ଆନ୍ଧ୍ର ପ୍ରଦେଶରେ ଚିହ୍ନଟ ହେଲା ଓମିକ୍ରନ୍‌ ମାମଲା……

ରିପୋର୍ଟ କାର୍ଡ / ନୂଆଦିଲ୍ଲୀ

ଆଜି ଆନ୍ଧ୍ର ପ୍ରଦେଶରେ ରାଜ୍ୟର ପ୍ରଥମ ‘ଓମିକ୍ରନ୍‌ ଆକ୍ରାନ୍ତ ଚିହ୍ନଟ ହୋଇଛନ୍ତି | ଆୟର୍ଲାଣ୍ଡ୍‌ରୁ ଫେରିଥିବା ଜଣେ ୩୪ ବର୍ଷିୟ ବ୍ୟକ୍ତିଙ୍କ ନମୁନାରେ ଓମିକ୍ରନ୍‌ ଭେରିଏଣ୍ଟ୍‌ ଚିହ୍ନଟ ହୋଇଥିବା ଜଣାପଡ଼ିଛି। ଆକ୍ରାନ୍ତଙ୍କ ଶରୀରରେ କୌଣସି ଲକ୍ଷଣ ଦେଖା ଯାଇ ନ ଥିଲା ଏବଂ ଶନିବାର ଦିନ କରୋନାଭାଇରସ୍‌ ‘ଆର୍‌ଟି-ପିସିଆର୍‌’ ଟେଷ୍ଟ୍‌ରେ ‘ନେଗେଟିଭ୍‌’ ଆସିଥିଲେ। ପ୍ରାପ୍ତ ସୂଚନା ଅନୁସାରେ, ଏପର୍ଯ୍ୟନ୍ତ ବିଦେଶରୁ ଆନ୍ଧ୍ର ପ୍ରଦେଶକୁ ଆସିଥିବା ଯାତ୍ରୀମାନଙ୍କ ମଧ୍ୟରୁ ୧୫ଜଣ କୋଭିଡ୍‌-୧୯ ପଜିଟିଭ୍‌ ଚିହ୍ନଟ ହୋଇଛନ୍ତି। ୧୫ଟିଯାକ ନମୁନା ‘ଗୁଣସୂତ୍ର-କ୍ରମ’ ନିର୍ଦ୍ଧାରଣ ପାଇଁ ପଠାଯାଇଛି। ସେଥିରୁ ଆସିଥିବା ୧୦ଟି ନମୁନାରୁ ମାତ୍ର ଗୋଟିଏରେ ‘ଓମିକ୍ରନ୍‌ ଭେରିଏଣ୍ଟ୍‌’ ଚିହ୍ନଟ ହୋଇଛି। ଆନ୍ଧ୍ର ପ୍ରଦେଶର ପ୍ରଥମ ‘ଓମିକ୍ରନ୍‌’ ମାମଲାର ଉକ୍ତ ୩୪ ବର୍ଷିୟ ବ୍ୟକ୍ତିଜଣକ ଆୟର୍ଲାଣ୍ଡ୍‌ରୁ ସିଧା ବିଶାଖାପାଟଣା ଆସି ନ ଥିଲେ। ପ୍ରଥମେ ସେ ମୁମ୍ବାଇ ବିମାନ ବନ୍ଦରରେ ଅବତରଣ କରିଥିଲେ। ସେଠାରେ ତାଙ୍କର ନମୁନା ପରୀକ୍ଷା କରାଯିବା ପରେ ସେ ନେଗେଟିଭ୍‌ ବୋଲି ଜଣାପଡ଼ିଥିଲା। ତେଣୁ, ନଭେମ୍ବର ୨୭ ତାରିଖ ଦିନ ତାଙ୍କୁ ବିଶାଖାପାଟଣା ଯିବାକୁ ଅନୁମତି ମିଳିଥିଲା।