ସନ୍ଦୀପ ଘୋଷଙ୍କୁ ପ୍ରଶ୍ନ କଲା ସିବିଆଇର,୩ ଘଣ୍ଟା ଅପେକ୍ଷା କରିବାକୁ ପଡ଼ିଲା…..

ରିପୋର୍ଟ କାର୍ଡ / ନୂଆଦିଲ୍ଲୀ

କୋଲକାତାର ସରକାରୀ ଆର୍‌ଜି କର ହସ୍ପିଟାଲରେ ଜଣେ ମହିଳା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣାର ତଦନ୍ତ କରୁଥିବା ସିବିଆଇ ସୋମବାର ମେଡିକାଲ କଲେଜର ପୂର୍ବତନ ଅଧ୍ୟକ୍ଷ ଡାକ୍ତର ସନ୍ଦୀପ ଘୋଷଙ୍କୁ ପଚରାଉଚରା କରିଛି। କ୍ରମାଗତ ଚତୁର୍ଥ ଦିନ ପାଇଁ ତାଙ୍କୁ ସମନ କରିଥିଲା । ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣାର ନୈତିକ ଦାୟିତ୍ୱ ନେଇ ଡାକ୍ତର ଘୋଷ ଘଟଣାର ଦୁଇ ଦିନ ପରେ ଇସ୍ତଫା ଦେଇଥିଲେ। କିଛି ଘଣ୍ଟା ମଧ୍ୟରେ ସେ ଅନ୍ୟ ଏକ ମେଡିକାଲ କଲେଜର ମୁଖ୍ୟ ହୋଇଥିଲେ। ତେବେ କଲିକତା ହାଇକୋର୍ଟ ରାଜ୍ୟ ସରକାରଙ୍କ ଏହି ପଦକ୍ଷେପକୁ ନାପସନ୍ଦ କରି କହିଛନ୍ତି ଯେ ଡାକ୍ତର ଘୋଷ ହେଉଛନ୍ତି ପ୍ରଥମ ବ୍ୟକ୍ତି ଯାହାଙ୍କୁ କି ଏହି ଘଟଣାରେ ପ୍ରଥମେ ପଚରାଉଚରା କରିବା ଆବଶ୍ୟକ ଥିଲା। ସୋମବାର ସକାଳେ ସନ୍ଦୀପ ଘୋଷ ସିଜିଓ କମ୍ପ୍ଲେକ୍ସରେ ଥିବା ସିବିଆଇର ସିଟି ଅଫିସରେ ପହଞ୍ଚିଥିଲେ। ଅନ୍ୟାନ୍ୟ ପ୍ରଶ୍ନ ମଧ୍ୟରେ ପୀଡ଼ିତାଙ୍କ ପିତାମାତାଙ୍କୁ ଏହି ଦୁଃଖଦ ଘଟଣା ସମ୍ପର୍କରେ ଅବଗତ କରାଯିବା ପରେ ସେ ତାଙ୍କୁ କାହିଁକି ଡାକ୍ତରଖାନାରେ ୩ ଘଣ୍ଟାରୁ ଅଧିକ ସମୟ ଅପେକ୍ଷା କରାଇଥିଲେ ବୋଲି ପଚରାଯାଇଥିଲା। ଏହି ଅପରାଧ ବିଷୟରେ ଶୁଣିବା ପରେ ତାଙ୍କୁ ନିଜର ପ୍ରଥମ ପ୍ରତିକ୍ରିୟା ଜଣାଇବାକୁ କୁହାଯାଇଥିଲା ଏବଂ ସେ ପ୍ରଥମେ କାହା ସହ ଯୋଗାଯୋଗ କରିଥିଲେ ବୋଲି ସିବିଆଇ ଅଧିକାରୀମାନେ ଘୋଷଙ୍କୁ ପଚାରିଥିଲେ। ଏହି ଘଟଣା ପରେ ହସ୍ପିଟାଲର ଜରୁରିକାଳୀନ କୋଠାର ସେମିନାର ହଲ୍ ନିକଟରେ ଥିବା କୋଠରିଗୁଡ଼ିକର ମରାମତି ପାଇଁ କିଏ ନିର୍ଦ୍ଦେଶ ଦେଇଥିଲା ବୋଲି ପୂର୍ବତନ ପ୍ରିନ୍ସିପାଲଙ୍କୁ ପଚରାଯାଇଥିଲା। ଶନିବାର ଓ ରବିବାର ମଧ୍ୟ ଡାକ୍ତର ଘୋଷଙ୍କୁ ଅନେକ ଘଣ୍ଟା ଧରି ପଚରାଉଚରା କରାଯାଇଥିଲା। କେନ୍ଦ୍ରୀୟ ତଦନ୍ତକାରୀ ସଂସ୍ଥାର ଅଧିକାରୀମାନେ ତାଙ୍କ ମୋବାଇଲ୍ ଫୋନ୍ କଲ୍ ବିବରଣୀ ସହିତ ତାଙ୍କ ହ୍ୱାଟ୍ସଆପ୍ ଚାଟ୍ ଲିଷ୍ଟ ମଧ୍ୟ ଯାଞ୍ଚ କରୁଛନ୍ତି। ପୀଡ଼ିତାଙ୍କ ବାପା କହିଛନ୍ତି ଯେ ରାତି ୧୧ଟାରେ ତାଙ୍କୁ ଝିଅର ହତ୍ୟା ବିଷୟରେ ଏକ କଲ୍ ଆସିଥିଲା ଏବଂ ସେ ରାତି ୧୨ଟାରେ ଡାକ୍ତରଖାନାରେ ପହଞ୍ଚିଥିଲେ। ତେବେ ୩ ଘଣ୍ଟାରୁ ଅଧିକ ସମୟ ଅପେକ୍ଷା କରିବା ପରେ ଭୋର ସାଢ଼େ ୩ଟାରେ ସେ ଝିଅର ମୃତଦେହ ଦେଖିପାରିଥିଲେ। ଅନ୍ୟପକ୍ଷରେ ସିବିଆଇ ଟିମ୍‌ ମୃତ ଡାକ୍ତରଙ୍କ ବାସଭବନକୁ ଯାଇ ସେମାନଙ୍କ ପରିବାର ସଦସ୍ୟଙ୍କ ବୟାନ ରେକର୍ଡ କରିଥିବା ଜଣାପଡ଼ିଛି। ସେମାନେ ପ୍ରାୟ ୭ ଘଣ୍ଟା ଧରି ତାଙ୍କ ବାସଭବନରେ ରହିଥିବା କୁହାଯାଉଛି।