ହିରୋସିମାଠାରୁ ଶକ୍ତିଶାଳୀ ପରମାଣୁ ବୋମା ତିଆରି କରିବ ଆମେରିକା……

ରିପୋର୍ଟ କାର୍ଡ / ନୂଆଦିଲ୍ଲୀ

ପେଣ୍ଟାଗନ୍ ଏକ ନୂତନ ସୁପର-ଶକ୍ତିଶାଳୀ ପରମାଣୁ ବୋମା ତିଆରି କରିବାକୁ ଯୋଜନା କରୁଛି | ଯାହା ୧୯୪୫ ମସିହାରେ ହିରୋସିମାରେ ବ୍ୟବହୃତ ବୋମାଠାରୁ ୨୪ ଗୁଣ ଅଧିକ ଶକ୍ତିଶାଳୀ। ୨୦୩୦ ସୁଦ୍ଧା ଚୀନ୍ ନିଜର ପରମାଣୁ ଅସ୍ତ୍ରଶସ୍ତ୍ରକୁ ଦ୍ୱିଗୁଣିତ କରି ୧୦୦୦ରୁ ଅଧିକ କରିବାକୁ ଘୋଷଣା କରିବା ପରେ ଆମେରିକା ପକ୍ଷରୁ ଏଭଳି ଘୋଷଣା କରାଯାଇଛି। ଆମେରିକର ପ୍ରତିରକ୍ଷା ବିଭାଗ ଘୋଷଣା କରିଛି ଯେ ଆମେରିକା ବି୬୧ ନାଭିକୀୟ ମାଧ୍ୟାକର୍ଷଣ ବୋମାର ଏକ ଆଧୁନିକ ରୂପକୁ ଅନୁସରଣ କରିବ, ଯାହାକୁ ବି୬୧-୧୩ ଭାବେ ନାମିତ କରାଯାଇଛି। ତେବେ ଏଥିପାଇଁ କଂଗ୍ରେସର ଅନୁମୋଦନକୁ ଅପେକ୍ଷା କରାଯାଇଛି। ଶକ୍ତି ବିଭାଗର ନ୍ୟାସନାଲ ନ୍ୟୁକ୍ଲିୟର ସିକ୍ୟୁରିଟି ଆଡମିନିଷ୍ଟ୍ରେସନ (ଏନଏନଏସଏ) ବି୬୧-୧୩ ଉତ୍ପାଦନ କରିବ ବୋଲି ପ୍ରତିରକ୍ଷା ବିଭାଗ ପକ୍ଷରୁ କୁହାଯାଇଛି। ଆମେରିକାର ବି୬୧-୧୩ ନାମକ ଏହି ନୂଆ ବୋମାକୁ ଅତ୍ୟାଧୁନିକ ଯୁଦ୍ଧବିମାନରୁ ଖସାଇ ଦିଆଯିବ। ଏଥିପାଇଁ ଦାମୀ ବି-୨୧ ରେଡର୍ ଷ୍ଟେଲ୍ ବୋମାବର୍ଷୀ ବିମାନ ଏବେ ତିଆରି ଚାଲିଛି | ଯେଉଁଥିରେ ୬୯୨ ନିୟୁତ ଡଲାର ଖର୍ଚ୍ଚ ହେବ। ପେଣ୍ଟାଗନ୍ ଏକ ବିବୃତିରେ କହିଛି ଯେ ଏହି ବୋମା ତିଆରି ହେଲା ପରେ ଶତ୍ରୁପକ୍ଷ ଆମେରିକାକୁ ଚ୍ୟାଲେଞ୍ଜ କରିବାକୁ ଭୟ କରିବେ। ତେବେ ମହାକାଶ ନୀତିର ସହକାରୀ ପ୍ରତିରକ୍ଷା ସଚିବ ନୂଆ ଅସ୍ତ୍ର ବିଷୟରେ ଆଲୋଚନା କରିବା ବେଳେ ଚୀନ୍ କିମ୍ବା ରୁଷ୍ ବିଷୟରେ ଉଲ୍ଲେଖ କରିନାହାନ୍ତି। ବି୬୧-୧୩ ବିକଶିତ କରିବାର ଏହି ନିଷ୍ପତ୍ତି କୌଣସି ଏକ ନିର୍ଦ୍ଦିଷ୍ଟ ଘଟଣା କାରଣରୁ ହୋଇନଥିଲା। ଏହା ବିଶ୍ୱର ନିରାପତ୍ତା ସ୍ଥିତିର ନିରନ୍ତର ମୂଲ୍ୟାଙ୍କନ ଉପରେ ଆଧାରିତ। ଏହି କ୍ରମାଗତ ପରିବର୍ତ୍ତନଶୀଳ ବିଶ୍ୱରେ ଆମେ ଶକ୍ତିଶାଳୀ ଓ ସୁରକ୍ଷିତ ରହିବାକୁ ଚାହୁଁଛୁ ବୋଲି ପେଣ୍ଟାଗନ୍ କହିଛି।