ସରକାରଙ୍କୁ ଅଭିଜିତ ଦୀପକେଙ୍କ ବଡ଼ ଚ୍ୟାଲେଞ୍ଜ….

ରିପୋର୍ଟ କାର୍ଡ / ନୂଆଦିଲ୍ଲୀ

‘କକରୋଚ ଜନତା ପାର୍ଟି’ (CJP)ର ପ୍ରତିଷ୍ଠାତା ଅଭିଜିତ ଦୀପକେ କେନ୍ଦ୍ର ସରକାରଙ୍କୁ ଚେତାବନୀ ଦେଇ କହିଛନ୍ତି ଯେ ସେମାନଙ୍କୁ ଭୟଭୀତ କରିବାକୁ ଚେଷ୍ଟା କରା ନ ଯାଉ। CJPର ମୁଖପାତ୍ର ସୌରଭ ଦାସ ଏବଂ ଆଶୁତୋଷ ରଙ୍କା ‘X’ (ଟୁଇଟର)ରେ ପୋଷ୍ଟ କରି ଦାବି କରିଛନ୍ତି ଯେ ସରକାର ଅଭିଜିତ ଦୀପକେ, ରତ୍ନ ସିଂହ, ସେମାନେ ନିଜେ ଏବଂ ଅନ୍ୟାନ୍ୟ CJP ନେତାଙ୍କୁ ଗିରଫ କରିବାକୁ ଯୋଜନା କରୁଛନ୍ତି। ଏହାର ଜବାବରେ ଦୀପକେ କହିଛନ୍ତି ଯେ ଯଦି ସରକାର ଭାବୁଛନ୍ତି ଯେ UAPA, NSA କିମ୍ବା ଜେଳର ଭୟ ଦେଖାଇ ସେମାନଙ୍କୁ ଚୁପ କରାଯାଇପାରିବ, ତେବେ ସେମାନେ ଭୁଲ ଭାବୁଛନ୍ତି। ଦୀପକେ କହିଛନ୍ତି, ‘ଆମେ ଯେକୌଣସି ପରିସ୍ଥିତିର ମୁକାବିଲା କରିବାକୁ ପ୍ରସ୍ତୁତ ଏବଂ ଆବଶ୍ୟକ ହେଲେ ମାସ ମାସ କିମ୍ବା ବର୍ଷ ବର୍ଷ ଧରି ଜେଲରେ ରହିବାକୁ ମଧ୍ୟ ପ୍ରସ୍ତୁତ ଅଛୁ, କିନ୍ତୁ ଗଣତନ୍ତ୍ରକୁ ବଞ୍ଚାଇବା ପାଇଁ ଆମର ଲଢ଼େଇରୁ ଆମେ ପଛଘୁଞ୍ଚା ଦେବୁ ନାହିଁ। ଆମେ ମହାତ୍ମା ଗାନ୍ଧୀଙ୍କ ଦେଖାଇଥିବା ପଥ ଅନୁସରଣ କରୁଛୁ ଏବଂ ସରକାର ଆମକୁ ଯେତେ ଭୟଭୀତ କରିବାକୁ ଚେଷ୍ଟା କଲେ ମଧ୍ୟ ଆମେ ଶାନ୍ତିପୂର୍ଣ୍ଣ ଓ ଅହିଂସାତ୍ମକ ଭାବେ ପ୍ରତିବାଦ ଜାରି ରଖିବୁ।’ ‘କକରୋଚ ଜନତା ପାର୍ଟି’ (CJP) ଘୋଷଣା କରିଛି ଯେ ଅକ୍ଟୋବର ୧୦ରେ ଦିଲ୍ଲୀରେ ହେବାକୁ ଥିବା ଏହାର ପ୍ରସ୍ତାବିତ ବିକ୍ଷୋଭ ଶାନ୍ତିପୂର୍ଣ୍ଣ ହେବ। ମୁକ୍ତ ଓ ନିରପେକ୍ଷ ନିର୍ବାଚନକୁ ସମର୍ଥନ କରୁଥିବା ପ୍ରତ୍ୟେକ ନାଗରିକଙ୍କୁ ଏହି ବିକ୍ଷୋଭରେ ସାମିଲ ହେବା ପାଇଁ CJP ଆହ୍ବାନ ଜଣାଇଛି। ଦୀପକେ କହିଛନ୍ତି ଯେ ଯଦି ଜ୍ଞାନେଶ କୁମାର ଇସ୍ତଫା ନ ଦିଅନ୍ତି, ତେବେ ଦେଶର ବିଭିନ୍ନ ପ୍ରାନ୍ତରୁ ନାଗରିକ ଓ ସଂଗଠନର ସଦସ୍ୟମାନେ ନୂଆଦିଲ୍ଲୀରେ ଏକତ୍ରିତ ହେବେ ଏବଂ ଜନ୍ତର ମନ୍ତର ଠାରେ ଏକ ବିଶାଳ ବିକ୍ଷୋଭ ପ୍ରଦର୍ଶନ କରିବେ। ସିଜେପି (CJP)ର ମୁଖପାତ୍ର ସୌରଭ ଦାସ ପୂର୍ବରୁ ଦାବି କରିଥିଲେ ଯେ ସରକାର ତାଙ୍କୁ, ଅଭିଜିତ ଦୀପକେ, ଆଶୁତୋଷ ରଙ୍କା, ରତ୍ନା ଏବଂ ‘କକରୋଚ ଜନତା ପାର୍ଟି’ର ଅନ୍ୟ ନେତାମାନଙ୍କୁ ଗିରଫ କରିବାକୁ ଯୋଜନା କରୁଛନ୍ତି। ‘ଏକ୍ସ’ (X)ରେ ଏକ ପୋଷ୍ଟ କରି ସେ ଲେଖିଥିଲେ, ‘ଯଦି ସରକାର ଭାବୁଛନ୍ତି ଯେ ଏଭଳି ଏକଛତ୍ରବାଦୀ ପଦକ୍ଷେପ କାମ କରିବ, ତେବେ ସେମାନେ ଭୁଲ ଭାବୁଛନ୍ତି। ଦେଶର ଯୁବସମାଜ ଜାଗ୍ରତ ହୋଇସାରିଛି। ଆମେ ସମସ୍ତଙ୍କୁ ଅନୁରୋଧ କରୁଛୁ ଯେ ଆମେ ରହୁ ବା ନ ରହୁ, ନିଜର ଅଧିକାର ଏବଂ ଏକ ଉତ୍ତମ ଭବିଷ୍ୟତ ପାଇଁ ସଂଘର୍ଷ ଜାରି ରଖନ୍ତୁ। ଆମେ ସର୍ବଦା ଜେଲ ଯିବାକୁ କିମ୍ବା ତା’ଠାରୁ ମଧ୍ୟ ଖରାପ ପରିଣାମର ସାମ୍ନା କରିବାକୁ ପ୍ରସ୍ତୁତ ରହିଛୁ, କିନ୍ତୁ ଏହା ସରକାରଙ୍କ ପାଇଁ ଏକ ବଡ଼ ଭୁଲ ସାବ୍ୟସ୍ତ ହେବ, କାରଣ ଦେଶର ଯୁବସମାଜ ଏହାକୁ କଦାପି ସହ୍ୟ କରିବେ ନାହିଁ।’