ସ୍ତ୍ରୀର ପରକିୟା ପ୍ରୀତିକୁ ସହିପାରିଲାନି ସ୍ୱାମୀ……

ରିପୋର୍ଟ କାର୍ଡ /  କେନ୍ଦୁଝର 

୨ ଛୁଆଙ୍କୁ ଏଡ଼ାଇ ପ୍ରେମିକ ସହ ପତ୍ନୀ ଚାଲି ଯିବା ପରେ ବରଦାସ୍ତ କରିନପାରି ସ୍ୱାମୀ ଘଟାଇଛନ୍ତି ଜଘନ୍ୟ ହତ୍ୟାକାଣ୍ଡ | ସ୍ତ୍ରୀର ପ୍ରକ୍ରିୟା ପ୍ରୀତିକୁ ଦେଖି ସ୍ୱାମୀ ପ୍ରତିଶୋଧର ନିଆଁରେ ଜଳୁଥିଲା । ସୁଯୋଗ ଅପେକ୍ଷାରେ ଥିବା ସ୍ୱାମୀ ଶେଷରେ ନିଜ ହାତରେ ନେଇଗଲେ ପତ୍ନୀର ଜୀବନ। ପରକିୟା ପ୍ରୀତିରୁ ଛାରଖାର ହୋଇଗଲା ସୁନାର ସଂସାର । ମା’ ଆଖି ବୁଜି ସାରିଥିବା ବେଳେ ବାପା ବି ପୋଲିସ ହେପାଜତକୁ ପଳାଇ ଯାଇଥିବା ବେଳେ ଏବେ ବେସହାରା ହୋଇ ପଡ଼ିଛନ୍ତି ୨ ପିଲା  । ଏପରି ଅଭାବନୀୟ ଘଟଣା କେନ୍ଦୁଝର ଜିଲ୍ଲା ତେଲକୋଇ ଥାନା ଅନ୍ତର୍ଗତ ସିରିଗିଡା ଗ୍ରାମରେ ଘଟିଛି। ସିରିଗିଡା ଗ୍ରାମ ରୁଗୁଡ଼ି ସାହିର ନରୋତ୍ତମ ପେଣ୍ଠେଇ ନାୟକ ସାହିର ବବିତା ପେଣ୍ଠେଇଙ୍କୁ ପ୍ରେମ ବିବାହ କରିଥିଲେ। ସେମାନଙ୍କ ଏକ ୩ ବର୍ଷ ର ପୁଅ ଓ ଦେଢ଼ ବର୍ଷର ଝିଅ ଅଛି। ହେଲେ ବେଶି ଦିନ ତିଷ୍ଠିଲାନି ହସଖୁସିର ସଂସାର । ନରୋତ୍ତମ ବାହାରେ କାମ କରୁଥିବା ବେଳେ ବବିତାଙ୍କର ଗାଁର ଅନ୍ୟ ଜଣେ ଯୁବକଙ୍କ ସହ ଅନୈତିକ ସମ୍ପର୍କ ଗଢି ଉଠିଥିଲା । ଗତ ୬ ତାରିଖରେ ବବିତା ସ୍ୱାମୀ ଓ ଦୁଇ ଛୁଆଙ୍କୁ ଛାଡି ଉକ୍ତ ଯୁବକଙ୍କ ସାଙ୍ଗରେ କେଉଁଆଡେ ପଳାଇଥିଲେ । ଦୁଇ ଦିନ ପୂର୍ବରୁ ସେମାନେ ଗାଁକୁ ଫେରିଥିଲେ |ନରୋତ୍ତମ କିନ୍ତୁ ଆଉ ପତ୍ନୀଙ୍କୁ ଗ୍ରହଣ ନ କରିବାରୁ ସେ ନିଜ ବାପ ଘରେ ରହିଥିଲା । ଏ ଘଟଣା ପରଠାରୁ ନରୋତ୍ତମଙ୍କ ମାନସିକ ସ୍ଥିତି ଭଲ ନଥିଲା । ପ୍ରତିଶୋଧ ନିଆଁରେ ଜଳୁଥିବା ନରୋତ୍ତମ ସୁଯୋଗ ଅପେକ୍ଷାରେ ଥିଲେ । ଗତକାଲି ରାତିରେ ନରୋତ୍ତମ ଘରୁ ଏକ ଟାଙ୍ଗିଆ ଧରି ବବିତାଙ୍କ ବାପଘରକୁ ଯାଇଥିଲେ। ବବିତା ଓ ତାଙ୍କ ମା’ ଏକ ଘରେ ଶୋଇଥିବା ବେଳେ ଉକ୍ତ ଝରକାରେ ଗ୍ରୀଲ୍‌ ଲାଗି ନ ଥିବାରୁ ତାହା ଖାଲିଥିଲା। ଏହାଦେଖି ନରୋତ୍ତମ ଉକ୍ତ ଝରକା ବାଟେ ରୁମ୍‌ରେ ପଶି ବବିତାଙ୍କ ବେକକୁ ଟାଙ୍ଗିଆରେ ଏକ ଚୋଟ ପକାଇଥିଲେ। ଫଳରେ ଘଟଣାସ୍ଥଳରେ ହିଁ ତାଙ୍କ ମୃତ୍ୟୁ ହୋଇଥିଲା। ଏହାଦେଖି ଶାଶୁ ଗୋମତି ଚିତ୍କାର କରିବା ସହ ତାଙ୍କୁ ଧରିବାକୁ ଚେଷ୍ଟା କରିଥିଲେ। ମାତ୍ର ସେ ଧକ୍କା ଦେଇ ଫେରାର ହୋଇଯାଇଥିଲେ। ଖବର ପାଇ ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଏଥସହ ଅଭିଯୁକ୍ତ ନରୋତ୍ତମ ଘରେ ଥିବା ବେଳେ ପୋଲିସ ତାଙ୍କୁ ଗିରଫ କରିଛି।