ପୁଣି ନିୟୋଜିତ ହେବେ ଟ୍ରାଫିକ୍‌ ଷ୍ଟୁଡେଣ୍ଟ ଭଲ୍ୟୁଣ୍ଟିୟର୍‍….

ରିପୋର୍ଟ କାର୍ଡ / ଭୁବନେଶ୍ବର

ରାଜଧାନୀରେ ଟ୍ରାଫିକ ସମସ୍ୟା ଦୂର କରିବା ଲାଗି କର୍ମଚାରୀ ଅଭାବ ଏକ ମୁଖ୍ୟ କାରଣ ସାଜିଛି। ତେଣୁ ଟ୍ରାଫିକ ସମସ୍ୟାରୁ ଦୂରକରିବା ଲାଗି ପୁଣି ଫେରୁଛନ୍ତି ଷ୍ଟୁଡେଣ୍ଟ ଭଲ୍ୟୁଣ୍ଟିୟର। କଟକ-ଭୁବନେଶ୍ଵରରେ ଥିବା ବିଭିନ୍ନ କଲେଜର ୨ଶହ ଛାତ୍ରଛାତ୍ରୀ ଯୋଗଦେବେ। ପ୍ରଥମ ପର୍ଯ୍ୟାୟରେ ଭୁବନେଶ୍ୱରରେ ୧୦୦ ଓ କଟକରେ ୧୦୦ଜଣ ଟ୍ରାଫିକକୁ ଷ୍ଟୁଡେଣ୍ଟ ଭଲ୍ୟୁଣ୍ଟିୟରଙ୍କୁ ନିୟୋଜିତ କରାଯିବ। ପରବର୍ତ୍ତୀ ସମୟ ଅର୍ଥାତ୍‍ କରୋନା ପ୍ରକୋପକୁ ଦୃଷ୍ଟିରେ ଆଉ ଷ୍ଟୁଡେଣ୍ଟ ଭଲ୍ୟୁଣ୍ଟିୟରଙ୍କୁ ବଢ଼଼ାଇ ଦିଆଯିବ ବୋଲି ସୂଚନା ମିଳିଛି। ସେହିପରି ସକାଳେ ଓ ସନ୍ଧ୍ୟାକୁ ମିଶାଇ ୬ଘଣ୍ଟା ଷ୍ଟୁଡେଣ୍ଟ ଭଲ୍ୟୁଣ୍ଟିୟର କାର୍ଯ୍ୟ କରିବେ। ତେବେ ଗୋଟିଏ ମାସରେ ସେମାନେ ୧୬ଦିନ କାର୍ଯ୍ୟ କରିବେ। ପ୍ରତିଦିନ ୧୦୦ ଟଙ୍କା ଲେଖାଏଁ ହିସାବରେ ମାସକୁ ୧୬୦୦ ଟଙ୍କା ସେମାନଙ୍କୁ ଦିଆଯିବ। ଓଡ଼ିଶା ସଡ଼କ ସୁରକ୍ଷା ସୋସାଇଟି ଫାଣ୍ଡିରୁ ଏହି ଟଙ୍କା ଯୋଗାଇ ଦେବେ ବୋଲି ସୂଚନା ମିଳିଛି । ଏନେଇ କମିସନରେଟ୍‍ ପୋଲିସ ପକ୍ଷରୁ ପରିବହନ ବିଭାଗକୁ ଚିଠି ଲେଖି ଅବଗତ କରାଯାଇଛି । ପରିବହନ ବିଭାଗ ସବୁଜ ସଙ୍କେତ ଦେବା ସହ ଷ୍ଟୁଡେଣ୍ଟ ଭଲ୍ୟୁଣ୍ଟିୟରଙ୍କୁ ନିୟୋଜିତ କରିବା ଦିଗରେ କାର୍ଯ୍ୟ କରିବାକୁ ପୋଲିସକୁ କହିଛି। ସେଭଳି ଇଚ୍ଛୁକ ଥିବା ଷ୍ଟୁଡେଣ୍ଟ ଭଲ୍ୟୁଣ୍ଟିୟରମାନେ ଆବେଦନ କରିବା ସହ କେଉଁ କଲେଜର ପିଲା ତାହା ଲେଖିବେ। ଏଥିସହିତ ସେ ପଢ଼଼ୁଥିବା କଲେଜ ନିକଟର ୩ଟି ଟ୍ରାଫିକ ପୋଷ୍ଟକୁ ଚୟନ କରିବାକୁ କହାଯିବ। ଏହାପରେ ପୁଲିସ ପକ୍ଷରୁ ସେମାନଙ୍କୁ ଗୋଟିଏ ଛକର ଦାୟିତ୍ୱ ଦିଆଯିବ ସହ ସେଠାରେ ମୁତୟନ କରାଯିବ ବୋଲି ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତିି।ଉଲ୍ଲେଖଯୋଗ୍ୟ- ପୂର୍ବରୁ ରାଜଧାନୀରେ ୩୫୦ରୁ ଊର୍ଦ୍ଧ୍ବ ଷ୍ଟୁଡେଣ୍ଟ ଭଲ୍ୟୁଣ୍ଟିୟର ନିୟୋଜିତ ଥିଲେ। ମାତ୍ର କରୋନା ମହାମାରୀ ଯୋଗୁଁ ସେମାନଙ୍କ ସୁରକ୍ଷା ଦୃଷ୍ଟିରୁ କାର୍ଯ୍ୟରୁ ଅବ୍ୟାହତ ଦିଆଯାଇଥିଲା। ଏମିତିକି କଲେଜ ବନ୍ଦ ହେବାରୁ ଛାତ୍ରଛାତ୍ରୀମାନେ ଘରକୁ ଫେରିଯାଇଥିଲେ। ତେଣୁ ନିର୍ଦ୍ଦିଷ୍ଟ ସମୟ ଯାଏଁ ଷ୍ଟୁଡେଣ୍ଟ ଭଲ୍ୟୁଣ୍ଟିୟରଙ୍କୁ ଆଉ ଫେରାଇ ଆଣିବାର ପ୍ରକ୍ରିୟା ଆରମ୍ଭ କରାଯାଇ ନ ଥିଲା। ତେବେ ପରିବହନ ବିଭାଗ ଅନୁମତି ଦେବା ପରେ ପୁଣି ଟ୍ରାଫିକ କାର୍ଯ୍ୟରେ ଯୋଗଦେବେ ଷ୍ଟୁଡେଣ୍ଟ ଭଲ୍ୟୁଣ୍ଟିୟର।