୫୧ ଜଣଙ୍କୁ ସାହସିକତା ପୁରସ୍କାର…..

ରିପୋର୍ଟ କାର୍ଡ / ନୂଆଦିଲ୍ଲୀ

ରାଷ୍ଟ୍ରପତି ଦ୍ରୌପଦୀ ମୁର୍ମୁ ସୋମବାର ୫୧ ଜଣଙ୍କୁ ସାହସିକତା ପୁରସ୍କାର ପ୍ରଦାନ କରିଛନ୍ତି। ରାଷ୍ଟ୍ରପତି ଭବନରେ ଅନୁଷ୍ଠିତ ପ୍ରଥମ ପର୍ଯ୍ୟାୟ ପ୍ରତିରକ୍ଷା ସମ୍ମାନ ପ୍ରଦାନ ସମାରୋହରେ ଶ୍ରୀମତୀ ମୁର୍ମୁ ୭ଜଣଙ୍କୁ କୀର୍ତ୍ତି ଚକ୍ର (ଦୁଇ ଜଣ ମରଣୋତ୍ତର), ୧୫ଜଣ ବୀର ଚକ୍ର (୩ଜଣ ମରଣୋତ୍ତର) ଓ ୨୯ ଜଣଙ୍କୁ ଶୌର୍ଯ୍ୟ ଚକ୍ର (ଜଣେ ମରଣୋତ୍ତର) ସମ୍ମାନରେ ସମ୍ମାନିତ କରିଛନ୍ତି। ସମ୍ମାନିତ ହୋଇଥିବା ବ୍ୟକ୍ତି ବିଶେଷ ସ୍ଥଳସେନା, ନୌସେନା, ବାୟୁସେନା, କେନ୍ଦ୍ରୀୟ ସଶସ୍ତ୍ର ପୁଲିସ ବାହିନୀ ଓ ରାଜ୍ୟ ପୁଲିସ ବାହିନୀରେ ବିଭିନ୍ନ ପଦରେ କାର୍ଯ୍ୟରତ ବା କାର୍ଯ୍ୟରତ ଥିଲେ। କୀର୍ତ୍ତି ଚକ୍ର ପାଇଥିବା ବ୍ୟକ୍ତି ବିଶେଷଙ୍କ ମଧ୍ୟରେ ଅଛନ୍ତି ବାୟୁସେନାର ଗ୍ରୁପ୍ କ୍ୟାପଟେନ୍ (ବର୍ତ୍ତମାନ ଏୟାର କମୋଡୋର) ପ୍ରଶାନ୍ତ ବାଲକ୍ରିଷ୍ଣନ୍ ନାୟାର। ଭାରତର ପ୍ରଥମ ମାନବ ମହାକାଶ ଯାତ୍ରା ମିଶନ ‘ଗଗନଯାନ’ ପାଇଁ ମନୋନୀତ ଚାରିଜଣଙ୍କ ମଧ୍ୟରୁ ସେ ଅନ୍ୟତମ। ସମ୍ମାନିତ ବ୍ୟକ୍ତି ବିଶେଷଙ୍କ ନାମ ଗତ ସାଧାରଣତନ୍ତ୍ର ଦିବସ ଅବସରରେ ଘୋଷଣା କରାଯାଇଥିଲା। ପୁରସ୍କାର ବିତରଣ ଉତ୍ସବରେ ଉପରାଷ୍ଟ୍ରପତି ସିପି ରାଧାକୃଷ୍ଣ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଓ ଅନ୍ୟ ମାନ୍ୟଗଣ୍ୟ ବ୍ୟକ୍ତିବିଶେଷ ଉପସ୍ଥିତ ଥିଲେ।