ଭାଇବୋହୂକୁ ନେଇ ଦେଢ଼ଶୂର ଫେରାର୍…..

ରିପୋର୍ଟ କାର୍ଡ / ଭୁବନେଶ୍ୱର

ଭାଇବୋହୂକୁ ନେଇ ଦେଢ଼ଶୂର ଫେରାର୍ ହୋଇଯାଇଛନ୍ତି। ମହିଳାଜଣକ ସାଙ୍ଗରେ ନେଇଯାଇଛନ୍ତି ଅଢ଼େଇବର୍ଷର ପୁଅକୁ। କିନ୍ତୁ ଦେଢ଼ଶୂର ନିଜର ସ୍ତ୍ରୀ ପିଲାମାନଙ୍କୁ ଛାଡ଼ି ଚାଲିଯାଇଛନ୍ତି। ମହିଳାଜଣକ ୪ ବର୍ଷ ପୂର୍ବେ ପ୍ରେମ କରି ବିବାହ କରିଥିବା ବେଳେ ସ୍ବାମୀଙ୍କ ବଡ଼ଭାଇକୁ ପୁଣି ଭଲ ପାଇ ଘର ଛାଡ଼ିଛନ୍ତି। ଏମିତି ଏକ ଅଜବ ଘଟଣାକୁ ନେଇ ଆଜି ଭରତପୁର ଥାନାରେ ଅଭିଯୋଗ ହୋଇଛି | ଭରତପୁର ଅଞ୍ଚଳର ଏକ ବସ୍ତିରେ ଘଟିଛି ଏହି ଅଶୋଭନୀୟ ଘଟଣା। ସାନ ଭାଇ ପ୍ରେମ କରି ୪ ବର୍ଷ ତଳେ ବିବାହ କରିଥିଲା। ଅଢ଼େଇ ବର୍ଷ ତଳେ ସେମାନଙ୍କ କୋଳକୁ ଆସିଥିଲା ଏକ ପୁତ୍ର ସନ୍ତାନ। ସବୁ କିଛି ଠିକ୍‌ ଚାଲିଥିଲା। ମାତ୍ର ଏସବୁ ଭିତରେ କେତେବେଳେ ଦେଢ଼ଶୂର ଓ ଭାଇବୋହୂ ମଧ୍ୟରେ ଗଢ଼ିଉଠିଲା ପ୍ରେମସମ୍ପର୍କ। ଲୋକଲଜ୍ଜା ଭୟରେ କଥା ବାହାରକୁ ନଆସିଲେ ମଧ୍ୟ ଘରେ ଆରମ୍ଭ ହୋଇଥିଲା ଝଗଡ଼ା। ସାନଭାଇ ଓ ତା’ ସ୍ତ୍ରୀ ମଧ୍ୟରେ ଯେତିକି ପାଟିତୁଣ୍ଡ ହେଉଥିଲା, ବଡ଼ଭାଇ ଓ ତା’ ସ୍ତ୍ରୀ ମଧ୍ୟରେ ଝଗଡା ହେଉଥିଲା। ପ୍ରାୟ ବର୍ଷେ ହେଲା ଏହି ଝଗଡ଼ାକୁ ଯଥାସମ୍ଭବ ଚାପି ରଖିବାକୁ ଉଦ୍ୟମ ହୋଇଥିଲା। କିନ୍ତୁ ଦେଢ଼ଶୂର ଓ ଭାଇବୋହୂଙ୍କ ପ୍ରେମକୁ ବାଧାଦେବା ସମ୍ଭବ ହୋଇନଥିଲା। ଗତ ଦୁଇ ଦିନ ତଳେ ସେମାନେ ଘର ଛାଡ଼ି ଫେରାର୍ ହୋଇଯାଇଛନ୍ତି । ସାନ ଭାଇ ତା’ ଶ୍ବଶୁର ଘର ସହ ଯୋଗାଯୋଗ କଲା ପରେ ଆଜି ବାପଘର ଲୋକେ ଭରତପୁର ଥାନାରେ ପହଞ୍ଚି ଅଭିଯୋଗ କରିଛନ୍ତି। ପୋଲିସ ମାମଲା ରୁଜୁ କରି ଫେରାର୍ ଭାଇବୋହୂ ଓ ଦେଢ଼ଶୂରଙ୍କ ଫୋନ୍ କଲ୍ ଟ୍ରାକ୍ କରିବା ସହ ଉଭୟଙ୍କୁ ଠାବ କରିବାକୁ ଚେଷ୍ଟା କରୁଛି।