ସରକାର ପ୍ରଧାନମନ୍ତ୍ରୀ ଇ-ଡ୍ରାଇଭ୍ ଯୋଜନାକୁ ସକ୍ରିୟ ଭାବେ ଲାଗୁ କରିବେ। ଏହାସହ ଓଡ଼ିଶାକୁ ଦେଶର ଏକ ମଡେଲ୍ ଇଭି ଇକୋସିଷ୍ଟମ ରାଜ୍ୟରେ ପରିଣତ କରିବାକୁ ସମସ୍ତ ପଦକ୍ଷେପ ନିଆଯିବ ବୋଲି ନିଷ୍ପତ୍ତି ହୋଇଛି।