କଂଗ୍ରେସ ମୁଖିଆ ପଦରୁ ଇସ୍ତଫା ଦେଲେ ଅଧୀର….

ରିପୋର୍ଟ କାର୍ଡ / ନୂଆଦିଲ୍ଲୀ

ଲୋକସଭା ନିର୍ବାଚନରେ କ୍ରିକେଟର ୟୁସୁଫ ପଠାନଙ୍କ ଠାରୁ ପରାସ୍ତ ହୋଇଥିବା କଂଗ୍ରେସର ବରିଷ୍ଠ ନେତା ଅଧୀର ରଞ୍ଜନ ଚୌଧୁରୀ ଦଳର ପଶ୍ଚିମବଙ୍ଗ ର ମୁଖିଆ ପଦରୁ ଇସ୍ତଫା ଦେଇଛନ୍ତି। ଇସ୍ତଫା ଦେବା ପୂର୍ବରୁ ସେ ରାଜ୍ୟ କଂଗ୍ରେସର ପଦାଧିକାରୀଙ୍କ ସହ ବୈଠକ କରିଥିଲେ। ବୈଠକରେ ନିକଟରେ ଶେଷ ହୋଇଥିବା ଲୋକସଭା ନିର୍ବାଚନରେ ଦୁର୍ବଳ ପ୍ରଦର୍ଶନର ସମୀକ୍ଷା ହୋଇଥିଲା। ବୈଠକ ପରେ ଅଧୀର ନିଜ ପଦରୁ ଇସ୍ତଫା ଦେଇଛନ୍ତି। ଅଧୀର ଇସ୍ତଫା ଦେଇଥିବା ବେଳେ ଏହାକୁ କଂଗ୍ରେସ ହାଇକମାଣ୍ଡ ଗ୍ରହଣ କରିଛନ୍ତି କି ନାହିଁ, ସେକଥା ଜଣାପଡ଼ିନି। ସେହିପରି ଅଧୀରଙ୍କ ସ୍ଥାନରେ କିଏ କଂଗ୍ରେସର ବେଙ୍ଗଲ ମୁଖିଆ ହେବେ, ତା’କୁ ନେଇ ମଧ୍ୟ ଚର୍ଚ୍ଚା ଆରମ୍ଭ ହୋଇ ଯାଇଛି। ନିଜର ଇସ୍ତଫା ଖବରକୁ ନିଶ୍ଚିତ କରି ଶ୍ରୀ ଚୌଧୁରୀ କହିଛନ୍ତି, “ମଲ୍ଲିକାର୍ଜୁନ ଖଡଗେ କଂଗ୍ରେସର ସଭାପତି ହେବା ପରେ ରାଜ୍ୟଗୁଡ଼ିକରେ ସଭାପତି ବୋଲି ଆଉ କେହି ନାହାନ୍ତି। ଯେତେବେଳେ ରାଜ୍ୟରେ ପୂର୍ଣ୍ଣକାଳୀନ ସଭାପତି ନିଯୁକ୍ତ ହେବେ, ସେକଥା ଆପଣମାନେ ଜାଣିପାରିବେ।” ଦିନକ ତଳେ ରାଜ୍ୟସଭା ସାଂସଦ ତଥା କଂଗ୍ରେସର ବରିଷ୍ଠ ନେତା ପି ଚିଦାମ୍ବରମ ପଶ୍ଚିମଙ୍ଗର ସଚିବାଳୟ ନବାନ୍ନଙ୍କୁ ଆସିଥିଲେ। ଏଠାରେ ସେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହ ପ୍ରାୟ ୩୫ ମିନିଟ ଧରି ଆଲୋଚନା କରିଥିଲେ। ଏହି ବୈଠକ ପରେ ହିଁ ଚୌଧୁରୀ କଂଗ୍ରେସ ସଭାପତି ପଦ ଛାଡ଼ିଛନ୍ତି।