ନିଶାରେ ସାଙ୍ଗ ତଣ୍ଟି କାଟିଲା ସାଙ୍ଗ…..

ରିପୋର୍ଟ କାର୍ଡ / ଖୋର୍ଦ୍ଧା

ନିଶାରେ ଚୋର ହୋଇ ଭୁଲିଗଲେ ସମ୍ପର୍କ | ସାମାନ୍ୟ ବଚସାରୁ ଜଣେ ସାଙ୍ଗ ଅନ୍ୟ ଯେଣେ ସାଙ୍ଗକୁ ଅମାନୁଷିକ ଭାବେ ହତ୍ୟା କରିଛି । ସାଙ୍ଗ ବେକକୁ ବ୍ଲେଡରେ କାଟି, ପଥରରେ ଛେଚି ହତ୍ୟା କରିଛି ସାଙ୍ଗ। ୪ ଦିନ ପରେ ଗଳିତ ମୃତଦେହ ଉଦ୍ଧାର ହେବା ପରେ ଘଟଣା ସାମ୍ନାକୁ ଆସିଛି। ପୋଲିସ ଅଭିଯୁକ୍ତଙ୍କୁ ଗିରଫ କରିଥିବା ବେଳେ ସତମାନିଛି ଉକ୍ତ ଯୁବକ ଏପରି ଅଭାବନୀୟ ଘଟଣା ଖୋର୍ଦ୍ଧା ଜିଲ୍ଲାର ଜଟଣୀ ଥାନା ଅଞ୍ଚଳରେ ଘଟିଛି। ମୃତକ ହେଲେ ଖୋର୍ଦ୍ଧା ଜିଲ୍ଲା ଜଟଣୀ ସହର ଗଜପତି ନଗରର ଜି ଇଶ୍ୱର ରାଓ । ପୋଲିସ ତାଙ୍କ ସାଙ୍ଗ ତଥା ଘଟଣାର ମୁଖ୍ୟ ଅଭିଯୁକ୍ତ ବକ୍ସିସା ସିଂ ମେହେରଙ୍କୁ ବାନ୍ଧିଛି। ପୋଲିସ ସୂଚନା ଅନୁଯାୟୀ, ୪ ଦିନ ତଳେ ଜି. ଇଶ୍ୱର ରାଓ ଏବଂ ବକ୍ସିସା ସିଂ ମେହେର ଜଟଣୀର ଗୋଡା ଧର୍ମ ସାଗର ମିଲ୍ ପୋଖରୀ ନିକଟରେ ଏକାଠି ବସି ମଦ୍ୟପାନ କରୁଥିଲେ। ଏହାପରେ ଉଭୟଙ୍କ ଭିତରେ ବଚସା ହୋଇଥିଲା। ଆଉ ବଚସାରୁ ଉଭୟ ପରସ୍ପରକୁ ଆକ୍ରମଣ କରିଥିଲେ। ଶେଷରେ ଏକ ଧାରୁଆ ବ୍ଲେଡ ସାହାଯ୍ୟରେ ଅଭିଯୁକ୍ତ ମେହେର ନିଜ ସାଙ୍ଗ ଇଶ୍ୱରଙ୍କ ବେକକୁ କାଟି ଦେଇଥିଲେ। ଇଶ୍ୱର ତଳେ ପଡ଼ି ଛଟପଟ ହେଉଥିବା ବେଳେ ସେ ତାଙ୍କ ମୁଣ୍ଡ ଉପରେ ଏକ ପଥର ଛେଚି ଫେରାର ହୋଇଯାଇଥିଲା। ଜି ଇଶ୍ୱର ରାଓ ଘରକୁ ନ ଫେରିବାରୁ ପରିବାର ଲୋକେ ବିଭିନ୍ନ ଆଡ଼େ ଖୋଜାଖୋଜି କରି ଥାନାରେ ଅଭିଯୋଗ କରିଥିଲେ। ଏହାପରେ ପୋଲିସ ତଦନ୍ତ ଆରମ୍ଭ କରି ହତ୍ୟାକାଣ୍ଡର ୪ ଦିନ ପରେ ଧର୍ମ ସାଗର ମିଲ୍ ପୋଖରୀ ନିକଟରୁ ମୃତଦେହ ଜବତ କରିଛି। ଏଥିସହ ଅଭିଯୁକ୍ତଙ୍କୁ ଗିରଫ କରି ଅଧିକ ପଚରାଉଚରା କରିଛି ପୋଲିସ ।